ৰাছিয়াৰ ইউক্ৰেইন আক্ৰমণে ১৪ টা দিনত ভৰি দিয়াৰ পিছতো ৰুছ ৰাষ্ট্ৰপতি পুটিনে যুদ্ধ স্তব্ধ কৰাৰ নামেই লোৱা নাই৷ ৰাছিয়াৰ এই আগ্ৰাসী আক্ৰমণত কিংকৰ্তব্যবিমূঢ় হৈ এইবাৰ আমেৰিকাই ৰাছিয়াৰ বিৰুদ্ধে এক চূড়ান্ত সিদ্ধান্ত ঘোষণা কৰিবলৈ বাধ্য হৈছে৷ অৱশ্যে জু বিডেন প্ৰশাসনৰ এই সিদ্ধান্তক ভ্লাদিমিৰ পুটিনৰ প্ৰশাসনে কেনেদৰে গ্ৰহণ কৰে সেয়া লক্ষণীয় হ’ব৷
ৰাছিয়াই আক্ৰমণ বন্ধ নকৰাত ক্ষুব্ধ হৈ হোৱাইট হাউছে ৰাছিয়াৰ তেল, প্ৰাকৃতিক গেছ আৰু কয়লা আমদানিৰ ওপৰত আনুষ্ঠানিক নিষেধাজ্ঞা ঘোষণা কৰিছে। এই নিষেধাজ্ঞা জাৰি কৰি জু বিডেনে পুটিনক সতৰ্ক কৰি দিছে যে এই যুদ্ধত কেতিয়াও ৰাছিয়াই জয় লাভ নকৰে৷
উল্লেখ্য যে ইউক্ৰেইন আক্ৰমণ কৰাৰ প্ৰায় লগে লগে আমেৰিকা যুক্তৰাষ্ট্ৰকে ধৰি পশ্চিমীয়া দেশসমূহে ৰাছিয়াৰ ওপৰত কেইবাটাও অৰ্থনৈতিক নিষেধাজ্ঞা আৰোপ কৰিবলৈ আৰম্ভ কৰিছিল। আমেৰিকাসহ ইউৰোপীয় দেশসমূহৰ এই নিষেধাজ্ঞাই কোনো ফল নধৰিল৷ এই নিষেধাজ্ঞাক বৃদ্ধাংগুষ্ঠ দেখুওৱাই পুটিনে ইউক্ৰেইনৰ ওপৰত আক্ৰমণ দিনক দিনে তীব্ৰতৰহে কৰি গৈছে।
লগতে পঢ়ক কেন্দ্ৰীয় মন্ত্ৰীয়ে আগবঢ়ালে ফুলৰ থোপা; ইউক্ৰেইনৰ পৰা ওভতা শিক্ষাৰ্থীয়ে কৰিলে উপেক্ষা
ইফালে বিশ্বৰ বহুজাতিক কোম্পানীসমূহেও ৰাছিয়াৰ বিৰুদ্ধে কঠোৰ সিদ্ধান্ত গ্ৰহণ কৰিছে৷ কোকা-কোলা, পেপচি, মেকড’নাল্ডছ, লিভিজ, নেটফ্লিক্সকে ধৰি কেইবাটাও পশ্চিমীয়া বহুজাতিক কোম্পানীয়েও ৰাছিয়াৰ সৈতে বাণিজ্যিক সম্পৰ্ক ছিন্ন কৰিছে।
এই নিষেধাজ্ঞাৰ তালিকাত শেহতীয়া সংযোজন হৈছে ৰাছিয়াৰ পৰা তেল, প্ৰাকৃতিক গেছ আৰু কয়লা আমদানি বন্ধ কৰা। আমেৰিকা যুক্তৰাষ্ট্ৰৰ ৰাষ্ট্ৰপতি জু বিডেনে বুধবাৰে হোৱাইট হাউছৰ পৰা আনুষ্ঠানিকভাৱে এই সিদ্ধান্ত ঘোষণা কৰে। বিশেষজ্ঞসকলৰ মতে, এই সিদ্ধান্ত পূৰ্বেই লোৱা হৈছিল যদিও বুধবাৰে মাত্ৰ আনুষ্ঠানিক ঘোষণাহে কৰা হৈছে।
লগতে পঢ়ক অবিশ্বাস্য! তালিবানৰ নাৰী দিৱসৰ শুভেচ্ছা; আফগান মহিলাৰ সন্মান ৰক্ষাৰ প্ৰতিশ্ৰুতি
ইফালে বিডেনৰ এই ঘোষণাৰ পিছতো ৰাছিয়াই আক্ৰমণ বন্ধ কৰাৰ নামেই লোৱা নাই৷ আনহাতে, বুধবাৰে বিডেনে নিষেধাজ্ঞাসমূহ ঘোষণা কৰি ৰাছিয়াৰ ৰাষ্ট্ৰপতি ভ্লাদিমিৰ পুটিনৰ বিৰুদ্ধে অধিক আক্ৰমণাত্মক হোৱা দেখা গৈছে। ‘‘পুটিনে এখন চহৰ দখল কৰিব পাৰে, কিন্তু তেওঁ কেতিয়াও সমগ্ৰ ইউক্ৰেইনক পৰাস্ত কৰিব নোৱাৰে।’’ ইয়াৰ পিছতে জু বিডেনে পুটিনক আক্ৰমণ কৰি এইদৰে কয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
