মানৱেন্দ্ৰ কুমাস দাসঃ ২০২১ চনত অসমত দ্বিতীয়বাৰৰ বাবে বিজেপি চৰকাৰ গঠন হোৱাৰ পাছত কাৰ্বি জনগোষ্ঠীৰ পৰা এগৰাকী নেতা মন্ত্ৰীসভাত স্থান পোৱাটো নিশ্চিত হৈছিল৷ আৰু সেই সময় এতিয়া সমাগত৷ খোদ মুখ্যমন্ত্ৰী ড০ হিমন্ত বিশ্ব শৰ্মাৰ এক ঘনিষ্ঠ সূত্ৰৰ পৰা সম্ভেদ পোৱা অনুসৰি মন্ত্ৰীসভাত নতুনকৈ স্থান পাবলগীয়া নেতাসকলৰ ভিতৰত অন্যতম হৈছে বিদ্যাছিং ইংলেং৷ ডিফু বিধানসভা সমষ্টিৰ পৰা তেওঁ চতুৰ্থবাৰৰ বাবে বিধায়ক হিচাপে নিৰ্বাচিত হৈছে৷
উল্লেখযোগ্য যে কাৰ্বি আংলঙত এইগৰাকী নেতাৰ সাংগঠনিক আৰু ৰাজনৈতিক প্ৰভাৱ অনস্বীকাৰ্য৷ অৱশ্যে, এইগৰাকী ৰাজনীতিকে তেওঁৰ ৰাজনৈতিক জীৱন কংগ্ৰেছ দলতহে আৰম্ভ কৰিছিল৷ ২০০১ চনত পোনপ্ৰথমবাৰৰ বাবে কংগ্ৰেছ দলৰ প্ৰাৰ্থী হিচাপে অসম বিধানসভালৈ নিৰ্বাচিত হৈছিল৷ তাৰ পৰৱৰ্তী পৰ্যায়ত ২০০৬ আৰু ২০১১ত একেৰাহে কংগ্ৰেছ দলৰ প্ৰতিনিধি হিচাপে অসম বিধানসভাত আছিল বিদ্যাছিং ইংলেং৷ ২০১৬ চনতো তেওঁ কংগ্ৰেছৰ প্ৰাৰ্থিত্ব পাইছিল যদিও ডিফু বিধানসভা সমষ্টিত পৰাজিত হৈছিল৷
উল্লেখযোগ্য যে অসমৰ জনজাতি অধ্যুষিত অঞ্চলসমূহত বিজেপি দলৰ ৰাজনৈতিক আৰু সাংগঠনিক শক্তি ২০১৬ পৰ্যন্ত যথেষ্ট দুৰ্বল আছিল৷ কাৰ্বি আংলঙো ইয়াৰ ব্যতিক্ৰম নহয়৷ কিন্তু মুখ্যমন্ত্ৰী ড০ হিমন্ত বিশ্ব শৰ্মা বিজেপি দললৈ অহাৰ পাছত অসম তথা উত্তৰ-পূৰ্বাঞ্চলত হিন্দুত্ববাদী ৰাজনীতিৰ নতুন সমীকৰণ আৰম্ভ হয়৷
লগতে পঢ়ক গোৱাৰ পৰ্যটন ক্ষেত্ৰৰ বাবে মুখ্যমন্ত্ৰীয়ে হাতত ল’লে এইসমূহ নতুন প্ৰচেষ্টা…
কাৰ্বি আংলঙত এসময়ৰ প্ৰভাৱশালী কংগ্ৰেছ নেতা বিদ্যাছিং ইংলেং আৰু মুখ্যমন্ত্ৰী ড০ হিমন্ত বিশ্ব শৰ্মাৰ ঘনিষ্ঠতা অসমৰ ৰাজনীতিত নতুন নহয়৷ মুখ্যমন্ত্ৰীগৰাকীৰ উদ্যোগতে বিদ্যাছিং ইংলেঙে বিজেপি দলত যোগদান কৰিছিল৷ কাৰ্বি আংলঙত বিজেপিৰ সাগংঠনিক আৰু ৰাজনৈতিক স্থিতি শক্তিশালী কৰি তোলাৰ ক্ষেত্ৰত যোৱা সময়ছোৱাত বিদ্যাছিং ইংলেঙৰ ভূমিকাক গেৰুৱা বাহিনীটোৱে কেতিয়াও নুই কৰিব নোৱাৰে৷ একে সময়তে বিজেপিৰ মন্ত্ৰীসভাত কাৰ্বি জনগোষ্ঠীৰ লোক উপেক্ষিত হোৱা বুলিও rss আৰু বিজেপিৰ নেতৃত্বক সমালোচনাৰ লক্ষ্য কৰি লৈছিল বিৰোধী শিবিৰৰ ৰথী-মহাৰথীয়ে৷ আনকি কাৰ্বি আংলং স্বায়ত্ত শাসিত পৰিষদৰ নিৰ্বাচনতো বহুকেইটা পৰিষদীয় সমষ্টিত এই বিষয়টোক লৈ বিজেপি নেতৃত্বক সমালোচনা কৰাৰ সুযোগ পাইছিল প্ৰধান বিৰোধী দল কংগ্ৰেছে৷
এই সমস্ত ৰাজনৈতিক পৰিক্ৰমাৰ মাজত হঠাৎ মুখ্যমন্ত্ৰী ড০ হিমন্ত বিশ্ব শৰ্মাই সংবাদ মাধ্যমৰ ওচৰত ঘোষণা কৰে যে কাৰ্বি আংলং স্বায়ত্ত শাসিত পৰিষদৰ নিৰ্বাচন সমাপ্ত হোৱাৰ পাছতে সম্প্ৰসাৰণ কৰা হ’ব মন্ত্ৰীসভাৰ৷ তাৰ পাছত আৰম্ভ হয় ৰাজনৈতিক সমীকৰণ আৰু জল্পনা-কল্পনাৰ৷ কাৰ্বি আংলঙৰ লগতে btrৰ বহুকেইগৰাকী নেতয়ো মন্ত্ৰীসভাত স্থান লাভৰ বাবে নিজ নিজ পৰ্যায়ত কৌশল ৰচনা কৰে৷ rssৰ মজিয়াতো বিষয়টো আলোচনা হয়৷ মুখ্যমন্ত্ৰী ড০ হিমন্ত বিশ্ব শৰ্মাৰ এক ঘনিষ্ঠ সূত্ৰই লগতে ইয়াকো দাবী কৰে কাৰ্বি আংলং জিলাত অৰ্থাৎ কাৰ্বি পাহাৰত বিজেপিৰ সাংগঠনিক শক্তি মজবুত কৰিবলৈ বিদ্যাছিং ইংলেঙৰ প্ৰয়োজনীয়তা সৰ্বাধিক বুলি বিজেপিৰ ভিতৰচ’ৰাত চৰ্চিত হয়৷ নেতাগৰাকীক মন্ত্ৰীসভাত স্থান দিয়া সম্পৰ্কত rssৰ পৰা সেউজ সংকেত লাভ কৰা বুলিও জানিব পৰা হৈছে৷ আৰু সেইবাবে যদি বিশেষ ৰাজনৈতিক পৰিঘটনা সংঘটিত নহয় তেন্তে বিজেপি চৰকাৰৰ মন্ত্ৰীসভাত এইগৰাকী নেতাই স্থান লাভ কৰাটো প্ৰায় নিশ্চিত৷
লগতে পঢ়ক একালৰ বৃন্দাবন একালত পৰে চন! লেডী সিংঘম এছ আই জোনমণি ৰাভাক গ্ৰেপ্তাৰ
বিদ্যাছিং ইংলেং মন্ত্ৰীসভাত অন্তৰ্ভুক্ত হোৱাৰ পাছত হয়তো কাৰ্বি পাহাৰতো বিজেপিৰ হিন্দুত্ববাদী ৰাজনীতি অধিক প্ৰবল আৰু সৰ্বমুখী হৈ উঠিব৷ কিয়নো এই লক্ষ্যৰে জ্যেষ্ঠ কাৰ্বি নেতাগৰাকীক মন্ত্ৰীসভাত স্থান দিবলৈ মুখ্যমন্ত্ৰী ড০ হিমন্ত বিশ্ব শৰ্মাই সিদ্ধান্ত গ্ৰহণ কৰিছে৷
প্ৰাপ্ত তথ্য অনুসৰি অহা ১০ জুনত গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত হ’বলগীয়া শপতগ্ৰহণ অনুষ্ঠানত বিদ্যাছিং ইংলেঙে মন্ত্ৰিত্বৰ শপত লোৱাৰ সম্ভাৱনা স্পষ্ট হৈ উঠিছে৷ অৱশ্যে ইয়াৰ ৰাজনৈতিক প্ৰতিক্ৰিয়া হয়তো বিশেষভাৱে লক্ষণীয়ও হ’ব পাৰে৷ কিয়নো কাৰ্বি পাহাৰৰ ৰাজনীতিৰ লগত বিজেপিৰ ৰাজনৈতিক সমীকৰণ কিমান প্ৰভাৱশালী হ’ব তাক লৈ খোদ বিজেপিৰ নেতৃত্বয়ো নিশ্চিত নহয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
