অসম লাইভ২৪ঃ দেশত ডিজিটেল পেমেণ্টৰ জনপ্ৰিয়তা দিনকদিনে বৃদ্ধি হৈছে। মূলত UPIৰ প্ৰচলনৰ পাছৰে পৰাই অনলাইন লেনদেন বহু সহজ হৈ পৰিছে। UPI ৰে ঘৰত বহিয়েই টকা পঠিওৱা পদ্ধতি সহজ হৈ পৰিছে। আনকি নিৰ্দিষ্ট চৰ্তৰ ভিত্তিত অফলাইনেৰেও পেমেণ্ট কৰা সম্ভৱ। বিগত ৩-৪ বছৰ ধৰি দেশত UPI লেনদেনৰ হাৰ ব্যাপকৰূপত বৃদ্ধি পাইছে। সম্প্ৰতি ২০২৪ চনত UPIত কেইবাটাও সালসলনি হৈছে। জানি থওক UPI লেনদেনৰ সীমা কিমান বৃদ্ধি পাইছে?
নেশ্ব্যনেল পেমেণ্টছ কৰ্পৰেশ্ব্যন অফ ইণ্ডিয়া বা NPCIয়ে ১০ জানুৱাৰীৰ পৰা হাস্পতাল আৰু শিক্ষাক্ষেত্ৰৰ লেনদেনৰ বাবে নিৰ্ধাৰিত সীমা ৫ লাখ টকা কৰাৰ সিদ্ধান্ত লোৱা হৈছে। ৰিজাৰ্ভ বেংক অৱ ইণ্ডিয়াৰ নিৰ্দেশ মানিয়েই এই সিদ্ধান্ত লৈছে NPCIয়ে। ইয়াৰ অৰ্থ এয়াই যে গ্ৰাহকে UPIৰ মাধ্যমেৰে হাস্পতালৰ চিকিৎসা বিল বা শিক্ষা ক্ষেত্ৰৰ কোনো বিল পৰিশোধ কৰিবলৈ ৫ লাখ পৰ্যন্ত ধন UPIৰে দিব পাৰিব। এই সালসলনিৰ প্ৰধান কাৰণ হৈছে চিকিৎসা ক্ষেত্ৰত খৰচৰ পৰিমান বৃদ্ধি পাইছে। শিক্ষা ক্ষেত্ৰতো একেই দশা। এই পৰিস্থিতিত এই দুই ক্ষেত্ৰৰ UPI লিমিট বৃদ্ধিৰ বাবে আহ্বান জনাইছিল প্ৰায়সংখ্যক লোকেই।
নিষ্ক্ৰিয় UPI আই ডি এতিয়াৰে পৰা ব্যৱহাৰ কৰিব নোৱাৰিব
নেশ্ব্যনেল পেমেণ্টছ কৰ্পৰেশ্ব্যন অফ ইণ্ডিয়াই ২০২৪ চনৰ আৰম্ভণিৰে পৰা বহু নিষ্ক্ৰিয় UPI আই ডি বন্ধ কৰি দিছে। এক বা একাধিক বছৰ ধৰি নিষ্ক্ৰিয় হৈ থকা UPI আই ডিসমূহ ব্লকো কৰি দিয়া হৈছে। ১ জানুৱাৰীৰ পৰা নিষ্ক্ৰিয় আই ডিৰ পৰা পেমেণ্ট কৰিব নোৱাৰিব ব্যৱহাৰকাৰীয়ে। পুনৰ একাউণ্ট এক্টিভ কৰিলেহে UPI পেমেণ্ট কৰিব পাৰিব নিষ্ক্ৰিয় আইডিৰ পৰা।
UPI জালিয়াতি দূৰ কৰিবলৈকে কেন্দ্ৰই এই নিয়ম তৈয়াৰ কৰিছে। UPIৰে প্ৰথম পেমেণ্টৰ সময়ত কোনো এজন ব্যক্তিয়ে ২০০০টকাতকৈ বেছি লেনদেন কৰিব নোৱাৰিব। ইয়াৰোপৰি UPI ৰে অচিনাকী একাউণ্টলৈ পেমেণ্ট কৰাৰ সময়ত ৪ঘণ্টাতকৈ বেছি সময় লাগিব পাৰে। অৱশ্যে এই দুটা প্ৰস্তাৱ এতিয়াও কাৰ্যকৰী হোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
