দেশী বুট আমাৰ দৈনন্দিন খাদ্যত সহজে উপলব্ধ, সস্তা আৰু অতি পুষ্টিকৰ খাদ্য। ইয়াত প্ৰচুৰ পৰিমাণে প্ৰটিন, ফাইবাৰ, আয়ৰন, কেলচিয়াম, মেগনেছিয়াম, জিংক, পটাছিয়াম, ফলেট আদি বহু প্ৰয়োজনীয় ভিটামিন আৰু খনিজ পদাৰ্থ থাকে। এই পুষ্টি উপাদানসমূহে শৰীৰক সুস্থ, সবল আৰু শক্তিশালী কৰি ৰাখিবলৈ গুৰুত্বপূৰ্ণ ভূমিকা পালন কৰে। বিশেষজ্ঞসকলে নিয়মিতভাৱে খাদ্য তালিকাত বুট অন্তৰ্ভুক্ত কৰিবলৈ পৰামৰ্শ দিয়ে। গৱেষণাৰ তথ্য অনুসৰি, বুটত থকা ফাইবাৰ, প্ৰটিন আৰু বিভিন্ন জৈৱ-সক্ৰিয় (Bioactive) উপাদানে ডায়বেটিছ, হৃদৰোগ আদি অসংক্ৰামক ৰোগৰ সম্ভাৱনা হ্ৰাস কৰাত সহায় কৰে। ইয়াৰ গ্লাইচেমিক সূচক (Glycemic Index) কম হোৱাৰ বাবে ই তে*জত চেনিৰ পৰিমাণ হঠাতে বৃদ্ধি হ’ব নিদিয়ে। সেয়েহে ডায়েবেটিছ ৰোগীৰ বাবেও বুট উপযুক্ত খাদ্য হিচাপে গণ্য কৰা হয়। বুটৰ আন এক বিশেষ গুণ হ’ল, ইয়াত থকা ফাইবাৰ আৰু প্ৰটিনে পেট দীঘলীয়া সময়লৈকে ভৰ্তি কৰি ৰাখে। ফলস্বৰূপে বাৰে বাৰে ভোক নালাগে আৰু অধিক খাদ্য গ্ৰহণ কৰাৰ প্ৰৱণতা কমে। যিসকলে ওজন নিয়ন্ত্ৰণ কৰিব বিচাৰে, তেওঁলোকৰ বাবে দেশী বুট অতি উপযোগী খাদ্য।
দেশী বুটৰ কেইটামান উপকাৰী গুণ
পাচনতন্ত্ৰ সুস্থ ৰাখিবলৈও বুটৰ ভূমিকা যথেষ্ট গুৰুত্বপূৰ্ণ। ইয়াত থকা ফাইবাৰে অন্ত্ৰৰ কাৰ্যক্ষমতা উন্নত কৰে, কোষ্ঠকাঠিন্যৰ সমস্যা হ্ৰাস কৰে আৰু গাট হেল্থ উন্নত কৰে। লগতে ইয়াত থকা পটাছিয়াম আৰু মেগনেছিয়ামে ৰক্তচাপ আৰু ক’লেষ্টেৰ’ল নিয়ন্ত্ৰণত সহায় কৰি হৃদযন্ত্ৰক সুস্থ ৰাখে। বুটত প্ৰচুৰ পৰিমাণে আইৰন আৰু ফলেট থাকে, যিয়ে শৰীৰত লোহিত ৰক্তকণিকা (Red Blood Cells) উৎপাদনত সহায় কৰে। ফলত নিয়মিত বুট খালে ৰক্তহীনতা (এনিমিয়া) হোৱাৰ সম্ভাৱনা হ্ৰাস পায়। ইয়াৰ উপৰি, উদ্ভিদজাত প্ৰটিনৰ উৎকৃষ্ট উৎস হিচাপে বুটে পেশী (Muscles) গঠন আৰু ক্ষতিগ্ৰস্ত পেশীৰ পুনৰুদ্ধাৰত সহায় কৰে। কেলচিয়াম, ফছফৰাছ আৰু মেগনেছিয়ামে হাড় আৰু দাঁত মজবুত কৰি ৰাখিবলৈও গুৰুত্বপূৰ্ণ ভূমিকা পালন কৰে।
দেশী বুটক কেনেকৈ খাদ্যৰ তালিকাত অন্তৰ্ভুক্ত কৰিব
বুট বিভিন্ন ধৰণে খাদ্য তালিকাত অন্তৰ্ভুক্ত কৰিব পাৰি। ৰাতি তিয়াই থোৱা বুট পুৱা জলপান হিচাপে খাব পাৰি। বুটৰ লগত পিয়াঁজ, বিলাহী, নেমু আৰু ধনীয়া পাত মিহলাই পুষ্টিকৰ ছালাড প্ৰস্তুত কৰিব পাৰি। উতলাই লোৱা বুটেৰে স্বাস্থ্যকৰ চাট, তৰকাৰী, চুপ, পুলাও বনাব পাৰি। ইয়াৰ উপৰি ভজা বুট পুষ্টিকৰ জলপান হিচাপে গ্ৰহণ কৰিব পাৰি। বুটক অংকুৰিত (Sprouted) কৰি খালেও অধিক উপকাৰ পোৱা যায়, কিয়নো অংকুৰিত অৱস্থাত কিছুমান ভিটামিন আৰু এণ্টিঅক্সিডেণ্টৰ পৰিমাণ বৃদ্ধি পায় আৰু পুষ্টি উপাদান সহজে শৰীৰে গ্ৰহণ কৰিব পাৰে। আনহাতে, উতলা বুট সহজে হজম হয় আৰু যিসকলৰ গেছ বা পাচনজনিত সমস্যা আছে, তেওঁলোকৰ বাবে অধিক উপযোগী।
দেশী বুট খোৱাৰ সময়ত ল’বলগীয়া সাৱধানতা
যদিও দেশী বুট স্বাস্থ্যকৰ খাদ্য, তথাপিও অত্যাধিক পৰিমাণে খালে গেছ, পেট ফুলা, বদহজম আৰু পেটৰ বিষৰ দৰে সমস্যা হ’ব পাৰে। সেয়েহে পৰিমিত পৰিমাণে খোৱাৰ লগতে যথেষ্ট পানী পান কৰাটোও প্ৰয়োজনীয়। সাধাৰণতে এজন সুস্থ প্ৰাপ্তবয়স্ক ব্যক্তিয়ে প্ৰতিদিনে ৩০ৰ পৰা ৫০ গ্ৰাম শুকান বুট (তিয়াব বা সিজোৱাৰ আগৰ ওজন) খোৱাটো নিৰাপদ বুলি ধৰা হয়। সিজোৱাৰ পিছত এই পৰিমাণ প্ৰায় আধা কাপৰ পৰা এক কাপৰ সমান হয়। কিছুমান বিশেষ স্বাস্থ্য সমস্যাত ভুগি থকা ব্যক্তিয়ে, বিশেষকৈ যিসকলৰ পাচনতন্ত্ৰৰ জটিলতা বা আন বিশেষ ৰোগ আছে, তেওঁলোকে বুট খোৱাৰ আগতে চিকিৎসক বা পুষ্টিবিদৰ পৰামৰ্শ লোৱাটো উচিত। সামগ্ৰিকভাৱে দেশী বুট হৈছে এক সস্তা অথচ অত্যন্ত পুষ্টিকৰ সুপাৰফুড। ইয়াৰ নিয়মিত আৰু পৰিমিত সেৱনে শৰীৰক প্ৰয়োজনীয় পুষ্টি যোগান ধৰাৰ লগতে ডায়বেটিছ, হৃদৰোগ, ৰক্তহীনতা আদি বহু সমস্যাৰ সম্ভাৱনা হ্ৰাস কৰাত সহায় কৰে। সেয়েহে সুস্থ জীৱনশৈলী গঢ়ি তুলিবলৈ দৈনন্দিন খাদ্য তালিকাত দেশী বুটক স্থান দিয়াটো এক বুদ্ধিমান আৰু স্বাস্থ্যসম্মত সিদ্ধান্ত।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
