অসম লাইভ ২৪ঃ ‘ভাৰতীয় জনতা পাৰ্টিৰ সৈতে থকা ২৫ বছৰীয়া মিত্ৰতা বিৰাট অপচয় আছিল৷’ এই বিস্ফোৰক মন্তব্য কৰিছে মহাৰাষ্ট্ৰৰ মুখ্যমন্ত্ৰী তথা শিৱসেনাৰ বৰ্তমানৰ প্ৰধান উদ্ধৱ থাকৰেই৷
দেওবাৰে শিৱসেনাৰ প্ৰতিষ্ঠাপক বাল থাকৰেৰ ৯৬ সংখ্যক জন্ম জয়ন্তী উপলক্ষ্যে আয়োজিত এক ভাৰ্চুৱেল কাৰ্যসূচীত শিৱসেনাৰ সৈনিকসকল উদ্দেশ্যি দিয়া ভাষণত এই বিস্ফোৰক মন্তব্য কৰে মুখ্যমন্ত্ৰী উদ্ধৱ থাকৰেই৷
থাকৰেই লগতে কয় যে তেওঁ দলে মহাৰাষ্ট্ৰৰ বাহিৰতো স্থিতি মজবুট কৰি ৰাষ্ট্ৰীয় ৰাজনীতিত বিশেষ ভূমিকা পালন কৰি বিজেপিক প্ৰতিৰোধ কৰিবলৈ চেষ্টা কৰিব৷
বিজেপিয়ে দেশত হিন্দুত্ববাদী ৰাজনীতি কৰাৰ অভিযোগ তুলি শিৱসেনাৰ প্ৰধানগৰাকীয়ে কয় যে বিজেপিয়ে দেশত হিন্দুত্ববাদ প্ৰতিষ্ঠাৰ বাবে ক্ষমতালৈ আহিবলৈ চেষ্টা কৰি আহিছিল৷ কিন্তু শিৱসেনাই কেতিয়াও হিন্দুত্বৰ বাবে ৰাজনীতি কৰা নাই ৷
পুৰণি সতীৰ্থ আকালী দল, শিৱসেনা আদি ওলাই অহাৰ পিছত বিজেপি নেতৃত্বাধীন এনডিএ অৰ্থাৎ ৰাষ্ট্ৰীয় গণতান্ত্ৰিক মৰ্চাৰ প্ৰায় নিশকতীয়া হৈ পৰা বুলি তাৎপুৰ্যপূৰ্ণ মন্তব্য কৰে উদ্ধৱ থাকৰেই৷
ইফালে নিজকে উগ্ৰ হিন্দুত্ববাদী নহয় বুলি দাবী কৰি হিন্দুত্বৰ দৰ্শনক ত্যাগ কৰা নাই বুলি সদৰী কৰিছে শিৱসেনাই৷ থাকৰেৰ মতে বিজেপিয়ে হিন্দুত্বৰ দৰ্শনক বিশ্বাস নকৰে, ক্ষমতাৰ বাবেহে বিজেপিয়ে হিন্দুত্ববাদক ব্যৱহাৰ কৰি আহিছে৷ আৰু সেয়ে শিৱ সেনাই বিজেপিৰ সংগ ত্যাগ কৰিছে, হিন্দুত্বৰ দৰ্শনক এতিয়াও ত্যাগ কৰা নাই৷
থাকৰেই অধিক আক্ৰমণাত্মক হৈ বিজেপিয়ে হিন্দুত্ব কি সেয়াও বুজি নাপায় বুলি দাবী কৰি যোৱা ২৫ টা বছৰ বিজেপিৰ লগত থাকি শিৱসেনাই কেৱল মাত্ৰ সময় অপচয় কৰা বুলিহে সৈনিকসকলক উদ্দেশ্যি কৰি কয়৷
উল্লেখ্য যে উদ্ধৱ থাকৰেৰ পিতৃ বাল থাকৰেই ২৫ বছৰ পূৰ্বে বিজেপি নেতৃত্বাধীন এনডিএৰ লগত চামিল হৈছিল৷ ইয়াৰ পিছত ২৫ টা বছৰ বিজেপি আৰু শিৱসেনাৰ ৰাজনৈতিক মিত্ৰতা থাকিলেও মহাৰাষ্ট্ৰত বিজেপিয়ে বিশ্বাসঘাতকতাৰে শিৱ সেনাৰ স্থিতি দুৰ্বল কৰি নিজৰ স্থিতি সবল কৰিবলৈ চেষ্টা কৰাৰ অভিযোগ কৰি উদ্ধৱ থাকৰেই এনডিএ ত্যাগ কৰে৷
ইয়াৰ পিছতে ২০১৯ত কংগ্ৰেছ নেতৃত্বাধীন সংযুক্ত প্ৰগতিশীল মৰ্চাৰ সৈতে চামিল হৈ এনচিপি আৰু কংগ্ৰেছৰ সমৰ্থনত মহাৰাষ্ট্ৰত শিৱসেনাই চৰকাৰ গঠন কৰে আৰু বাল থাকৰেই মহাৰাষ্ট্ৰৰ মুখ্যমন্ত্ৰীৰ পদত অধিষ্ঠিত হয়৷ ইয়াৰ পিছৰে পৰা উদ্ধৱ থাকৰেই মহাৰাষ্ট্ৰৰ পৰা বিজেপিৰ চিন মোকাম নাইকিয়া কৰিবলৈ অসৰহ চেষ্টা কৰি আহিছে৷
শিৱসেনাৰ বৰ্তমানৰ প্ৰধান তথা মহাৰাষ্ট্ৰৰ মুখ্যমন্ত্ৰী উদ্ধৱ থাকৰেই এই মন্তব্যৰ পিছতে বিজেপিয়ে কি প্ৰতিক্ৰিয়া প্ৰকাশ কৰে সেয়া লক্ষণীয় হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ