অষ্টম দৰমহা আয়োগ সন্দৰ্ভত কেন্দ্ৰীয় কৰ্মচাৰী আৰু পেঞ্চনাৰসকলৰ আশা বাঢ়িছে। ইফালে ভাৰত পেঞ্চনাৰ সমাজে আয়োগৰ সন্মুখত কেইবাটাও গুৰুত্বপূৰ্ণ পৰামৰ্শ আগবঢ়াইছে। ইয়াৰ ভিতৰত কেন্দ্ৰীয় কৰ্মচাৰীৰ নূন্যতম মৌলিক দৰমহা ৬৯ হাজাৰ টকা আৰু নূন্যতম পেঞ্চন ৪৫ হাজাৰ টকালৈ বৃদ্ধি কৰাৰ দাবীও অন্যতম। ভাৰত পেঞ্চনাৰ সমাজৰ এটা প্ৰতিনিধি দলে অষ্টম দৰমহা আয়োগৰ বিষয়াসকলৰ সৈতে বৈঠকত মিলিত হয়। প্ৰতিনিধি দলটোত বিপিএছৰ সভাপতি আৰ কে চৌহান আৰু সাধাৰণ সম্পাদক অবিনাশ ৰাজপুত উপস্থিত আছিল। এই বৈঠকত সংস্থাটোৱে কৰ্মচাৰীৰ দৰমহা, পেঞ্চন, ডিয়াৰনেছ ভাট্টা, আৰু স্বাস্থ্য সুবিধাৰ সন্দৰ্ভত আয়োগৰ সন্মুখত কেইবাটাও পৰামৰ্শ আগবঢ়ায়।
মন কৰিবলগীয়া যে এইবোৰ বৰ্তমান পৰামৰ্শহে, চূড়ান্ত সিদ্ধান্ত নহয়। অষ্টম দৰমহা আয়োগে কৰ্মচাৰী, পেঞ্চনাৰ, আৰু অন্যান্য সংশ্লিষ্ট সংস্থাৰ পৰা পৰামৰ্শ সংগ্ৰহ কৰি আছে। এই পৰামৰ্শসমূহৰ ভিত্তিত আয়োগে নিজৰ প্ৰতিবেদন প্ৰস্তুত কৰিব। প্ৰতিবেদনখন কাৰ্যকৰী কৰাৰ আগতে কেন্দ্ৰীয় চৰকাৰ আৰু কেবিনেটৰ অনুমোদন লাভ কৰিব লাগিব।
নূন্যতম পেঞ্চন ৪৫,০০০ টকালৈ বৃদ্ধি কৰাৰ দাবী
বিপিএছে নূন্যতম পেঞ্চন বৰ্তমানৰ ৯ হাজাৰ টকাৰ পৰা ৪৫ হাজাৰ টকালৈ বৃদ্ধি কৰাৰ পৰামৰ্শ দিছে। অৰ্থাৎ সংস্থাটোৱে নূন্যতম পেঞ্চনৰ প্ৰায় পাঁচগুণ বৃদ্ধি বিচাৰে। তদুপৰি সংস্থাটোৱে নূন্যতম পেঞ্চন শেষৰ দৰমহাৰ ৬৭% আৰু পৰিয়ালৰ পেঞ্চন শেষৰ দৰমহাৰ ৫০% হ’বলৈ পৰামৰ্শ আগবঢ়াইছে।
নূন্যতম মৌলিক দৰমহা ৬৯,০০০ টকা প্ৰস্তাৱ কৰা হৈছে
বৰ্তমান কেন্দ্ৰীয় চৰকাৰৰ কৰ্মচাৰীৰ নূন্যতম মৌলিক দৰমহা ১৮,০০০ টকা। বিপিএছে ইয়াক ৬৯ হাজাৰ টকালৈ বৃদ্ধি কৰাৰ পৰামৰ্শ দিছে। সংস্থাটোৱে ৩.৮৩ ফিটমেণ্ট ফ্যাক্টৰ প্ৰস্তাৱ কৰিছে। যদিহে ফিটমেণ্ট ফ্যাক্টৰ ৩.৮৩ গ্ৰহণ কৰা হয়, তেন্তে বৰ্তমানৰ নূন্যতম মৌলিক দৰমহা ১৮,০০০ টকা প্ৰায় ৬৯,০০০ টকালৈ বৃদ্ধি পাব পাৰে। অৱশ্যে ইয়াৰ অৰ্থ এইটো নহয় যে ৬৯,০০০ টকা দৰমহা চূড়ান্ত কৰা হৈছে। বৰ্তমান কৰ্মচাৰী সংগঠনটোৰ এই দাবী।
পৰিয়ালৰ হিচাপত ডাঙৰ পৰিৱৰ্তন
বিপিএছে নূন্যতম মজুৰি নিৰ্ধাৰণৰ বাবে পৰিয়ালৰ একক ৩ৰ পৰা ৫.২লৈ বৃদ্ধি কৰাৰ পৰামৰ্শ দিছে। ইয়াৰ ফলত কৰ্মচাৰীজনক এটা ইউনিট, পত্নীক এটা ইউনিট, দুটা সন্তানক ০.৮ ইউনিটকৈ আৰু দুজন অভিভাৱকক ০.৮ ইউনিটকৈ বুলি গণ্য কৰা হ’ব। সংস্থাটোৰ মতে পৰিয়ালৰ সদস্যৰ প্ৰয়োজনীয়তাৰ প্ৰতি লক্ষ্য ৰাখি নূন্যতম মজুৰিৰ সংশোধন কৰিব লাগে।
প্ৰতি তিনিমাহৰ মূৰে মূৰে ডি এ আৰু ডি আৰ বৃদ্ধি কৰাৰ দাবী
বৰ্তমান কেন্দ্ৰীয় চৰকাৰে বছৰত দুবাৰকৈ ডিয়াৰনেছ এলাৱেন্স (ডি এ) আৰু ডিয়াৰনেছ ৰিলিফ (ডি আৰ) সংশোধন কৰে। সাধাৰণতে এই পুনৰীক্ষণসমূহ জানুৱাৰী আৰু জুলাই মাহত কাৰ্যকৰী হয়। বিপিএছে প্ৰতি তিনিমাহৰ মূৰে মূৰে ডিএ আৰু ডি আৰ সংশোধন কৰাৰ পৰামৰ্শ দিছে। সংস্থাটোৱে বিচাৰে যে এই গণনা তিনিমাহৰ গড়ৰ ওপৰত ভিত্তি কৰি কৰা হওক। তদুপৰি বিপিএছে পৰামৰ্শ দিছে যে যেতিয়া ডি আৰ ২৫% অতিক্ৰম কৰে তেতিয়া ইয়াক মৌলিক পেঞ্চনত একত্ৰিত কৰিব লাগে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
