কেন্দ্ৰীয় ইলেক্ট্ৰনিকছ আৰু ইনফ’ৰ্মেশ্যন টেকন’লজি মন্ত্ৰণালয়ে এক নতুন পদক্ষেপ লোৱাৰ চিন্তা চৰ্চা কৰিছে৷
দ্য ইণ্ডিয়ান এক্সপ্ৰেছত প্ৰকাশিত খবৰ অনুসৰি মন্ত্ৰণালয়ে এটা ডিজিটেল লিংকতে নাগৰিকৰ সকলোবোৰ প্ৰমাণ পত্ৰৰ তথ্য সংলগ্ন কৰিব৷
মন্ত্ৰণালয়ে একেটা ডিজিটেল লিংকতে চালকৰ অনুজ্ঞাপত্ৰ, পাছপ’ৰ্ট, পান কাৰ্ড, আধাৰ কাৰ্ডৰ লগতে অন্যান্য প্ৰমাণ পত্ৰৰো তথ্যসমূহ সংলগ্ন কৰাৰ পৰিকল্পনা কৰিছে৷
কেন্দ্ৰীয় চৰকাৰে এক নতুন ডিজিটেল আৰ্কাইভৰ দৰে এক ব্যৱস্থা কৰি এজন ব্যক্তিৰ সকলোবোৰ চৰকাৰী প্ৰমাণ পত্ৰ একেটা লিংকতে মজুত ৰখাৰ বাবেই এই পৰিকল্পনা কৰা বুলি প্ৰকাশ পাইছে৷
সেই অনুসৰি প্ৰতিজন লোককে এটা ইউনিক আইডি নম্বৰ দিয়া হ’ব যিটোক হয়তো ডিজিটেল আইডি কাৰ্ড বুলি ধৰা হ’ব৷ এই নম্বৰটোৰ দ্বাৰাই লোকজনৰ একেটা লিংকতে সকলোবোৰ প্ৰমাণ পত্ৰ আৰ্কাইভ কৰা হ’ব আৰু লোকজনে কি কামত কি প্ৰমাণ পত্ৰ ব্যৱহাৰ কৰিব তাত উপলব্ধ এক অপচনৰ জৰিয়তে সেয়া বাছনি কৰিব পাৰিব৷
সূত্ৰটোৰ মতে ইয়াক ফেডাৰেল ডিজিটেল আইডেন্টিটিৰ দৰে ব্যৱহাৰ কৰি ইয়াত কেন্দ্ৰীয় চৰকাৰ আৰু ৰাজ্য চৰকাৰে প্ৰদান কৰা সকলো নথি তথা প্ৰমাণ পত্ৰ মজুত কৰাৰ পৰিকল্পনা কৰা হৈছে৷ অৰ্থাৎ KYCৰ দৰেই ইয়াক ব্যৱহাৰ কৰিব পৰা যাব৷
এই সমগ্ৰ প্ৰক্ৰিয়াটো ইণ্ডিয়া এণ্টাৰপ্ৰাইজ আৰ্কিটেকচাৰ(IndEA)ৰ অধীনত সম্পাদন কৰা হ’ব৷ মন্ত্ৰণালয়ে অহা ফেব্ৰুৱাৰি মাহত এই ব্যৱস্থাটো ৰাজহুৱা ক্ষেত্ৰৰ বাবে মুকলি কৰাৰ সম্ভাৱনা আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
