অসম লাইভ ২৪ঃ বিগত বৰ্ষত বহুকেইটা ঘটনাই বিশ্ববাসীৰ মনত গুৰুত্বপূৰ্ণ স্থান লাভ কৰিছিল। তাৰে বহু কেইটা ঘটনাৰ ভিতৰত বিশ্ববাসীৰ মনত ক্ৰিয়া কৰা এটা বিশেষ ঘটনা আছিল বিগত বৰ্ষৰ আৰম্ভণিতে ইজৰাইলে পেলেষ্টাইনৰ গাজাষ্ট্ৰীপত প্ৰায় সপ্তাহ দিনজুৰি কৰা ৰকেট আক্ৰমণ। যদিও ইজৰাইলে আক্ৰমণ কৰিছিল গাজাষ্ট্ৰীপত কিন্তু ইজৰাইলক এই আক্ৰমণ কৰিবলৈ বাধ্য কৰাইছিল হামাছ নামৰ এটা ইছলামিক উগ্ৰপন্থী সংগঠনে।
এই সংগঠনে জেৰুজালামৰ এক ধৰ্মীয় ঘটনাক কেন্দ্ৰ কৰি হঠাৎ ইজৰাইললৈ লক্ষ্য কৰি একেলেথাৰিয়ে নিক্ষেপ কৰিছিল বহু হাজাৰ ৰকেট। কিন্তু কাৰিকৰী ভাৱে বিশ্বৰ ভিতৰতে আগবঢ়া ইজৰাইলক হামাছৰ এই ৰকেট আক্ৰমণে বিশেষ কোনো ক্ষতি-ক্ষতি কৰিব পৰা নাছিল। ইফালে, এই ঘটনাৰ পাছত ইজৰাইলে প্ৰত্যুত্তৰ হিচাপে পেলেষ্টাইনৰ গাজাষ্ট্ৰীপত যুদ্ধ বিমানেৰে আকাশ মাৰ্গৰ পৰা বোমা নিক্ষেপ কৰি নিস্ত-নাভূত কৰিছিল গাজাষ্ট্ৰীপৰ ভূ-ভাগত থকা হামাছ নামৰ ইছলামিক উগ্ৰপন্থী সংগঠনৰ মূল ঘাটিসমূহ।
যি আক্ৰমণত হামাছৰ বহু উগ্ৰপন্থীৰ লগতে মৃত্যুক সাৱটি ল’ব লগা হৈছিল গাজাষ্ট্ৰীপৰ বহু নিৰীহ জনতা। যাৰ বাবে বিগত বৰ্ষত বিশ্ববাসীৰ ওচৰত বহু সমালোচনাৰ সন্মুখীন হ’ব লগা হৈছিল ইজৰাইল। প্ৰায় ছটা দিন ধৰি চলা ইজৰাইলৰ এই আক্ৰমণত নিজকে আনুষ্ঠানিক ঘোষণাৰে ইজৰাইলৰ ওচৰত আত্মসমৰ্পণ কৰিছিল হামাছ নামৰ উগ্ৰপন্থী সংগঠনটোৱে। পিছত আমেৰিকাৰ তৎপৰতাত এই আক্ৰমণ ইজৰাইলে বন্ধ কৰিছিল যদিও বৰ্ষটোত চৰ্চাৰ অন্যতম কাৰণ হৈ আছিল।
কিন্তু ২০২২ চনৰ আৰম্ভণীতে খৱৰ আহিল যে পুনৰ ইজৰাইলে ৰকেট আক্ৰমণ চলাইছে গাজাষ্ট্ৰীপত। বৰ্তমান সময়লৈ ক্ষয়-ক্ষতিৰ পৰিমাণ পোহৰলৈ অহা নাই যদিও সকলোৰে মনত এটাই প্ৰশ্ন যে কিয় আকৌ ইজৰাইলে গাজাষ্ট্ৰীপত আক্ৰমণ চলালে? আক্ৰমণ চলোৱাৰ কাৰণ হ’ল যে হামাছ নামৰ উগ্ৰপন্থী সংগঠনটোৱে মৃত সাগৰলৈ লক্ষ্য কৰি পৰীক্ষা কৰি থকা অৱস্থাত কেইবাটাও মিছাইল বতাহৰ ঢৌত পৰিছিল গৈ ইজৰাইলৰ ভূখণ্ডত ।
কিন্তু এই কথা আনুষ্ঠানিকভাৱে সংবাদ মাধ্যমক হামাছৰ ফালৰ পৰাহে জনোৱা হৈছে। ইজৰাইল চৰকাৰৰ মতে এই আক্ৰমণ পুনৰ হামাছে জানি-বুজি ইজৰাইললৈ লক্ষ্য কৰি ৰকেট আক্ৰমণ কৰিছে। সেয়েহে এই আক্ৰমণৰ উচিত প্ৰত্যুত্তৰ হিচাপে ইজৰাইলে পুনৰ গাজাষ্ট্ৰীপত আক্ৰমণ চলাইছে। হামাছৰ এই আনুষ্ঠানিক স্পষ্টীকৰণৰ বিপৰীতে তলৰ স্পষ্টীকৰণ আছিল ইজৰাইল চৰকাৰৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
