বিশুদ্ধ থলুৱা হাস্যৰস সমৃদ্ধ অসমীয়া চলচ্চিত্ৰ লোকেল উৎপাত-এ ইতিমধ্যে প্ৰথমটো সপ্তাহ গৌৰৱেৰে পাৰ কৰিছে৷
অসমীয়া ছবিৰ তৰাং বতৰত বিশেষকৈ অসমীয়া ছবিয়ে ছবিগৃহত প্ৰায়ে মুখ থেকেচা খাই থকাৰ সময়ত লোকেল উৎপাত-এ অসমৰ বক্স অফিচত প্ৰথমটো সপ্তাহত চুপাৰ হিট হিচাপে পৰিগণিত হৈছে৷
হাস্যৰসেৰে সমৃদ্ধ এই অসমীয়া ছবিখনে যোৱা ১৩ মে’ত ছবিগৃহত মুক্তি লাভ কৰিছিল৷ আৰ্থিক কাৰণ ছবিখনৰ প্ৰযোজক/পৰিচালক তথা ইউনিটটোৱে প্ৰমোচনৰ ক্ষেত্ৰত বিশেষ পদক্ষেপ গ্ৰহণ কৰিব নোৱাৰিলেও সামাজিক মাধ্যমৰ যোগে ছবিখনৰ প্ৰচাৰত মনোনিৱেশ কৰা দেখা গৈছিল৷
লগতে পঢ়ক ১৩ মে’ত আহি আছে ‘লোকেল কুংফু’ৰ পৰিচালকৰ নতুন ছবি ‘লোকেল উৎপাত’
ছবিখন মুক্তি পোৱাৰ পিছত সামাজিক মাধ্যমে ছবিখনৰ ব্যৱসায়ত যোগাত্মক অৰিহণা যোগোৱা পৰিলক্ষিত হৈছে৷ বিশেষকৈ ছবিখন দৰ্শন কৰাৰ পিছত দৰ্শসকলে সামাজিক মাধ্যমত ছবিখন প্ৰশংসা কৰাৰ পিছত অন্য দৰ্শকেও ছবিখন চাবলৈ উৎসাহিত হোৱা দেখা গৈছে৷
ইফালে ছবিখনৰ ইউনিটটোৱেও অসমৰ বিভিন্ন ঠাইলৈ গৈ ছবিখনৰ প্ৰচাৰৰ ক্ষেত্ৰত লোৱা পদক্ষেপ লোকেল কুংফু ফেচবুক পেজৰ মাধ্যমেৰে প্ৰচাৰ কৰি দৰ্শকক আকৃষ্ট কৰিবলৈ প্ৰয়াস কৰি আহিছে৷ মুঠৰ ওপৰত বিশুদ্ধ থলুৱা হাস্যৰস সমৃদ্ধ ছবিখনে দশকক মোহাৱদ্ধ কৰি ৰাখিবলৈ সক্ষম হোৱাৰ বাবেই দ্বিতীয় সপ্তাহতো ছবিগৃহত সগৌৰৱেৰে চলি আছে৷
ইফালে ছবিখনে প্ৰথম সপ্তাহত প্ৰায় ৪০ লাখ টকা সংগ্ৰহ কৰা বুলি জানিব পৰা গৈছে৷ মিতালি ফিল্মছৰ বিতৰক সুকান্ত পালে প্ৰকাশ কৰা মতে দৰ্শকৰ আগ্ৰহৰ বাবেই প্ৰতিটো ছবিগৃহতে ছবিখনৰ শ্ব’ৰ সংখ্যা বৃদ্ধি কৰা হৈছে৷
লগতে পঢ়ক পেগাচাছ গোচৰ! আকৌ কি ক’লে দেশৰ উচ্চতম ন্যায়ালয়ে?
ইফালে দ্বিতীয় সপ্তাহৰ দুটা দিনতো ছবিখনে দৰ্শকৰ পৰা সমাদৰ লাভ কৰাৰ খবৰ আহিছে৷ আনহাতে ছবিখনে bookmyshow.comত অভিলেখসংখ্যক ৯৭% ৰেটিং লাভ কৰিছে৷
উল্লেখ্য যে লোকল উৎপাত হৈছে লোকেল কুংফুখ্যাত কেনি বসুমতাৰীৰ ছবি৷ তেওঁৰ পূৰ্ব ছবিসমূহৰ দৰেই লোকেল উৎপাত ছবিখনতো বিশুদ্ধ থলুৱা হাস্যৰসৰ প্ৰয়োভৰ ঘটিছে, যিয়ে দশকক আকৃষ্ট কৰিবলৈ সক্ষম হৈছে৷
ছবিখনৰ এই সফলতাৰ বিষয়ে পৰিচালক কেনী বসুমতাৰীয়ে কয়, ‘‘আমি আত্মবিশ্বাসী আছিলো যে ই ভাল হ’ব, কিন্তু জনসাধাৰণৰ সঁহাৰি আমাৰ আশাৰ দুগুণতকৈও বেছি হৈছে। ছবিখনক হিট কৰি তোলাৰ বাবে তেওঁ অসমবাসীক কৃতজ্ঞতা জ্ঞাপন কৰিছো।’’
লগতে পঢ়ক অভিনেত্ৰীক যৌন নিগ্ৰহ! পলাতক দক্ষিণৰ তাৰকা বিজয় বাবুৰ পাছপ’ৰ্ট জব্দ
আনহাতে প্ৰৱাসী অসমীয়া দৰ্শকৰ দাবীৰ প্ৰতি লক্ষ্য ৰাখি ছবিখন ২৭ মে’ত দিল্লী, নয়ডা, মুম্বাই. বাংগালুৰু, কলকতা আদি চহৰতো মুক্তি দিয়া হ’ব বুলি প্ৰকাশ কৰিছে পৰিচালক কেনি বসুমতাৰীয়ে৷
এই ক্ষেত্ৰত পৰিচালকগৰাকীয়ে প্ৰৱাসী অৰ্থাৎ উক্ত চহৰসমূহত থকা অসমীয়া সংঘ আৰু সংগঠন তথা গোটসমূহক ছবিখন প্ৰচাৰ কৰাত তেওঁলোকক সহায় কৰিব বুলিও আশা প্ৰকাশ কৰিছে৷
“মেট্ৰ’ত প্ৰচাৰৰ কৰাৰ সামৰ্থ্য আমাৰ নাই। আমি আশা কৰিছো সেই চহৰসমূহত থকা অসমৰ সংঘ আৰু গোটসমূহে ইয়াৰ প্ৰচাৰ কৰাত সহায় কৰিব।’’ পৰিচালক কেনীয়ে কয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
