ৰিমলী বৰকটকীঃ চিনেমাৰ নামটো দেখিয়েই নিশ্চয়কৈ লোকেল কুংফু-প্ৰথম আৰু দ্বিতীয়ৰ কথা মনলৈ আহিছেই। লোকেল কুংফুৰ দুই-চাৰিটা জনপ্ৰিয় সংলাপ এতিয়াও বহু অসমীয়াৰ মুখে-মুখে। আৰু অসমীয়া চিনেমাৰ বিষয়ে ভূ ৰখাসকলেও লোকেল উৎপাতৰ বিষয়েও ছ‘চিয়েল মিডিয়া আদিৰ জৰিয়তে জানিবলৈ পাৰিছেই।
হয়, ছেক্সপীয়েৰৰ প্ৰখ্যাত হাস্যৰসধৰ্মী নাটক ‘‘ক’মেডী অৱ এৰৰ’’ৰ পৰা অনুপ্ৰেৰিত হৈ নিৰ্মাণ কৰা ‘‘লোকেল কুংফু’’ৰ জৰিয়তে অসমীয়া চলচ্চিত্ৰ উদ্যোগত হাস্যৰসধৰ্মীতা আৰু সমৰকলাৰ সংমিশ্ৰণৰে সম্পূৰ্ণ এক ন তথা স্বকীয় ধাৰাৰ আৰম্ভণি ঘটোৱা কাহিনীকাৰ,পৰিচালক, অভিনেতা কেনী দেউৰী বসুমতাৰীৰ অনাগত ছবি লোকেল উৎপাতে অহা ১৩ মে’ তাৰিখে অসমৰ ছবিগৃহসমূহত মুক্তিলাভ কৰিব। পৰিচালক কেনী বসুমতাৰীৰ আমন্ত্ৰণত একলম লিখিবৰ বাবেই মুক্তিৰ পূৰ্বে ছবিখন চোৱা হ’ল।
লগতে পঢ়ক বিবাহ আসন্ন! অৰ্জুন কাপুৰৰ সৈতে বিয়াত বহিবলৈ সাজু মালাইকা আৰোৱা!
লোকেল কুংফু-প্ৰথম আৰু দ্বিতীয় চোৱাসকলে নিশ্চিতভাৱে লোকেল উৎপাতৰ পৰাও একেধৰণৰ হাস্যৰসৰ প্ৰত্যাশা ৰাখিছে। অৱশ্যেই আপোনাৰ এই প্ৰত্যাশা অথলে নেযায়। বৰঞ্চ, হাঁহি হাঁহি ভাগৰ লাগিব দৰ্শকৰ। পূৰ্বৰ কেওখন ছবিৰ দৰেই লোকেল উৎপাতৰো কাহিনী, চিত্ৰনাট্য আৰু পৰিচালনা-কেনী বসুমতাৰীৰেই। হাস্যৰসৰ কথাতো থাকিবই, কিন্তু এইবাৰ অৰ্থাৎ লোকেল উৎপাতত মোৰ দৃষ্টিত আটাইতকৈ উল্লেখযোগ্য তথা আকৰ্ষণীয় দিশটো হৈছে-নাৰীকেন্দ্ৰিক সমৰকলাৰ উপস্থাপনা।
অৰ্থাৎ পূৰ্বৰ লোকেল কুংফুৰ দৰে লোকেল উৎপাততো সমৰকলাৰ প্ৰয়োগ বহুলভাৱে কৰা হৈছে, পিছে এইবাৰ মূখ্যতঃ মূল নাৰী চৰিত্ৰৰ একচন (action) ধৰ্মীতাৰ উপস্থাপন। অসমীয়া ছবিৰ ক্ষেত্ৰত প্ৰথমবাৰৰ বাবে একচনধৰ্মী নাৰী চৰিত্ৰক এনেদৰে শক্তিশালীৰূপত তুলি ধৰা হৈছে— এই নতুনত্বৰ বাবে অৱশ্যেই কেনী বসুমতাৰী ধন্যবাদৰ পাত্ৰ।
লগতে পঢ়ক ৰাজ্যসভা নিৰ্বাচন আৰু কংগ্ৰেছী নেতাৰ হোটেল বিলাস!
অৰ্থাৎ লোকেল উৎপাতৰ কাহিনীভাগত এটা দিশ নাৰীবাদক লৈয়ো আছে। পুৰুষতান্ত্ৰিক সমাজ-ব্যৱস্থাৰ ওপৰতো এই চৰিত্ৰটোৰ মাজেৰেই এক তীৰ্যক ভ্ৰুকূটিও কৰা হৈছে। আৰম্ভণিৰে পৰাই স্বতঃস্ফূৰ্ত হাস্যৰসৰ লগতেই সাংগীতিক লয়ৰ মাজেৰে কাহিনীভাগ আগবাঢ়িছে। প্ৰথমাৰ্দ্ধত ক’তোৱেই ৰৈ যোৱাৰ অৱকাশ নাই। কেনী বসুমতাৰীৰ পূৰ্বৰ চিনেমাকেইখনৰ তুলনাত বহু দিশতেই লোকেল উৎপাতৰ কাম অধিক উন্নত মানদণ্ডৰ হৈছে। কেমেৰাৰ কামৰ পৰা চিনেমেটিক ট্ৰিটমেন্টলৈকে, সংগীতৰ ব্যৱহাৰ-এই সকলোবোৰ দিশতেই নতুনত্ব দেখিবলৈ পোৱা গৈছে।
সুৰুয ডেকাৰ আলোক শিল্পৰ কামৰ বিষয়ে উল্লেখ কৰিবই লাগিব। বিশেষকৈ ভাবগধুৰ পৰিস্থিতিক তুলি ধৰিবলৈ ল‘ এংগল শ্বট আৰু ধুসৰ পোহৰৰ ব্যৱহাৰ, একেদৰে উচ্ছল পৰিস্থিতিক দৰ্শাবলৈ হাই এংগল শ্বটৰ ব্যৱহাৰ-এনেবোৰ টেকনিকেল দিশৰ প্ৰতিও ভালদৰে লক্ষ্য ৰখা হৈছে। মূখ্য নাৰী চৰিত্ৰত অভিনয় কৰা পুনম গুৰুং নিজে এগৰাকী অভিজ্ঞ সমৰকলাবিদ। লগতে চিনেমাৰ বাকী সমৰকলাৰ পৰিচালনা কৰিছে মন্তু দেউৰীয়ে।
লগতে পঢ়ক এইবাৰ মোদীৰ নতুন যাদু চলো ইণ্ডিয়া! বিদেশী পৰ্যটকৰে ভৰিব দেশ! কিন্তু কেনেকৈ?
আৱহ-সংগীতৰ কাম কৰিছে আকাশদীপ গগৈয়ে। অভিনয়ৰ ক্ষেত্ৰত ট‘নী দেউৰী, কেনী বসুমতাৰী, পুনম গুৰুং, বনী দেউৰীকে আদি কৰি প্ৰায় সকলোবোৰেই নিজ নিজ চৰিত্ৰত সহজ। দ্বিতীয়াৰ্দ্ধতো কাহিনীত হাস্যৰস অফুৰন্ত। মাত্ৰ এই সকলোবোৰ সামগ্ৰিকৰূপত অধিক আকৰ্ষণীয় ৰূপত তুলি ধৰাৰ বিপৰীতে কেনী বসুমতাৰীয়ে নিজৰ চৰিত্ৰটোলৈ কিছু অৱহেলা কৰিলে যেন অনুভূত হ’ল। পিছে এই দিশটোলৈ চকু ৰাখি থমকি ৰোৱাৰ অৱকাশ নায়েই বুলিব লাগিব। মুঠতে প্ৰাণখুলি হাঁহি পৰিয়ালৰ সকলোৰে সৈতে সম্পূৰ্ণ দুঘন্টা উপভোগ কৰিব পৰাকৈ মনোৰঞ্জনৰ সমস্ত সমলেই পাব লোকেল উৎপাতত।
লেখিকাৰ email আইডি- rimli.borkotoky1985@gmail.com
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
