অসম লাইভ ২৪ঃ বিশ্ববিদ্যালয়ৰ অনুদান আয়োগ(UGC)এ উচ্চ শিক্ষানুষ্ঠানৰ শিক্ষক-শিক্ষাৰ্থী অনুপাতত এক বৃহৎ পৰিৱৰ্তন অনাৰ পৰিকল্পনা কৰিছে৷ প্ৰকাশিত খবৰ অনুসৰি UGCএ কলেজসমূহত শিক্ষাৰ্থীৰ অনুপাতে শিক্ষকৰ সংখ্যা হ্ৰাস কৰিব৷
ইতিমধ্যে UGCএ এই সম্পৰ্কীয় খচৰা প্ৰস্তুতো কৰি তুলিছে৷ খচৰাৰ মতে পেচাগত চুক্তিৰ ভিত্তিত বিভিন্ন শিক্ষক নিয়োগ কৰাৰ পৰিকল্পনা কৰা হৈছে৷ ইয়াৰ ফলত মহাবিদ্যালয় আৰু বিশ্ববিদ্যালয়ত শিক্ষক সংকোচন কৰা হ’ব বুলিও আশংকা কৰা হৈছে৷
উল্লেখ্য যে ২০০৮ চনত ইউপিএ চৰকাৰে শিক্ষক নিয়োগৰ ক্ষেত্ৰত অ’বিচিৰ বাবে ২৭ শতাংশ সংৰক্ষণ নীতি আৰম্ভ কৰাৰ পিছতে শিক্ষক-শিক্ষাৰ্থীৰ অনুপাত ১:১৮ কৰা হৈছিল৷ ইয়াৰ পিছৰে পৰা মহাবিদ্যালয়-বিশ্ববিদ্যালয়ত শিক্ষক-শিক্ষাৰ্থীৰ এই অনুপাতে চলি আহিছে৷ কিন্তু কেন্দ্ৰত এনডিএ চৰকাৰ থাকোতেই UGCএ এই নীতিৰ ব্যাপক পৰিৱৰ্তন কৰাৰ পৰিকল্পনা কৰিছে৷
সূত্ৰৰ মতে নতুন খচৰা নীতি অনুসৰি সমাজ বিজ্ঞান বিভাগসমূহত ১:৩০, বিজ্ঞান বিভাগসমূহত ১:২৫, বাণিজ্য আৰু বৃত্তিমূলক বিভাগসমূহত ১:৩০ শিক্ষক-শিক্ষাৰ্থীৰ নতুন অনুপাত নিৰ্ধাৰণ কৰা হ’ব৷ ইফালে গণমাধ্যম আৰু ফাৰ্মাছী বিভাগত এই অনুপাত ১:১৫ আৰু স্থাপত্য আৰু ডিজাইন পাঠ্যক্ৰমসমূহত ১:১০ কৰা হ’ব৷
ইতিমধ্যে সংশ্লিষ্ট বিভাগসমূহেৰে এই সন্দৰ্ভত যোগাযোগ কৰি মতামত গ্ৰহণ প্ৰায় সম্পূৰ্ণ হোৱাৰ পথত বুলিও জানিব পৰা গৈছে৷ সূত্ৰ অনুসৰি অহা ১১ ফেব্ৰুৱাৰিৰ ভিতৰত সংশ্লিষ্ট বিভাগসমূহে UGCক এই সন্দৰ্ভত মতামত জনাব লাগিব৷
ইফালে খচৰাৰ প্ৰস্তাৱ মতে বৃত্তিমুখী পাঠ্যক্ৰম, প্ৰফেশ্যনেল অথবা আৰ্টৰ সৈতে জড়িত ব্যক্তিক চুক্তিভিত্তিক বা অতিথি অধ্যাপকৰূপে নিমন্ত্ৰণ কৰা হ’ব৷ UGCএ শিক্ষা প্ৰতিষ্ঠান আৰু শিল্পৰ মাজত থকা ব্যৱধান হ্ৰাস কৰিবলৈ এই ব্যৱস্থা গ্ৰহণ কৰা বুলিও জানিব পৰা গৈছে৷
ইয়াৰ ফলত শিক্ষা প্ৰতিষ্ঠানসমূহত ফেকাল্টি ৫০ শতাংশ হ্ৰাস পালেও পেচাগত অথবা শিল্পৰ সৈতে জড়িত অধিক লোকে পঠন-পাঠনৰ যোগেদি কৰ্মসংস্থাপন লাভ কৰিব বুলি আশা কৰিছে UGCএ৷
UGCৰ এই নতুন খচৰাৰ বিষয়ে অৱগত হোৱাৰ পিছতে মহাবিদ্যালয়-বিশ্ববিদ্যালয়সমূহৰ শিক্ষক সংগঠনসমূহে প্ৰতিক্ৰিয়া প্ৰকাশ কৰা দেখা গৈছে৷ সংগঠনসমূহৰ মতে ব্যয় সংকোচনৰ এই নীতি প্ৰয়োগেৰে UGCএ শিক্ষকক চাকৰিৰ পৰা বিতাৰিত কৰিব পাৰে৷ শিক্ষক সংগঠনসমূহৰ মতে UGCৰ নতুন নীতিৰ ফলত বৃহৎসংখ্যক শিক্ষকে চাকৰি হেৰুওৱাৰ লগতে শিক্ষাৰ মানো হ্ৰাস পাব৷
ইয়াৰ ফলত শিক্ষকৰ শিক্ষণ(পাঠদান)ৰ হেঁচা বৃদ্ধি পোৱাৰ লগতে চাকৰিও অস্থায়ী হ’ব, যাৰফলত শিক্ষকৰ ভৱিষ্যৎ অনিশ্চিত হৈ পৰিব বুলিও আশংকা কৰিছে শিক্ষক সংগঠনসমূহে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
