আফগানিস্তানৰ তালিবান চৰকাৰে নিজৰ সদস্য আৰু চৰকাৰী কৰ্মচাৰীসকলৰ বাবে স্মাৰ্টফোন ব্যৱহাৰত কঠোৰ নিষেধাজ্ঞা আৰোপ কৰিছে। আন্তঃৰাষ্ট্ৰীয় সংবাদ মাধ্যমৰ খবৰ অনুসৰি, তালিবানৰ সৰ্বোচ্চ নেতা হিবাতুল্লাহ আখুন্দজাদাৰ মৌখিক নিৰ্দেশৰ পিছতেই এই সিদ্ধান্ত গ্ৰহণ কৰা হৈছে। এক প্ৰতিবেদন অনুসৰি, এই নিৰ্দেশ অমান্য কৰা ব্যক্তিক ‘অপৰাধী’ হিচাপে গণ্য কৰা হ’ব পাৰে আৰু তেওঁলোকৰ বিৰুদ্ধে সামৰিক আদালতৰ জৰিয়তে ব্যৱস্থা গ্ৰহণ কৰা হ’ব পাৰে। কেৱল সেয়াই নহয়, তেনে লোকে চাকৰি হেৰুওৱাৰ লগতে অন্যান্য শাস্তিমূলক ব্যৱস্থাৰো সন্মুখীন হ’ব পাৰে।
কিয় এই নিষেধাজ্ঞা?
তালিবান প্ৰশাসনে দাবী কৰিছে যে সংগঠনৰ ভিতৰত শৃংখলা বজাই ৰখা, নিৰাপত্তা নিশ্চিত কৰা আৰু গুৰুত্বপূৰ্ণ তথ্য ফাদিল হোৱাটো ৰোধ কৰাৰ লক্ষ্যৰে এই পদক্ষেপ গ্ৰহণ কৰা হৈছে। এই নিষেধাজ্ঞা কঠোৰভাৱে কাৰ্যকৰী কৰিবলৈ বিভিন্ন প্ৰদেশৰ সামৰিক আদালত, আৰক্ষী বিশেষ নিৰ্দেশনা প্ৰেৰণ কৰা হৈছে। ইতিমধ্যে এই সিদ্ধান্তৰ পিছৰে পৰা বিভিন্ন অঞ্চলত ইয়াৰ প্ৰভাৱো দেখা গৈছে। কিছু তালিবান বিষয়ববীয়া আৰু নিৰাপত্তাৰক্ষীয়ে নিজৰ স্মাৰ্টফোনটো ধ্বংস কৰি পেলোৱাৰ খবৰ ওলাইছে। আনহাতে, বহু চৰকাৰী কাৰ্যালয়ত কৰ্মচাৰীসকলৰ পৰা স্মাৰ্টফোন জমা লোৱাৰ ঘটনাও পোহৰলৈ আহিছে। উল্লেখযোগ্য যে ডিজিটেল প্ৰযুক্তিৰ ওপৰত নিয়ন্ত্ৰণ আৰোপ কৰাৰ ক্ষেত্ৰত এয়া তালিবানৰ প্ৰথম পদক্ষেপ নহয়। ইয়াৰ পূৰ্বেও আফগানিস্তানৰ কিছুমান বিদ্যালয়ত শিক্ষক-শিক্ষাৰ্থীৰ বাবে স্মাৰ্টফোন ব্যৱহাৰত নিষেধাজ্ঞা আৰোপ কৰা হৈছিল। লগতে সামাজিক মাধ্যম আৰু ইণ্টাৰনেট ব্যৱহাৰৰ ওপৰতো বিভিন্ন সময়ত কঠোৰ নিয়ন্ত্ৰণ আৰোপ কৰাৰ চেষ্টা চলাই আহিছে তালিবান প্ৰশাসনে। বিশেষজ্ঞসকলৰ মতে, স্মাৰ্টফোনৰ ওপৰত এই নতুন নিষেধাজ্ঞাই আফগানিস্তানক বিশ্বৰ ডিজিটেল পৰিসৰৰ পৰা আৰু অধিক বিচ্ছিন্ন কৰি তুলিব পাৰে। লগতে তথ্য আদান-প্ৰদান আৰু যোগাযোগ ব্যৱস্থাতো ইয়াৰ নেতিবাচক প্ৰভাৱ পৰাৰ আশংকা প্ৰকাশ কৰা হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
