অসম লাইভ ২৪ঃ অসম চুক্তিৰ ৬নং দফা সমিতিৰ প্ৰতিবেদন ৰাজহুৱা কৰিলে আছুৱে। শ্বহীদ ভৱনত আয়োজিত এক সংবাদমেলত আছুৱে এই প্ৰতিবেদনখন ৰাজহুৱা কৰে। প্ৰতিবেদন চৰকাৰে ৰাজহুৱা নকৰাত আছুৱে তীব্ৰ ক্ষোভ জাৰে। ১০ ফেব্ৰুৱাৰীত ৬ নং দফা সমিতিয়ে দাখিল কৰিছিল প্ৰতিবেদন। প্ৰাক্তন ন্যায়াধীশ বিপ্লৱ কুমাৰ শৰ্মাৰ নেতৃত্বত গঠন কৰা হৈছিল ৬নং দফা সমিতি। এই প্ৰতিবেদন কেন্দ্ৰই গ্ৰহণ কৰাৰ কথা আছিল যদিও সময়ত কেন্দ্ৰীয় গৃহমন্ত্ৰীয়ে গা-এৰা দিয়া পৰিলক্ষিত হয়। শেষত ২৫ ফেব্ৰুৱাৰীত মুখ্যমন্ত্ৰী সৰ্বানন্দ সোণোৱালে গ্ৰহণ কৰিছিল প্ৰতিবেদনখন। পিছে চৰকাৰে ৫ মাহে ৰাজহুৱা নকৰিলে ৬নং দফা সমিতিৰ প্ৰতিবেদন। সাংবিধানিক ৰক্ষা কৱচ নিশ্চিত কৰাৰ দাবী উত্থাপন কৰি আছুৱে আজি ৰাজহুৱা কৰে এই প্ৰতিবেদন। উল্লেখ্য আছুৰ প্ৰতিনিধিও আছিল ৬নং দফা সমিতিত। আজি আছুৰ সংবাদমেলখনত ভিডিঅ’ কন্ফাৰেন্সত অংশগ্ৰহণ কৰে নিলয় দত্তই।
কি আছে ১৪১ পৃষ্ঠাৰ প্ৰতিবেদনত?
অসমীয়াৰ সংজ্ঞা নিৰ্ধাৰণ কৰিছে ৬ নং দফা সমিতিয়ে। তদুপৰি সংসদত অসমৰ আসনৰ ক্ষেত্ৰত ৮০ৰ পৰা ১০০ শতাংশ অসমীয়াৰ বাবে সংৰক্ষণৰ পৰামৰ্শ দিছে সমিতিয়ে। ৰাজ্যত উচ্চ সদন গঠনৰ পৰামৰ্শ দিছে সমিতিয়ে। এই সদনৰ ১০০শতাংশ সদস্য অসমীয়া হ’ব লাগিব বুলি সমিতিয়ে পৰামৰ্শ দিছে। ইনাৰ লাইন পাৰ্মিট ব্যৱস্থা ৰাজ্যত প্ৰৱৰ্তনৰো পৰামৰ্শ আছে। আনহাতে কেন্দ্ৰীয় চৰকাৰৰ নিযুক্তিৰ ক্ষেত্ৰত তৃতীয় বৰ্গ আৰু চতুৰ্থ বৰ্গৰ চাকৰিত ৮০-১০০শতাংশ অসমীয়াৰ বাবে সংৰক্ষণৰ পৰামৰ্শ আগবঢ়াইছে। ৰাজ্য চৰকাৰৰ চাকৰি আৰু চৰকাৰৰ অধীনস্থ প্ৰতিষ্ঠানৰ চাকৰিৰ ক্ষেত্ৰতো ৮০-১০০শতাংশ অসমীয়াৰ বাবে সংৰক্ষণৰ পৰামৰ্শ আগবঢ়াইছে। ভূমিৰ অধিকাৰ সন্দৰ্ভতো পৰামৰ্শ আছে প্ৰতিবেদনত। ৰাজ্যভাষাক প্ৰকৃত সাংবিধানিক সুৰক্ষা প্ৰদানৰ পৰামৰ্শ দিছে সমিতিয়ে। কৃষ্টি-সংস্কৃতি, সত্ৰ, নামঘৰক সুৰক্ষা প্ৰদানৰ পৰামৰ্শ দিছে এই প্ৰতিবেদনত। ৰাজ্যৰ সম্পদ, জৈৱ-বৈচিত্ৰ্যৰ সুৰক্ষাৰ বাবে প্ৰয়োজনীয় ব্যৱস্থা কেনেদৰে গ্ৰহণ কৰিব পাৰি, এই বিষয়েও পৰামৰ্শ আগবঢ়াইছে সমিতিখনে।
অসমীয়া কোন?
১) ১৯৫১চনৰ ১ জানুৱাৰীৰ পৰা বা তাৰ পূৰ্বে অসমৰ চাৰিসীমাত বাস কৰা সকলো লোক অসমীয়া।
২) ১৯৫১চনৰ ১ জানুৱাৰীৰ পৰা বা তাৰ পূৰ্বে অসমৰ চাৰিসীমাত বাস কৰা যিকোনো খিলঞ্জীয়া জনজাতীয় সম্প্ৰদায়।
৩) ১৯৫১চনৰ ১ জানুৱাৰীৰ পৰা বা তাৰ পূৰ্বে অসমৰ চাৰিসীমাত বাস কৰা অন্য যিকোনো খিলঞ্জীয়া লোক।
৪) ১৯৫১চনৰ ১ জানুৱাৰীৰ পৰা বা তাৰ পূৰ্বে অসমৰ চাৰিসীমাত বাস কৰা আন সকলো ভাৰতীয় নাগৰিক।
৫) উল্লিখিত সকলো লোকৰ বংশধৰসকল।
প্ৰতিবেদনত অসম বুলি কওঁতে ভাৰতীয় সংবিধানৰ প্ৰথম সূচী অনুসৰি চিহ্নিত নিৰ্দিষ্ট সীমাক বুজোৱা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
