৪৮ বছৰৰ মূৰকত লোকসভাৰ অধ্যক্ষ নিৰ্বাচন, ভোটগণনাৰে আজি নিশ্চিত হ’ব অধ্যক্ষ, সংসদত হুলস্থুল হোৱাৰ সম্ভাৱনা
আজি ২৬ জুন তাৰিখ বুধবাৰে পুৱা ১১ বজাত লোকসভাৰ অধ্যক্ষ পদৰ বাবে ভোটগ্ৰহণ অনুষ্ঠিত হ’ব। লোকসভাৰ সকলো সদস্যই ইয়াত ভোটদান কৰিব। এইবাৰ ৪৮ বছৰৰ মূৰকত অধ্যক্ষ পদৰ বাবে নিৰ্বাচন অনুষ্ঠিত হ’ব । ইয়াৰ পূৰ্বে ১৯৭৬ চনত লোকসভাৰ অধ্যক্ষ পদৰ নিৰ্বাচন হৈছিল। এতিয়ালৈকে ভাৰতত মুঠ ৩ বাৰ অধ্যক্ষ পদৰ নিৰ্বাচন হৈছে। ১৯৫২, ১৯৬৭ আৰপ ১৯৭৬।
অধ্যক্ষ আৰু উপ অধ্যক্ষ পদ সন্দৰ্ভত এন ডি এ আৰু ইণ্ডিয়াৰ মাজত কোনো সহমতত উপনীত নোহোৱাৰ পিছত মঙলবাৰে বিৰোধীয়ে কে. সুৰেশক প্ৰাৰ্থী হিচাপে মনোনিত কৰে। আনহাতে এন ডি এয পুনৰবাৰ আস্থা প্ৰকাশ কৰিছে সপ্তদশ লোকসভাত অধ্যক্ষ হিচাপে থকা ওম বিৰলাৰ ওপৰত।
এনে পৰিস্থিতিত ৰাজস্থানৰ কোটা-বুণ্ডি লোকসভা সমষ্টিৰ তিনিবাৰৰ সাংসদ ওম বিৰলাৰ লগতে কেৰেলাৰ মাভেলীকাৰাৰ পৰা অষ্টম বাৰৰ সাংসদ কে. সুৰেশৰ মাজত প্ৰত্যক্ষ প্ৰতিদ্বন্দ্বিতা হ’ব। ভাৰতৰ নিৰ্বাচনী ইতিহাসত প্ৰথমবাৰৰ বাবে বিৰোধীয়ে লোকসভাৰ অধ্যক্ষ পদৰ বাবে প্ৰাৰ্থী প্ৰক্ষেপ কৰিব।
পৰিসংখ্যাৰ ক্ষেত্ৰত এন ডি এ শক্তিশালী, সেয়েহে চৰকাৰতো ই আছে। সেয়ে ওম বিৰলাৰ বিজয় নিশ্চিত বুলি অনুমান কৰা হৈছে। লোকসভাত এন ডি এৰ সৈতে ২৯৩জন সাংসদ আছে। আনহাতে ইণ্ডিয়া শক্তিত ২৩৩ জন সাংসদ আছে।
সংসদত উপস্থিত থকা সদস্যৰ সৰল সংখ্যাগৰিষ্ঠতাৰে নিৰ্বাচন কৰা হয়। আজি যদি ওম বিৰলা জয়ী হয় তেন্তে তেওঁ দ্বিতীয়বাৰৰ বাবে লোকসভাৰ অধ্যক্ষ হোৱা প্ৰথমজন বিজেপি সাংসদ হ’ব। ইয়াৰ পূৰ্বে কংগ্ৰেছৰ বলৰাম জাখৰে দুবাৰকৈ অধ্যক্ষ হিচাপে কাৰ্যনিৰ্বাহ কৰিছিল।
তথ্য অনুসৰি ২৪ জুন সোমবাৰৰ পৰা আৰম্ভ হোৱা ১৮ সংখ্যক লোকসভাৰ প্ৰথম অধিৱেশনত যোৱা দুদিনত ৫৪২ গৰাকী সাংসদৰ ভিতৰত ৫৩৫ গৰাকীয়ে শপত গ্ৰহণ কৰিছে। এতিয়ালৈকে শপত লোৱা নাই ৭ জন সাংসদ। এনে পৰিস্থিতিত তেওঁলোকে এই ভোটদান প্ৰক্ৰিয়াত অংশগ্ৰহণ কৰিব নোৱাৰিব। ইয়াৰ ভিতৰত আছে কংগ্ৰেছৰ শশী থাৰুৰ, এছ পিৰ আফজল আনছাৰী, নিৰ্দলীয় ৰছিদ ইঞ্জিনিয়াৰ আৰু অমৃতপল সিং, টিএমচিৰ শত্ৰুঘন সিনহা, দীপক অধিকাৰী আৰু শ্বেখ নুৰুল ইছলাম।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
