বৰ্তমান তেওঁ ভাৰতৰেই কোনো গোপন স্থানত আশ্ৰয় গ্ৰহণ কৰি আছে৷ তেওঁৰ পৰবৰ্তী গন্তব্য কি হ’ব সেই বিষয়টো লৈ অব্যাহত আছে জল্পনা-কল্পনা৷ বিশ্ব কূটনৈতিক মহলতো হাছিনাৰ আশ্ৰয়ক লৈয়েই চলিছে চৰ্চা৷ কেইবাটাও অসমৰ্থিত সূত্ৰৰ দাবী, বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই ব্ৰিটেইনৰ ওচৰত ৰাজনৈতিক আশ্ৰয় বিচাৰিছে৷ কিন্তু এতিয়াও সেই দেশে তেওঁক কোনো সেউজ সংকেত দিয়া নাই৷ ইফালে হাছিনাৰ পুত্ৰ ছাজিব ৱাজিদ জয়ৰ দাবী, তেওঁৰ মাতৃয়ে কোনো দেশতেই আশ্ৰয় বিচৰা নাই৷
হাছিনাৰ আশ্ৰয় বিচৰাক লৈ একাধিক জল্পনা তৈয়াৰ হৈছে৷ কিছু সূত্ৰৰ দাবী যে, বাংলাদেশৰ প্ৰাক্তন প্ৰধানমন্ত্ৰী ব্ৰিটেইন যাব পাৰে৷ আকৌ এক সূত্ৰৰ দাবী, হাছিনাৰ আমেৰিকা যোৱাৰো পথ বন্ধ হৈছে৷ আমেৰিকাই তেওঁৰ ভিছা প্ৰত্যাহাৰ কৰিছে৷ আনকি ফিনলেণ্ডসহ বহু কেইখন দেশৰ নামো এই আলোচনাৰ আওঁতাত আহিছে৷ সকলোবোৰ ভাইৰেল খবৰক মিছা প্ৰমাণিত কৰি এন ডিটিভিৰ সন্মুখত দিয়া এক সাক্ষাৎকাৰত হাছিনা পুত্ৰ জয়ে কয়, ‘মাৰ আশ্ৰয়ৰ অনুৰোধ সম্পৰ্কিত যিসমূহ প্ৰতিবেদন প্ৰকাশিত হৈছে সেয়া সম্পূৰ্ণ ভুল৷ তেওঁ কতো আশ্ৰয়ৰ বাবে অনুৰোধ কৰা নাই৷ ব্ৰিটেইন আমেৰিকাই তেওঁৰ আশ্ৰয়ৰ অনুৰোধ প্ৰত্যাখ্যান কৰা বিষয়টো মিছা৷’ জয়ে লগতে দাবী কৰে যে, তেওঁৰ মাতৃৰ আশ্ৰয়ক লৈ আমেৰিকাৰ সৈতে কোনোধৰণৰ আলোচনা হোৱা নাই৷
হাছিনা আৰু ৰাজনীতিত থাকিব নে নাথাকে সেই বিষয়ে প্ৰথমেই জনাইছিল পুত্ৰ জয়ে৷ লেথাৰিকৈ হৈ থকা আন্দোলনৰ চাপত প্ৰধানমন্ত্ৰী পদৰ পৰা ইস্তাফা আৰু দেশ এৰাৰ পাছতেই হাছিনাৰ ৰাজনৈতিক ভৱিষ্যতক লৈ জল্পনা আৰম্ভ হৈছিল৷ সেই প্ৰসংগত এক সাক্ষাৎকাৰত জয়ে দাবী কৰে যে, তেওঁৰ মাতৃ আৰু ৰাজনীতিত উভতি নাহে৷ ইমান পৰিশ্ৰম কৰাৰ পাছতো যেনেকৈ তেওঁৰ বিৰুদ্ধে আন্দোলন হ’ল তাতেই হাছিনা অত্যন্ত হতাশ হৈছে৷
জয়ে লগতে কয়, হাছিনাই এতিয়া আৰু পৰিয়ালৰ সৈতে সময় কটোৱাৰহে পৰিকল্পনা কৰিছে৷ কিন্ত ক’ত কেনেকৈ তেওঁ থাকিব সেই কথা এতিয়াও স্থিৰ হোৱা নাই৷ হাছিনা পুত্ৰই লগতে কয়, ‘মই এতিয়া ৱাছিংটনত আছো৷ মোৰ ভণ্টী আছে লণ্ডনত৷ পেহীও লণ্ডনত থাকে৷ সেয়ে মই এতিয়াও ক’ব নোৱাৰো মা কোন দেশত থাকিব৷’
সোমবাৰে দুপৰীয়া ভনীয়েক ৰেহানাক লৈ ঢাকাৰ বাসভৱন তথা ‘গণভৱন’ এৰিছিল হাছিনাই৷ সন্ধিয়া তেওঁ ভাৰতত উপস্থিত হৈছিল৷ দিল্লীৰ কাষৰ উত্তৰপ্ৰদেশৰ গাজিয়াবাদ হিণ্ডন বিমানঘাঁটীত নামিছিল হাছিনাৰ বিমান৷ তাৰপাছতেই তেওঁ নিশাই ভাৰতৰ জাতীয় নিৰাপত্তা উপদেষ্টা অজিত ডোভালক দেখা কৰে৷ বাংলাদেশৰ সদ্য প্ৰাক্তন প্রধানমন্ত্ৰীয়ে ভাৰতৰ ওচৰত আশ্ৰয় বিচাৰিব বুলি পূৰ্বেই জ্ঞাত আছিল ভাৰত৷ ভাৰতৰ পৰাহে তেওঁ পৰবৰ্তী গন্তব্য স্থানৰ কথা চিন্তা কৰিব৷ ভাৰতৰ বিদেশমন্ত্ৰী এছ জয়শংকৰে এই সন্দৰ্ভত কয়, ‘খুব কম সময়ৰ নটিছত ভাৰত আহিবলৈ আৰ্জি জনাইছিল হাছিনাই৷ ভাৰতে সেই অনুমতি দিয়াৰ পাছত ভনীয়েক শ্বেখ ৰেহানাক লগত লৈ ভাৰতৰ মাটিত ভৰি থৈছে হাছিনাই৷ কিন্তু হাছিনা বা বাংলাদেশৰ পৰিস্থিতিক লৈ ভাৰতৰ ভৱিষ্যৎ পৰিকল্পনা কি? সেই কথা এতিয়াও জনোৱা নাই জয়শংকৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
