১৬০০ বছৰৰ পাছত ঐতিহাসিক নালন্দা বিশ্ববিদ্যালয় পুনৰ মুকলি…
বুধবাৰ ১৯ জুন তাৰিখে বিহাৰৰ ৰাজগীৰত নালন্দা বিশ্ববিদ্যালয়ৰ নতুন চৌহদ মুকলি কৰিলে প্ৰধানমন্ত্ৰী নৰেন্দ্ৰ মোদীয়ে। এই কাৰ্যসূচীত বিহাৰৰ মুখ্যমন্ত্ৰী নীতিশ কুমাৰ, বৈদেশিক মন্ত্ৰী এছ জয়শংকৰ আৰু ১৭খন দেশৰ ৰাষ্ট্ৰদূতসকলে অংশগ্ৰহণ কৰে। পুৱা ১০.৩০ বজাত প্রধানমন্ত্রীয়ে বিশ্ববিদ্যালয়খন উদ্বোধন কৰে। বিশ্ববিদ্যালয়খন উদ্বোধনৰ লগে লগে বিহাৰেও নিজৰ হেৰুৱা ঐতিহ্য পুনৰ লাভ কৰিবলৈ সক্ষম হয়।
উদ্বোধনীৰ পূৰ্বে ছচিয়েল মিডিয়া প্লেটফৰ্ম এক্সত নলন্দা বিশ্ববিদ্যালয়ৰ ছবি শ্বেয়াৰ কৰে প্ৰধানমন্ত্ৰী মোদীয়ে। ইয়াৰ লগতে তেওঁ লিখে, “আজি আমাৰ শিক্ষা খণ্ডৰ বাবে এক অতি বিশেষ দিন। আজি পুৱা প্ৰায় ১০:৩০ বজাত ৰাজগীৰত নালন্দা বিশ্ববিদ্যালয়ৰ নতুন চৌহদ উদ্বোধন কৰা হ’ব। আমাৰ গৌৰৱময় ইতিহাসৰ সৈতে নালন্দাৰ গভীৰ সম্পৰ্ক আছে।”
বিহাৰত সম্পূৰ্ণ হোৱা নালন্দা বিশ্ববিদ্যালয়ৰ নতুন কেম্পাছ নালন্দাৰ প্ৰাচীন ধ্বংসাৱশেষৰ স্থানৰ ওচৰত। এই বিশ্ববিদ্যালয়খন নালন্দা বিশ্ববিদ্যালয় আইন, ২০১০ৰ অধীনত প্ৰতিষ্ঠা কৰা হৈছিল। এই আইনত বিশ্ববিদ্যালয়খন স্থাপনৰ বাবে ২০০৭ চনত ফিলিপাইনছত অনুষ্ঠিত দ্বিতীয় পূব এছিয়া সন্মিলনত লোৱা সিদ্ধান্ত কাৰ্যকৰী কৰাৰ ব্যৱস্থা কৰা হৈছিল। এই বিশ্ববিদ্যালয়ত বিহাৰৰ লগতে দেশৰ বিভিন্ন প্ৰান্তৰ ছাত্ৰ-ছাত্ৰীয়ে বহু ধৰণৰ পাঠ্যক্ৰম অধ্যয়নৰ সুযোগ পাব।
https://x.com/narendramodi/status/1803262253631721719
উল্লেখ্য যে পঞ্চম শতিকাত নালন্দা বিশ্ববিদ্যালয় প্ৰতিষ্ঠা কৰা হৈছিল। সেই সময়ত পৃথিৱীৰ বিভিন্ন প্ৰান্তৰ পৰা মানুহ ইয়ালৈ পঢ়া-শুনাৰ বাবে আহিছিল। এই বিশ্ববিদ্যালয়খনে বিশ্বজুৰি স্বীকৃতি লাভ কৰিছিল আৰু শিক্ষাৰ সৰ্ববৃহৎ কেন্দ্ৰ হিচাপে গঢ়ি উঠিছিল।
বিশেষজ্ঞসকলৰ মতে দ্বাদশ শতিকাত আগ্ৰাসীসকলে বিশ্ববিদ্যালয়খন ধ্বংস কৰি দিয়ে। ইয়াৰ পূৰ্বে ৮০০ বছৰ ধৰি বিশ্বৰ ভিতৰতে অন্যতম হিচাপে জাতিষ্কাৰ হৈ আছিল। নতুন বিশ্ববিদ্যালয়খনে ২০১৪ চনত ১৪ জন ছাত্ৰ-ছাত্ৰীৰে এটা অস্থায়ী চৌহদত পাঠদান আৰম্ভ কৰিছিল। ২০১৭ চনৰ পৰা আৰম্ভ হৈছিল বিশ্ববিদ্যালয়খনৰ নিৰ্মাণকাৰ্য।
ভাৰতৰ বাহিৰেও ১৭খন দেশ এই বিশ্ববিদ্যালয়ৰ অংশীদাৰ। এই দেশসমূহৰ ভিতৰত আছে অষ্ট্ৰেলিয়া, বাংলাদেশ, ভূটান, ব্ৰুনাই দাৰুছালাম, কম্বোডিয়া, চীন, ইণ্ডোনেছিয়া, লাওছ, মৰিচাছ, ম্যানমাৰ, নিউজিলেণ্ড, পৰ্তুগাল, ছিংগাপুৰ, দক্ষিণ কোৰিয়া, শ্ৰীলংকা, থাইলেণ্ড আৰু ভিয়েটনাম। এই দেশসমূহে বিশ্ববিদ্যালয়খনৰ সমৰ্থনত বুজাবুজি চুক্তি স্বাক্ষৰ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
