অসম লাইভ২৪ঃ এটা ব্যস্ত ৰে’লৱে ষ্টেচনৰ দৃশ্য এয়া৷ কৰ্মব্যস্ততাৰ বাবে সকলো ওলাই আহিছে৷ মহিলা, যুৱতী, পৌঢ়ৰ পৰা যুৱকলৈ সকলোৱে আছে ষ্টেচনত৷ তাৰমাজতেই চলি আছে ৰে’লৱে ষ্টেচনৰ বিশেষ টিভিটো৷ টিভিৰ সন্মুখত একাংশই ভীৰো কৰিছে৷ ভীৰ দেখিয়েই একাংশই গুৰুত্বপূৰ্ণ বাতৰি বুলি কাষ চাপি গৈছে৷ কিন্তু এয়া চলিছে কি?
টেলিভিছনৰ স্ক্ৰিণত বিজ্ঞাপনৰ সলনি নীলা ছবি। হঠাতেই কেনেকৈ ষ্টেচনৰ টেলিভিছনত চলিল এই ছবি? প্ৰায় ৩ মিনিট ধৰি চলি আছিল এই ছবি। এটা টিভিতো নহয় আটাইকেইটা টিভিতেই একেই দৃশ্য। ঘটনাটো বিহাৰৰ পাটনা ৰে’লৱে ষ্টেচনৰ ১০ নম্বৰ প্লেটফৰ্মত সংঘটিত হৈছিল। দেওবাৰে পুৱা প্ৰায় ৯-৩০ বজাত প্লেটফৰ্মত থকা একাধিক টিভিত ৩ মিনিট ধৰি নিৰন্তৰ চলি আছিল এডাল্ট ছবি। সেই সময়ত বহুতো মহিলা আৰু শিশুও সেই প্লেটফৰ্মত উপস্থিত আছিল। এক মুহূৰ্তত সকলো আচৰিতো হৈছিল৷ অস্বস্তিবোধে ক্ৰিয়া কৰিছিল বহু যাত্ৰীৰ মনত৷ তেনেতেই একাংশ সচেতন যাত্ৰীয়ে খৰখেদাকৈ গৈ জিআৰপি আৰু আৰপিএফ বিষয়াসকলৰ ওচৰত অভিযোগ কৰে৷ অভিযোগৰ পিছতেই আৰক্ষী বিষয়াই ষ্টেচনৰ গোটেইকেইটা টেলিভিছনেই বন্ধ কৰি দিয়ে৷
কিন্তু কাৰ ভুলৰ বাবে এই ঘটনা? ৰে’ল ষ্টেচনটোৰ দূৰদৰ্শন বিজ্ঞাপনৰ দায়িত্বত কোন আছিল? ৰে’ল ষ্টেচনৰ দূৰদৰ্শনৰ বিজ্ঞাপন দিয়াৰ দায়িত্বত আছিল দত্ত কমিউনিকেশ্বন নামৰ এটা কোম্পানী৷ ঘটনাৰ পাছতেই আৰপিএফে দ্ৰুততাৰে কোম্পানীটোৰ সৈতে যোগাযোগ কৰে৷ বিষয়াসকলে ততাতৈয়াকৈ ৰে’ল ষ্টেচনৰ টিভিত অশ্লীল চলচ্চিত্ৰ বন্ধ কৰে৷ কিন্তু ঘটনা ইয়াতেই শেষ নহয়। দত্ত কমিউনিকেশ্বনৰ বিৰুদ্ধে ৰে’লৱেৰ ফালৰ পৰা এখন এজাহাৰ দাখিল কৰা হৈছে। কোম্পানীটোক ব্লেকলিষ্ট কৰাৰ উপৰিও আৰ্থিক জৰিমনা পৰিশোধ কৰিবলৈকো ৰে’লৱে কৰ্তৃপক্ষই নিৰ্দেশনা জাৰি কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
