ভাৰত আৰু ইৰানৰ মাজৰ সম্পৰ্কক লৈ নতুনকৈ চৰ্চা আৰম্ভ হৈছে। সোমবাৰে প্ৰধানমন্ত্ৰী নৰেন্দ্ৰ মোদীয়ে ইৰানৰ ৰাষ্ট্ৰপতি মাছুদ পেজেছকিয়ানৰ সৈতে এক গুৰুত্বপূৰ্ণ বৈঠকত মিলিত হয়। কিৰ্গিস্তানৰ ৰাজধানী বিস্কেকত অনুষ্ঠিত চাংহাই সহযোগিতা সংস্থা (SCO)ৰ সন্মিলনৰ আঁৰত এই বৈঠক অনুষ্ঠিত হয়। বৈঠকত দুয়োগৰাকী নেতাই ভাৰত-ইৰানৰ মাজৰ দীৰ্ঘদিনীয়া সম্পৰ্ক আৰু ভৱিষ্যতে দুয়োখন দেশৰ মাজত সহযোগিতা কেনেদৰে আৰু অধিক বৃদ্ধি কৰিব পাৰি, সেই বিষয়ে আলোচনা কৰে।
প্ৰধানমন্ত্ৰী মোদীয়ে স্পষ্টভাৱে কয় যে-ভাৰতে ভৱিষ্যতে ইৰানৰ সৈতে বাণিজ্য বৃদ্ধি কৰাৰ লগতে বাণিজ্যৰ ক্ষেত্ৰসমূহো অধিক বৈচিত্ৰ্যময় কৰিবলৈ আগ্ৰহী। অৰ্থাৎ, কেৱল এটা বা দুটা ক্ষেত্ৰতে সীমাবদ্ধ নাথাকি বিভিন্ন খণ্ডত দুয়োখন দেশৰ মাজত ব্যৱসায়িক সম্পৰ্ক বৃদ্ধি কৰাৰ ওপৰত গুৰুত্ব দিয়া হ’ব পাৰে। মোদীয়ে লগতে পশ্চিম এছিয়াত স্থায়ী শান্তি প্ৰতিষ্ঠাৰ বাবে ভাৰতে সকলো প্ৰচেষ্টাক সমৰ্থন কৰি যাব বুলি উল্লেখ কৰে। বৰ্তমান পশ্চিম এছিয়াত চলি থকা উত্তেজনাৰ পৰিপ্ৰেক্ষিতত এই মন্তব্য যথেষ্ট গুৰুত্বপূৰ্ণ বুলি বিবেচিত হৈছে।
ইৰানৰ সৈতে সম্পৰ্ক ৰখা দেশসমূহৰ বিৰুদ্ধে আমেৰিকাই নিষেধাজ্ঞা আৰোপ কৰাৰ ভাবুকি দি অহাৰ সময়তে মোদী আৰু পেজেছকিয়ানৰ এই বৈঠকে বিশেষ তাৎপৰ্য বহন কৰিছে। ভাৰতৰ বাবে ইৰান কেৱল এক বাণিজ্যিক অংশীদাৰ নহয়। ইৰান ভৌগোলিক আৰু কৌশলগতভাৱেও ভাৰতৰ বাবে গুৰুত্বপূৰ্ণ। বিশেষকৈ মধ্য এছিয়া আৰু পশ্চিম এছিয়াৰ সৈতে ভাৰতৰ যোগাযোগৰ ক্ষেত্ৰত ইৰানৰ গুৰুত্ব আছে। ভাৰত আৰু ইৰানৰ সম্পৰ্ক বহু পুৰণি। অৱশ্যে ইৰানৰ ওপৰত আমেৰিকাৰ নিষেধাজ্ঞাৰ ফলত দুয়োখন দেশৰ মাজৰ বাণিজ্যিক সম্পৰ্কত কিছু প্ৰভাৱ পৰিছে। তেনে পৰিস্থিতিত মোদী-পেজেছকিয়ানৰ বৈঠকে দুয়োখন দেশৰ সম্পৰ্ক পুনৰ অধিক শক্তিশালী কৰাৰ সম্ভাৱনাৰ ইংগিত দিছে।
বৈঠকৰ পিছত প্ৰধানমন্ত্ৰী মোদীয়ে ছ’চিয়েল মিডিয়াত লিখে যে তেওঁ বিস্কেকত ৰাষ্ট্ৰপতি মাছুদ পেজেছকিয়ানৰ সৈতে সাক্ষাৎ কৰিছে। দুয়োখন দেশৰ মাজৰ দীৰ্ঘদিনীয়া বন্ধুত্বক বিভিন্ন ক্ষেত্ৰত অধিক শক্তিশালী কৰাৰ সংকল্প পুনৰ প্ৰকাশ কৰা বুলিও তেওঁ উল্লেখ কৰে। মোদীয়ে লগতে কয় যে ভাৰতে ভৱিষ্যতে ইৰানৰ সৈতে বাণিজ্য সম্প্ৰসাৰণ আৰু বৈচিত্ৰ্য বৃদ্ধিৰ বাবে আগ্ৰহী। ইয়াৰ উপৰি অঞ্চলটোৰ বৰ্তমানৰ পৰিস্থিতিৰ বিষয়েও দুয়োগৰাকী নেতাই আলোচনা কৰে।
এই বৈঠকৰ পৰা এটা কথা স্পষ্ট হৈছে যে ভাৰত ইৰানৰ সৈতে সম্পৰ্ক সম্পূৰ্ণৰূপে এৰাই চলাৰ পক্ষত নাই। বৰং নিজৰ স্বাৰ্থ আৰু কৌশলগত প্ৰয়োজনীয়তা বিবেচনা কৰি ইৰানৰ সৈতে যোগাযোগ আৰু সহযোগিতা অব্যাহত ৰখাৰ চেষ্টা কৰিছে। অনাগত দিনত বাণিজ্য, যোগাযোগ, শক্তি আৰু অন্যান্য ক্ষেত্ৰত ভাৰত-ইৰানৰ সহযোগিতা বৃদ্ধি পাব পাৰে। অৱশ্যে আমেৰিকাৰ নিষেধাজ্ঞা আৰু পশ্চিম এছিয়াৰ পৰিস্থিতিয়ে এই সম্পৰ্কৰ ওপৰত কিমান প্ৰভাৱ পেলায়, সেয়া লক্ষ্যণীয় হ’ব। সেয়েহে মোদী-পেজেছকিয়ানৰ এই বৈঠকক ভাৰত-ইৰানৰ সম্পৰ্কৰ ক্ষেত্ৰত এটা গুৰুত্বপূৰ্ণ পদক্ষেপ হিচাপে দেখা হৈছে। আমেৰিকাৰ চাপৰ মাজতো ভাৰতে ইৰানৰ সৈতে নিজৰ কূটনৈতিক আৰু বাণিজ্যিক সম্পৰ্কৰ দুৱাৰ খোলা ৰাখিব বিচৰাৰ ইংগিত এই বৈঠকৰ পৰা পোৱা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
