এবাৰ দুবাৰ নহয়, IAS হোৱাৰ বাবে ৭ বাৰকৈ সলাইছিল নাম, এতিয়া UPSCৰ নিষিদ্ধ ঘোষণা
কেন্দ্ৰীয় লোকসেৱা আয়োগ অৰ্থাৎ ইউ পি এছ চিৰ দ্বাৰা পৰিচালিত কোনো পৰীক্ষাত অৱতীৰ্ণ হ’ব নোৱাৰিব এগৰাকী বিতৰ্কিত প্ৰাক্তন আই এ এছ বিষয়া। এইগৰাকী প্ৰাক্তন আই এ এছ বিষয়াৰ বিৰুদ্ধে ২০১২ চনৰ পৰা ২০২৩ চনৰ ভিতৰত অসামৰিক সেৱাৰ পৰীক্ষাত অৱতীৰ্ণ হোৱাৰ বাবে এবাৰ-দুবাৰ নহয় মুঠ ৭ বাৰ পৰিচয় সলনি কৰাৰ অভিযোগ।
ইয়াৰ উপৰিও এইগৰাকী প্ৰাক্তন বিষয়াৰ বিৰুদ্ধে প্ৰতাৰণা আৰু প্ৰৱঞ্চনাৰ অভিযোগো উত্থাপন হৈছে। হয়, নিশ্চয় বুজি পাইছে যে ইয়াত পূজা খেডকাৰৰ কথা কোৱা হৈছে। এতিয়া পূজা খেডকাৰ আজীৱন UPSCৰ নিষিদ্ধ তালিকাত।
১ আগষ্ট বৃহস্পতিবাৰে দিল্লীৰ পাটিয়ালা হাউছ কোৰ্টত দিল্লী আৰক্ষীয়ে ৰেকৰ্ডত লিপিবদ্ধ হোৱা অনিয়মৰ বিষয়ে অৱগত কৰে যিবোৰ পূজা খেডকাৰে ইউ পি এছ চি পৰীক্ষাৰ বাবে সংঘটিত কৰিছিল। সাধাৰণ শ্ৰেণী (জেনেৰেল)ৰ পৰীক্ষাৰ্থীয়ে অসামৰিক সেৱাৰ পৰীক্ষাত অৱতীৰ্ণ হোৱাৰ ৬ টা সুযোগ পায়।
কিন্তু অধিক সুযোগ পাবলৈ খেডকাৰে নিজৰ পৰিচয় নকল কৰি অ’বিচি (অন্য পিছপৰা শ্ৰেণী)ৰ বুলি দাবী কৰাৰ লগতে শাৰীৰিক অক্ষমতাৰ কথাও মিছা কথা কয়।
পূজা খেডকাৰৰ প্ৰৱঞ্চনাৰ কাহিনী আৰম্ভ হৈছিল ২০১২ চনৰ অসামৰিক সেৱা পৰীক্ষাৰ পৰা। এই পৰীক্ষাৰ বাবে কৰা আবেদনত পূজাই নিজৰ নামটো ক্ৰছ কৰি খেডকৰ পূজা দিলীপৰাও বুলি লিখিছিল। লগতে পিতৃৰ নাম খেদকাৰ দিলীপৰাও কণ্ডিবা আৰু মাতৃৰ নামৰ নাম খেদকাৰ মনোৰমা দিলীপৰাও বুলি লিখিছিল।
সেইই আবেদনত তেওঁ PwBD অৰ্থাৎ বেঞ্চমাৰ্ক অক্ষমতা থকা ব্যক্তি শ্ৰেণীত থকাৰ কথা উল্লেখ কৰা নাছিল। উল্লেখ্য যে, পূজা খেডকাৰৰ পিতৃৰ প্ৰকৃত নাম দিলীপ খেদকাৰ। তেওঁ মহাৰাষ্ট্ৰ চৰকাৰৰ প্ৰাক্তন বিষয়া আৰু তেওঁৰ সম্পত্তিৰ মূল্য প্ৰায় ৪০ কোটি টকা। মাতৃৰ প্ৰকৃত নাম মনোৰমা খেডকাৰ।
২০১৮ চনত পূজা খেডকাৰে পুনৰ অসামৰিক সেৱা পৰীক্ষাৰ বাবে আবেদন কৰিছিল আৰু সেইবাৰ নাম সলনি কৰি পূজা দিলীপ খেডকাৰ কৰিছিল। এইবাৰ তেওঁ পিতৃৰ নাম দিলীপ কণ্ডিবা আৰু মাতৃৰ নাম সলনি কৰি বুধৱন্ত মনোৰমা জগন্নাথ কৰে। লগতে নিজকে PwBD শিতানত থকাৰ কথা উল্লেখ কৰি অন্ধতা আৰু দুৰ্বল দৃষ্টিশক্তিৰ অক্ষমতা বুলি উল্লেখ কৰে। তেনেদৰে ২০১৯ চন, ২০২০, ২০২১ , ২০২২ আৰু ২০২৩ চনৰ মুঠ ৭ টা পৰীক্ষাত নিজৰ লগতে পিতৃ-মাতৃৰো নাম সলনি কৰি আহিছিল।
জুলাই মাহত দিল্লী আৰক্ষীৰ অপৰাধ শাখাই পূজা খেডকাৰৰ বিৰুদ্ধে অসামৰিক সেৱাৰ পৰীক্ষাত পৰীক্ষাৰ্থী হোৱাৰ বাবে অক্ষমতা আৰু অ’বিচি কোটাৰ অপব্যৱহাৰৰ গোচৰ ৰুজু কৰিছিল। যোৱা বুধবাৰে ইউ পি এছ চিয়ে পূজা খেডকাৰৰ অস্থায়ী প্ৰাৰ্থীত্ব বাতিল কৰাৰ লগতে ভৱিষ্যতৰ সকলো পৰীক্ষাৰ পৰা স্থায়ীভাৱে নিষেধাজ্ঞা আৰোপ কৰে।
ইউ পি এছ চিয়ে কয় যে , ২০০৯ চনৰ পৰা ২০২৩ চনৰ ভিতৰত অৱশেষত অসামৰিক সেৱাৰ পৰীক্ষাৰ বাবে পৰামৰ্শ দিয়া ১৫ হাজাৰতকৈ অধিক পৰীক্ষাৰ্থীৰ উপলব্ধ তথ্য পৰীক্ষা কৰা হৈছে। এই তদন্তৰ শেষত পুজাৰ সকলোত বাস্তৱতা ওলাই পৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
