দেশৰ আগশাৰী উদ্যোগপতি মুকেশ আম্বানী আৰু তেওঁৰ পৰিয়াললৈ মৃত্যুৰ ভাবুকি প্ৰদান কৰি তিনিটাকৈ ফোন কল আহিছে৷
১৫ আগষ্ট সোমবাৰে উদ্যোগপতি মুকেশ আম্বানী আৰু তেওঁৰ পৰিয়াললৈ তিনিটা ভাবুকিৰ ফোন আহে। কোনে আৰু ক’ৰ পৰা এই ভাবুকি প্ৰদান কৰি ফোন কল তিনিটা কৰিছে সেই তথ্য এতিয়াও প্ৰকাশ পোৱা নাই৷
ডিবি মাৰ্গ আৰক্ষীয়ে এই সন্দৰ্ভত অধিক তথ্য লাভৰ চেষ্টা চলাইছে। মুম্বাই আৰক্ষীয়ে এক বিবৃতিত কয় যে, ‘‘ৰিলায়েন্স ফাউণ্ডেচনে ৰিলায়েন্স ইণ্ডাষ্ট্ৰীজৰ অধ্যক্ষ মুকেশ আম্বানী আৰু তেওঁৰ পৰিয়াললৈ ভাবুকিভৰা ফোনকল সন্দৰ্ভত এজাহাৰ দাখিল কৰিছে। চিকিৎসালয়খনত তিনিটাতকৈ অধিক ফোন আহিছিলল। ঘটনা সন্দৰ্ভত তদন্ত অব্যাহত আছে।’’
উল্লেখ্য যে যোৱা বছৰ মুকেশ আম্বানীৰ মুম্বাই বাসগৃহ ‘এন্টিলিয়া’ৰ বাহিৰত ২০ টা বিস্ফোৰক জেলেটিন ষ্টিকসহ এখন স্ক’ৰপিঅ’ বাহন উদ্ধাৰ কৰা হৈছিল৷ মুম্বাই আৰক্ষীৰ শীৰ্ষ বিষয়া শচীন ভাজেৰ নেতৃত্বাধীন মুম্বাইৰ অপৰাধ চোৰাংচোৱা ইউনিটে উক্ত স্থানত উপস্থিত হৈ সমগ্ৰ ঘটনাটো তদন্ত আৰম্ভ কৰিছিল৷ ইয়াৰ পিছতে মুম্বাই আৰক্ষীয়ে মুকেশ আম্বানীৰ নিৰাপত্তা অধিক কটকটয়া কৰিছিল৷
ইফালে তাৰ কিছুদিন পিছতে থানেস্থিত এজন ব্যৱসায়ী মানসুখ হীৰেনৰ ৰহস্যজনক মৃত্যুৰ পিছতে গোচৰটো এনআইএৰ হাতত অৰ্পণ কৰা হয়। আম্বানীৰ বাসগৃহৰ বাহিৰত উদ্ধাৰ হোৱা স্ক’ৰপিঅ’ বাহনখনৰ গৰাকী আছিল হীৰেন।
অৱশ্যে গৰাকীয়ে দাবী কৰিছিল যে এসপ্তাহ পূৰ্বে তেওঁৰ বাহনখন চুৰি হৈছিল। ২০২১ চনৰ ৫ মাৰ্চত থানেৰ এটা খালত উদ্ধাৰ হৈছিল তেওঁৰ মৃতদেহ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
