অসম লাইভ ২৪ঃ শীঘ্ৰেই মহানগৰীৰ ৰাজপথত দেখিবলৈ পোৱা যাব compressed natural gas চমুকৈ cng বাছ৷ মহানগৰীৰ ৰাজপথৰ পৰা অতীত হ’ব ডিজেল-পেট্ৰ’ল চালিত চিটী বাছসমূহ৷ ৰাজ্য চৰকাৰে অতি শীঘ্ৰেই ক্ৰয় কৰিব ২০০ খন CNG বাছ৷ সংবাদমেলযোগে এই কথা সদৰী কৰে মুখ্যমন্ত্ৰী হিমন্ত বিশ্ব শৰ্মাই৷ মুখ্যমন্ত্ৰীৰ এই ঘোষণাত স্বাভাৱিকতে শংকিত হৈ উঠিছে চিটী বাছসমূহৰ মালিকৰ লগতে চালক-হেণ্ডিমেনসকল৷ মহানগৰীত চিটী বাছৰ সংখ্যা প্ৰায় ১,৭০০খন৷ এই ১,৭০০ বাছৰ লগত জড়িত মালিক, ড্ৰাইভাৰ, কনডাক্টৰ আৰু দুজনকৈ হেণ্ডিমেন মিলাই মুঠ সংখ্যা হ’বগৈ ৮,৫০০৷ স্বাভাৱিকতে প্ৰশ্ন উঠিছে এই ৮,৫০০ লোকৰ কি হ’ব? এইক্ষেত্ৰত অৱশ্যে মুখ্যমন্ত্ৰীগৰাকীয়ে আংশিক সকাহৰ ইংগিত দিছে৷ চৰকাৰৰ তৰফৰ পৰা চালক-হেণ্ডিমেন প্ৰতিজনক দিয়া হ’ব ১০ হাজাৰ টকাকৈ৷ চালক-হেণ্ডিমেনসকলে সকাহ পাব যদিও বাহনৰ গৰাকীসকল বিপদত পৰাৰ সম্ভাৱনাই অধিক৷ এই বাছসমূহ কি কৰা হ’ব, ক’ত চলাব তাক লৈও চিন্তিত৷ কাৰণ দূৰণীবটীয়া বাছ হ’ব লাগিলে দে’ ছুপাৰ বা নাইট ছুপাৰৰ দৰে সুবিধাসম্পন্ন বাছ হ’ব লাগিব, যিসমূহ সুবিধা চিটী বাছত নাই৷ ইপিনে, মহানগৰীৰ তেল ডিপোসমূহতো ইয়াৰ প্ৰভাৱ পৰিব৷ মহানগৰীৰ তেল ডিপোসমূহৰ তেল অধিক পৰিমাণত বিক্ৰী হয় বাছসমূহৰ জৰিয়তে৷ এই ক্ষেত্ৰত ডিপোসমূহত প্ৰভাৱ পৰাটো নিশ্চিত৷ তেল ডিপোৰ স্বত্বাধিকাৰীৰ বাবেও এক চিন্তাৰ কাৰণ৷ আনহাতে, মহানগৰীৰ পৰিবহণ আয়ুক্তৰ কাৰ্যালয়ত প্ৰতিবাদ সদৌ অসম মটৰ শ্ৰমিক যুটীয়া পৰিষদৰ৷ আন্তঃজিলা যাতায়াত খুলি দিয়াৰ দাবীৰে প্ৰতিবাদ সাব্যস্ত কৰে অসম মটৰ শ্ৰমিক সংস্থাই৷ মহানগৰীকে ধৰি ভিন ভিন অঞ্চলত সান্ধ্য আইন নথকা সময়ছোৱাত পূৰ্ণোদ্যমে চলিছে বাহন৷ ৰাজপথৰ অৱস্থা দেখিলে কোনেও ক’ব নোৱাৰে যে এয়া কোভিড কালীন পৰিস্থিতি৷ অনুৰূপভাৱে ৰে’লগাড়ীসমূহত যাত্ৰী কঢ়িওৱা হৈছে পাণ জপা দি জাপি৷ শাৰীৰিক দূৰত্বৰ প্ৰশ্ন য’ত অচল হৈ পৰে৷ অফিচ-কাছাৰী পূৰ্ণোদ্যমে চলিছে৷ ধৰ্মীয় অনুষ্ঠানসমূহতো মানুহৰ সোঁত বৈছে৷ বজাৰ-ঘাট পূৰ্ণোদ্যমে খোলা৷ কিন্তু আন্তঃজিলা যাতায়াতৰ ক্ষেত্ৰত বাধা আৰোপ কৰি কিয় বাহনৰ মালিকসকলৰ লগতে শ্ৰমিকসকলক ক্ষতিগ্ৰস্ত কৰা হৈছে? তাক লৈ প্ৰশ্ন তুলিছে প্ৰতিবাদকাৰীয়ে৷ পৰিবহণ বিভাগৰ আয়ুক্ত আদিল খানক এই সন্দৰ্ভত প্ৰদান কৰে এক স্মাৰকপত্ৰ৷ বিধানসভা নিৰ্বাচনত অধিগ্ৰহণ কৰা বাহনসমূহৰ অনাদায় বিল আদায় দিবলৈও দাবী জনায় প্ৰতিবাদকাৰীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
