নিষ্ঠুৰতাৰ সীমা অতিক্ৰম, মহিলাৰ সৈতে কৰা দুষ্কৰ্মৰ প্ৰতিবাদ কৰাত গাঁওবাসীৰ ওপৰত নিৰ্বিচাৰ আক্ৰমণ, ৮৫ গৰাকী নিহত
আফ্ৰিকাৰ দেশ চুডানৰ এখন গাঁও ৰক্তাক্ত হৈ পৰিছে। এক জঘন্য ঘটনাৰ সাক্ষী হৈ পৰিছে। যি ঘটনাৰ ওপৰত ধিক্কাৰ দিছে সমগ্ৰ বিশ্বই। চুডান অৰ্ধসামৰিক গোটৰ যোদ্ধাসকলে প্ৰথমে এখন গাঁও লুটপাত কৰি তাৰ পিছত জুই লগাই দিয়ে। এই আক্ৰমণত ৮৫ জন লোকৰ মৃত্যু হৈছে বুলি খবৰ পোৱা গৈছে।
মৃত্যু হোৱাসকলৰ ভিতৰত নিৰীহ শিশু আৰু মহিলাও অন্তৰ্ভুক্ত আছে। এক সংবাদ সংস্থাৰ মতে, চুডানত ১৮ মাহ ধৰি চলি থকা সংঘাতৰ এইটোৱেই হৈছে শেহতীয়া আক্ৰমণ। ইয়াত যি ধৰণৰ ভয়াবহতা চলি আছে, সেই ঘটনাই সকলোৰে অন্তৰাত্মা পৰ্যন্ত কঁপাই তুলিছে।
জুলাই মাহৰ পৰা ‘ৰেপিড চাপৰ্ট ফ’ৰ্চ’ৰ যোদ্ধাসকলে গালগনি নামৰ এখন গাঁৱত অব্যাহত ৰাখিছে এই আক্ৰমণ। কিছুদিন পূৰ্বে চেন্নাৰ প্ৰদেশৰ এই গাঁৱত যোদ্ধাসকলে প্ৰৱেশ কৰি মহিলা আৰু শিশুক বলপূৰ্বকভাৱে ধৰ্ষণ কৰিবলৈ চেষ্টা কৰিছিল। যেতিয়া স্থানীয় ৰাইজে ইয়াৰ প্ৰতিবাদ কৰে, তেতিয়া নিৰস্ত্ৰ গাঁওবাসীৰ ওপৰত নিৰ্বিচাৰে গুলীচালনা কৰে সামৰিকবাহিনীয়ে।
চুডানৰ বৈদেশিক মন্ত্ৰালয়ে প্ৰকাশ কৰিছে যে এই আক্ৰমণত ১৫০ জনতকৈ অধিক গাঁৱৰ লোক আহত হৈছে। বিগত বৰ্ষৰ এপ্ৰিল মাহৰ পৰা সমগ্ৰ দেশতে আৰ এছ এফৰ যোদ্ধাসকলে গণহত্যা আৰু ধৰ্ষণৰ দৰে অপৰাধ সংঘটিত কৰিছে।
গাঁওখনত এই হত্যাকাণ্ড প্ৰত্যক্ষ কৰা তিনিজন লোকে জনোৱা মতে, তিনি ঘন্টা ধৰি আৰ এছ এফৰ যোদ্ধাসকলে আক্ৰমণ চলাইছিল। ঘৰ-দুৱাৰ, দোকান-পোহাৰ আৰু চৰকাৰী কাৰ্যালয় লুটপাত কৰি জ্বলাই দিয়ে যোদ্ধাসকলে। স্থানীয় চিকিৎসা কেন্দ্ৰত কৰ্মৰত এগৰাকী স্বাস্থ্যসেৱা কৰ্মীয়ে কয় যে প্ৰথম অৱস্থাত কম সংখ্যক যোদ্ধা আহিছিল, কিন্তু তাৰ পিছত যেতিয়া মানুহে প্ৰতিবাদ কৰিছিল তেতিয়া যোদ্ধাসকলে উভতি যায়। কিন্তু কেইঘণ্টামানৰ পাছত কেইবা ডজন পিকআপত উঠি শ শ আৰ এছ এফৰ যোদ্ধা গাঁৱত প্ৰৱেশ কৰি মানুহক নিৰ্বিচাৰে হত্যা কৰে।
উল্লেখ্য যে, চুডানত চলি থকা সংঘাতত এতিয়ালৈকে হাজাৰ হাজাৰ লোকৰ মৃত্যু হৈছে। দেশত অনাহাৰৰ পৰিস্থিতিও উদ্ভৱ হৈছে। অৰ্ধসামৰিক বাহিনী আৰু সেনাৰ সংঘাতৰ সময়ত বৃহৎ সংখ্যক মহিলাক ধৰ্ষণ কৰাৰ লগতে কিছুমান জনজাতীয় লোকক নিঃশেষ কৰাৰ চেষ্টা কৰা হৈছে। চুডানত সংঘাতৰ বাবে এক কোটিৰো অধিক লোকে ঘৰ এৰি পলায়ন কৰিবলগীয়া হৈছে। কেৱল এয়াই নহয় ২০ লাখৰো অধিক লোকে নিজৰ জীৱন ৰক্ষাৰ বাবে চুবুৰীয়া দেশত আশ্ৰয় লৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
