ইংলেণ্ডত T20 বিশ্বকাপ খেলি থকাৰ সময়তে, ভাৰতীয় মহিলা ক্ৰিকেট দলৰ উপ অধিনায়ক স্মৃতি মান্ধানাই লাভ কৰিছে এক অনবদ্য স্বীকৃতি। যি স্বীকৃতি বিগত বৰ্ষত ক্ৰীড়াক্ষেত্ৰৰ প্ৰদৰ্শন, সামাজিক জীৱন আৰু ক্ৰীড়া অনুৰাগীৰ ওপৰত খেলুৱৈগৰাকীৰ প্ৰভাৱৰ ওপৰত দিয়া হৈছে। বিশ্বৰ প্ৰতিটো খেলৰ লগত জড়িত আগশাৰীৰ খেলুৱৈসকল, প্ৰশিক্ষক, ক্ৰীড়া সংগঠক, ক্ৰীড়াৰ লগত জড়িত ব্যৱসায়ী আদিৰ ওপৰত কৰা বিভিন্ন ক্ষেত্ৰৰ গৱেষণাৰ অন্তত দিয়া হৈছে এই স্বীকৃতি। স্মৃতি মন্ধানাৰ সৈতে এই বৰ্ষত কেৱল দুগৰাকী ক্ৰিকেটাৰেই এই কৃতিত্ব বা স্বীকৃতি লাভ কৰিবলৈ সক্ষম হৈছে। মান্ধানাৰ উপৰিও আনগৰাকী ক্ৰিকেটাৰৰ নাম শুনিলে অৱশ্যে আপুনি আচৰিতো হ’ব পাৰে।
মেছি-ৰোনাল্ডোৰ সৈতে একেলগে তালিকাত নাম স্মৃতি মান্ধানাৰ
ভাৰতীয় মহিলা ক্ৰিকেট দলৰ উপ-অধিনায়ক স্মৃতি মান্ধানাক বিখ্যাত টাইম আলোচনীয়ে ২০২৬ চনৰ ক্ৰীড়া জগতৰ ১০০ গৰাকী আটাইতকৈ প্ৰভাৱশালী ব্যক্তিত্বৰ তালিকাত অন্তৰ্ভুক্ত কৰিছে। বিগত বৰ্ষত এই সন্মান লাভ কৰা তেওঁ একমাত্ৰ ভাৰতীয় ক্ৰীড়াবিদ। এই তালিকাত আমেৰিকাৰ বাস্কেটবল কিংবদন্তি লেব্ৰন জেমছ, ফুটবল তাৰকা লিঅ’নেল মেছি আৰু ক্ৰিষ্টিয়ানো ৰোনাল্ডো, টেনিছ তাৰকা কাৰ্লোছ আলকাৰাজ, চীনা-আমেৰিকান স্কিয়াৰ এলিন গু, বাস্কেটবল খেলুৱৈ ভিক্টৰ ৱেম্বানিয়ামা আৰু গ’ল্ফ তাৰকা ৰ’ৰি মেকইলৰয়ৰ দৰে বিশ্বখ্যাত ক্ৰীড়াবিদসকলৰ নামো অন্তৰ্ভুক্ত আছে। সেই একেই মৰ্যাদাপূৰ্ণ তালিকাত স্থান লাভ কৰিছে ২৯ বছৰীয়া স্মৃতি মান্ধানাই। বিখ্যাত টাইম আলোচনীয়ে স্মৃতিৰ সাফল্যৰ বিষয়ে উল্লেখ কৰি লিখিছে যে, তেওঁ এদিনীয়া ক্ৰিকেটত দ্বিশতক অৰ্জন কৰা প্ৰথমগৰাকী ভাৰতীয় মহিলা ক্ৰিকেটাৰ। লগতে, আন্তঃৰাষ্ট্ৰীয় ক্ৰিকেটৰ তিনিওটা ফৰ্মেটতে শতক অৰ্জন কৰা প্ৰথমগৰাকী মহিলা খেলুৱৈ হিচাপেও তেওঁ ইতিহাস গঢ়িছে। ১৭টা আন্তঃৰাষ্ট্ৰীয় শতকৰ সৈতে তেওঁ মহিলা ক্ৰিকেটত সৰ্বাধিক শতকৰ যৌথ অভিলেখৰ অধিকাৰী।
ধাৰাবাহিক সাফল্যৰে উজলি উঠা স্মৃতিৰ কেৰিয়াৰ
মান্ধানাৰ নেতৃত্বত ৰয়েল চেলেঞ্জাৰ্ছ বেংগালুৰুয়ে ২০২৪ আৰু ২০২৬ চনত উইমেন্স প্ৰিমিয়াৰ লীগ (WPL)ৰ খিতাপ জয় কৰে। ইয়াৰ উপৰিও, ICC মহিলা বিশ্বকাপ জয়ী ভাৰতীয় দলৰ উপ-অধিনায়ক হিচাপে গুৰুত্বপূৰ্ণ ভূমিকা পালন কৰিছিল তেওঁ। প্ৰতিযোগিতাখনত তেওঁ দ্বিতীয় সৰ্বাধিক ৰান সংগ্ৰহ কৰিছিল। ২০২৪ চনত স্মৃতি মান্ধানাই এটা বছৰত সৰ্বাধিক আন্তঃৰাষ্ট্ৰীয় ৰান সংগ্ৰহ কৰা মহিলা ক্ৰিকেটাৰ হৈছিল। উল্লেখযোগ্য যে, তাৰ পিছৰ বছৰত তেওঁ নিজৰেই সেই অভিলেখ ভংগ কৰি নতুন মাইলৰ খুঁটি স্থাপন কৰে।
তালিকাত থকা আনজন ক্ৰিকেটাৰ কোন?
টাইমৰ এই বিশেষ তালিকাত মুঠ দুজন ক্ৰিকেটাৰে স্থান লাভ কৰিছে। স্মৃতি মন্ধানাৰ লগতে স্থান পাইছে দক্ষিণ আফ্ৰিকাৰ অধিনায়ক টেম্বা বাবুমাই। বাবুমাৰ নেতৃত্বত দক্ষিণ আফ্ৰিকাই অষ্ট্ৰেলিয়াক পৰাস্ত কৰি ICC বিশ্ব টেষ্ট চেম্পিয়নশ্বিপ (WTC) খিতাপ জয় কৰিছিল। বহু বছৰ ধৰি ‘চ’কাৰ্ছ’ অপবাদ মূৰত পাতি লোৱা দক্ষিণ আফ্ৰিকাৰ ওপৰত থকা ব্যৰ্থতাৰ কলংক বাবুমাৰ নেতৃত্বতে আঁতৰাই দলটোক ঐতিহাসিক জয় উপহাৰ দিয়ে।
স্মৃতি মন্ধানাৰ এই সাফল্য ভাৰতীয় মহিলা ক্ৰিকেটৰ বাবে এক গৌৰৱৰ মুহূৰ্ত। বিশ্ব ক্ৰীড়া মঞ্চত ভাৰতীয় মহিলা ক্ৰিকেটৰ শক্তিশালী উপস্থিতিৰ আন এক উজ্জ্বল স্বীকৃতি হিচাপে এই সন্মানক নিসন্দেহে গণ্য কৰিব পাৰি।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
