এতিয়া কিদৰে বিচাৰো পূৰ্ণ ৰাজ্যৰ মৰ্যাদা- বিধানসভাত দুখ প্ৰকাশ ওমৰ আব্দুল্লাৰ
পেহেলগাম আক্ৰমণৰ ওপৰত ভিত্তি কৰা আহ্বান কৰা জম্মু-কাশ্মীৰ বিধানসভাৰ বিশেষ অধিৱেশনত সোমবাৰে আৱেগিক হৈ পৰে মুখ্যমন্ত্ৰী ওমৰ আব্দুল্লা। এই ঘটনাৰ বাবে তেওঁৰ হাতত ক্ষমা খুজিবলৈ শব্দ নাই বুলিও দুখ প্ৰকাশ কৰে। লগতে কয়- বহু বছৰ ধৰি পূৰ্ণ ৰাজ্যৰ মৰ্যাদা বিচাৰি আহিছিলো, কিন্তু এতিয়া কি ভাষাৰে বিচাৰো কাশ্মীৰৰ পূৰ্ণ ৰাজ্যৰ মৰ্যাদা।
মুখ্যমন্ত্ৰীয়ে নিজৰ ভাষ্যত কয়- ৰাজ্যৰ মুখ্যমন্ত্ৰী আৰু পৰ্যটন মন্ত্ৰী হোৱাৰ বাবে সেই পৰ্যটকসকলক কাশ্মীৰলৈ আহিবলৈ নিমন্ত্ৰণ জনাইছিলোঁ, কিন্তু নিৰাপদে ঘূৰাই পঠিয়াব নোৱাৰিলোঁ। অকালতে প্ৰাণ হেৰুৱালে ২৬ গৰাকীকৈ পৰ্যটকে। এই ঘটনা একেবাৰে লজ্জাজনক।
বহু আক্ৰমণৰ ঘটনা প্ৰত্যক্ষ কৰিছে , কিন্তু সাধাৰণ নাগৰিকৰ ওপৰত কৰা এই আক্ৰমণ সঁচাকৈয়ে দুখজনক। ২৬ বছৰৰ পাছত সংঘটিত হৈছে সাধাৰণ নাগৰিকৰ ওপৰত আক্ৰমণ। মোৰ ওচৰত কোনো ভাষা নাই আক্ৰমণত নিহত পৰিয়ালক সান্তনা দিয়াৰ বাবে, অতিথিক ৰক্ষা কৰিব নোৱাৰিলো বুলি বিধানসভাৰ মজিয়াত দুখ প্ৰকাশ কৰে মুখ্যমন্ত্ৰী আব্দুল্লাই।
সমগ্ৰ কাশ্মীৰেই দুখিত এই ঘটনাত। যাৰ বাবে নামাজৰ পূৰ্বে দুই মিনিট মৌন প্ৰাৰ্থনাও হৈ আছে নিহতৰ নামত। কোনো আক্ৰমণৰ পাছত কাশ্মীৰত এনে শূন্যতা বহুত ডাঙৰ কথা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
