সাৱধান! ঋতুস্ৰাৱৰ সময়ত এইকেইটা কাম নকৰিলে হ’ব পাৰে বিভিন্ন ৰোগ

মহিলাসকলৰ ঋতুস্ৰাৱৰ সময়ছোৱাত ব্যক্তিগত পৰিচ্ছন্নতা বজাই ৰখাটো অতি গুৰুত্বপূৰ্ণ। এই সময়ত গোপন অংগত আর্দ্ৰতা অধিক হোৱা বাবে যদি সঠিকভাৱে যত্ন লোৱা নহয়, তেন্তে বেক্টেৰিয়া আৰু ফাংগাছ সহজে বৃদ্ধি পাব পাৰে। ফলস্বৰূপে ইউৰিনাৰী ট্ৰেক্ট ইনফেকচন (UTI), চুলকনি, ৰেছ, দুৰ্গন্ধ আদি বিভিন্ন স্বাস্থ্যজনিত সমস্যাৰ আশংকা বৃদ্ধি পায়। সেয়েহে ঋতুস্ৰাৱৰ সময়ত পৰিষ্কাৰ-পৰিচ্ছন্নতা বজাই ৰখাটো প্ৰজনন স্বাস্থ্যৰ লগতে সামগ্ৰিক স্বাস্থ্য সুৰক্ষাৰ বাবেও অত্যন্ত প্ৰয়োজনীয়।

ঋতুস্ৰাৱৰ সময়ত সংক্রমণৰ আশংকা সাধাৰণতে কিছু বৃদ্ধি পায়। ইয়াৰ মূল কাৰণ হ’ল গোপন অংগত দীৰ্ঘ সময় ধৰি আর্দ্ৰতা থকা, যো*নীৰ pH-ৰ পৰিৱৰ্তন, উপকাৰী বেক্টেৰিয়াৰ ভাৰসাম্য বিঘ্নিত হোৱা আৰু একেটা ছেনিটাৰী পেড বহু সময় ধৰি ব্যৱহাৰ কৰা।

গোপন অংগ প্ৰতিবাৰ পেড সলনি কৰাৰ সময়ত ধুবই লাগিব বুলি কোনো বাধ্যবাধকতা নাই। কিন্তু দিনটোত কমেও দুবাৰ—বিশেষকৈ পুৱা আৰু ৰাতি শুবলৈ যোৱাৰ আগতে—পৰিষ্কাৰ পানীৰে সেই অংশ ধুই লোৱাটো উচিত। অধিকাংশ ক্ষেত্ৰতে কেৱল পৰিষ্কাৰ পানীয়েই যথেষ্ট। যো*নীৰ নিজস্ব স্ব-পৰিষ্কাৰ ব্যৱস্থা থাকে, যিয়ে স্বাভাৱিকভাৱে pH-ৰ ভাৰসাম্য ৰক্ষা কৰে। সাধাৰণ চাবোন বা সুগন্ধিযুক্ত ইণ্টিমেট ৱাশ্ব ব্যৱহাৰ কৰাটো বাঞ্ছনীয় নহয়। ইয়াৰ ফলত যো*নীৰ স্বাভাৱিক pH-ৰ ভাৰসাম্য নষ্ট হ’ব পাৰে, শুকান, জ্বলা-পোৰা, চুলকনি আৰু সংক্রমণৰ আশংকা বৃদ্ধি পাব পাৰে। যদি বিশেষ প্ৰয়োজন হয়, তেন্তে চিকিৎসকৰ পৰামৰ্শমতে মৃদু, pH-সামঞ্জস্যযুক্ত আৰু সুগন্ধিবিহীন ইণ্টিমেট ৱাশ্ব ব্যৱহাৰ কৰিব পাৰি। ঋতুস্ৰাৱৰ সময়ত নিয়মীয়াকৈ গা ধোৱাটো সম্পূৰ্ণ সুৰক্ষিত আৰু উপকাৰী। বিশেষকৈ কুহুমীয়া গৰম পানীৰে গা ধুলে পেশীৰ টান কমে, পেটৰ বিষ উপশম হয়, ৰক্ত সঞ্চালন উন্নত হয়, মানসিক চাপ আৰু ক্লান্তি হ্ৰাস পায় আৰু মন-মেজাজো ভাল থাকে।

ছেনিটাৰী পেড সাধাৰণতে প্ৰতি ৪-৬ ঘণ্টাৰ মূৰে সলনি কৰিব লাগে। যদি ৰক্তস্ৰাৱ বেছি হয়, তেন্তে ইয়াতকৈ আগতেই সলনি কৰাটো প্ৰয়োজন। ৰক্তস্ৰাৱ কম হ’লেও দীৰ্ঘ সময় একেটা পেড ব্যৱহাৰ কৰা উচিত নহয়, কাৰণ পেডত আর্দ্ৰতা আৰু ঘাম জমা হৈ বেক্টেৰিয়া বৃদ্ধি পাব পাৰে। ৰাতি শুবলৈ যোৱাৰ আগতে সদায় নতুন পেড ব্যৱহাৰ কৰিব লাগে আৰু পুৱা উঠিয়েই সলনি কৰিব লাগে। সাধাৰণতে ৬-৮ ঘণ্টাৰ অধিক একেটা পেড ব্যৱহাৰ নকৰাই ভাল। পেড বাছনি কৰাৰ সময়ত নিজৰ ৰক্তস্ৰাৱৰ পৰিমাণ, দৈনন্দিন কাৰ্যকলাপ আৰু ছালৰ সংবেদনশীলতাৰ কথা বিবেচনা কৰিব লাগে। সুগন্ধিযুক্ত পেড পৰিহাৰ কৰা উচিত কাৰণ ইয়াৰ ৰাসায়নিক পদাৰ্থই ছালত এলাৰ্জি, ৰেছ, জ্বলা-পোৰা আৰু চুলকনিৰ সৃষ্টি কৰিব পাৰে। ঋতুস্ৰাৱৰ সময়ত ৰেছ হোৱা এক সাধাৰণ সমস্যা। দীৰ্ঘ সময় ধৰি ভিজা পেড পিন্ধি থকা, অধিক আর্দ্ৰতা, টান কাপোৰ পিন্ধা আৰু সুগন্ধিযুক্ত পেড ব্যৱহাৰ কৰাৰ ফলত এনে সমস্যা দেখা দিব পাৰে। ইয়াৰ পৰা বাচিবলৈ সময়মতে পেড সলনি কৰা, গোপন অংগ শুকান আৰু পৰিষ্কাৰ কৰি ৰখা, কোমল পেড ব্যৱহাৰ কৰা, ঢিলা কপাহী কাপোৰ পিন্ধা আৰু চিকিৎসকৰ পৰামৰ্শমতে প্ৰয়োজন হ’লে বেৰিয়াৰ ক্ৰীম ব্যৱহাৰ কৰিব পাৰি। যদি ৰেছ বহুদিন ধৰি নাযায়, ছালত ঘা হয়, অস্বাভাৱিক স্ৰাৱ বা দুৰ্গন্ধ হয়, অত্যধিক ৰক্তস্ৰাৱ বা অসহ্য বিষ হয় অথবা জ্বৰ, মূৰ ঘূৰোৱা বা অত্যধিক দুৰ্বলতা অনুভৱ হয়, তেন্তে বিলম্ব নকৰি চিকিৎসকৰ ওচৰ চাপিব লাগে।

ব্যৱহৃত পেড কেতিয়াও টয়লেটত ফ্লাছ কৰা উচিত নহয়। পেডখন ভিতৰফালে ভাঁজ কৰি কাগজ বা পেডৰ ৰেপাৰেৰে মেৰিয়াই ঢাকনি থকা ডাষ্টবিনত পেলাব লাগে। সম্ভৱ হ’লে পৰিৱেশ বান্ধৱ বায়’ডিগ্ৰেডেবল পেড বা মেন্স্ট্ৰুৱেল কাপ ব্যৱহাৰ কৰিব পাৰি। অফিচ বা ভ্ৰমণৰ সময়ত সদায় এটা জৰুৰী ঋতুস্ৰাৱ কিট লগত ৰখা ভাল। ইয়াত ছেনিটাৰী পেড বা টেম্পন, পে*ণ্টি লাইনাৰ, সুগন্ধিবিহীন ৱেট ৱাইপছ, টিছ্যু পেপাৰ, ডিস্প’জেল বেগ, হেণ্ড ছেনিটাইজাৰ, অতিৰিক্ত অন্ত*ৰ্বাস, মৃদু ইণ্টিমেট ৱাশ্ব আৰু চিকিৎসকৰ পৰামৰ্শমতে প্ৰয়োজনীয় বিষনাশক ঔষধ ৰাখিব পাৰে। ৰাজহুৱা শৌচাগাৰ ব্যৱহাৰ কৰাৰ সময়ত টয়লেট ছিট কভাৰ বা টিছ্যু ব্যৱহাৰ কৰা, অপৰিষ্কাৰ বা ভিজা ছিট পৰিহাৰ কৰা, পেড সলনি কৰাৰ আগতে আৰু পিছত হাত ভালদৰে ধোৱা আৰু ব্যৱহৃত পেড ভালদৰে মেৰিয়াই ডাষ্টবিনত পেলোৱাটো অতি প্ৰয়োজনীয়।

ঋতুস্ৰাৱক লৈ সমাজত বহু ভ্ৰান্ত ধাৰণা আছে। ঋতুস্ৰাৱৰ সময়ত চুলি ধোৱাটো সম্পূৰ্ণ নিৰাপদ। কেৱল অত্যধিক ঠাণ্ডা পানী ব্যৱহাৰ নকৰাই ভাল। এই সময়ত আচাৰ চুলে আচাৰ নষ্ট হয় বুলিও কোনো বৈজ্ঞানিক ভিত্তি নাই। তদুপৰি ঋতুস্ৰাৱৰ সময়ত ব্যায়াম সম্পূৰ্ণ বন্ধ কৰিব নালাগে। খোজ কঢ়া, ষ্ট্ৰেচিঙে ৰক্ত সঞ্চালন উন্নত কৰে, শৰীৰত এণ্ড’ৰফিন নিঃসৰণ বৃদ্ধি কৰে আৰু ফলত পেটৰ বিষ, ক্লান্তি আৰু মন-মেজাজৰ ওঠা-নমা যথেষ্ট কমাই আনিব পাৰে।

চিকিৎসা বিশেষজ্ঞৰ বিভিন্ন তথ্যৰ সহায়ত এই প্ৰতিবেদন যুগুতাইছে মানসজ্যোতিয়ে