অসম লাইভ২৪: ফাগুন মানেই ৰং। ফাগুনতেই ৰঙৰ খেল ফাকুৱা। আবিৰ হাতত লৈ সকলো সাজু, কিয়নো ফাঁকুৱালৈ মাজত মাত্ৰ দুটামানহে দিন। ফাগুনৰ মাহৰ পূৰ্ণিমা তিথিত দেশজুৰি পালিত হোৱা এই ফাকুৱা বা হোলীক লৈ এতিয়া সকলোতে উখল-মাখল পৰিৱেশ।
কোনোৱে কয়, ফাগুন হেনো লঠঙা। সৰাপাত গচকি আহে ফাগুন। কিন্তু ফাগুন সঁচাই লঠঙা জানো? ৰঙৰ আবিৰ গাত সানিয়েইতো ফাগুন আহে। কঢ়িয়াই আনে এমোকোৰা আনন্দ।
হোলী বা ফাকুৱাক ফল্গুৎসৱ বুলিও জনা যায়। ফাগুন মাহৰ পূৰ্ণিমা তিথিত এই উৎসৱৰ আয়োজন কৰা হয় বাবেই এই নাম। ফাকুৱাক দৌলোৎসৱ, ফাগুৱা, ফাঁকু, মদনোৎসৱ আদি নামেৰেও জনা যায়। সমগ্ৰ ভাৰতবৰ্ষতে হিন্দুসকলৰ প্ৰাচীনতম উৎসৱসমূহৰ ভিতৰত ফল্গুৎসৱ ফাগুন বা চ’ত মাহৰ পূৰ্ণিমা তিথিত পালন কৰা হয়৷ এই উৎসৱ প্ৰাচীন মদন পূজাৰ এক আনুষংগিক উৎসৱ৷ হিন্দুসকলৰ আৰাধ্য দেৱতা শ্ৰীকৃষ্ণ বা বিষ্ণুৰ উদ্দেশ্য কৰি পালন কৰা হয় এই উৎসৱ৷
পৰম্পৰা অনুসৰি শীতজৰ্জৰ মধ্য এছিয়াৰ পৰা প্ৰবজিত হৈ আৰ্য্যসকলে হিন্দুকুশ পৰ্বত পাৰ হৈ ভাৰতৰ সিন্ধু উপত্যকাত প্ৰবেশ কৰিছিল। যেতিয়া শীত ঋতুৱে বিদায় লৈ বসন্তৰ আগমন ঘটে তেতিয়া তেওলোকে মহা আনন্দৰে ঋতুৰাজ বসন্তক আদৰি উৎসৱ পাতিছিল। শীতৰ প্ৰতীকৰূপে ভেড়াৰ মূৰ্তি সাজি তাৰ ওপৰত বুঢ়া-বুঢ়ীৰ মূৰ্তি দুটা ভেড়াৰ নোমেৰে তৈয়াৰী কাপোৰেৰে মেৰিয়াই দিছিল। আৰ্য্যসকলে মৃত্যুদণ্ড দিছিল গ্ৰীস্মৰ আগমনৰ বাৰ্তাবাহক তথা কৰ্মপ্ৰেৰনা যোগোৱা বসন্তক আদৰিবলৈ বুলি এঠাইত একত্ৰিত হৈ মুৰ্তিকেইটা অগ্নিত দাহ কৰি জাৰ পুৰিছিল। সেই সময়ৰ পৰাই ফল্গুৎসৱ পালন কৰি অহা হৈছে বুলি জনবিশ্বাস আছে।
সত্যৰ জয়, ভুলৰ অৱসান, এয়াই ফাকুৱাৰ মূল উদ্দেশ্য। ৰঙৰ আবিৰেৰে ৰঙীয়াই তুলি ভুলবোৰ মচি পেলোৱাৰ বাবেই পালন কৰা হয় ফাকুৱা। ভাৰতৰ বিভিন্ন প্ৰান্তত ফাকুৱা উৎসৱ পালন কৰাৰ প্ৰথা বেলেগ বেলেগ। কোনো ঠাইত ফল্গুৎসৱৰ আগনিশা মেজি সজা হয়। কোনো কোনো ঠাইত, বিশেষকৈ দক্ষিণ ভাৰতত ইজনে সিজনৰ ফাকুৰ ৰঙ সনাৰ আগদিনা হোলীকাক দাহ কৰাৰ প্ৰথা আজিও চলি আহিছে।
দৌলোৎসৱৰ সৈতে ফাকুৱাৰ আছে এক এৰাব নোৱাৰা সম্পৰ্ক। বৈষ্ণৱ বিশ্বাস অনুসৰি, ফাগুন মাহৰ পূৰ্ণিমা তিথিতি শ্ৰী কৃষ্ণই গোপী সকলৰ সৈতে বৃন্দাবনত ৰঙৰ খেলা খেলিছিল। তাৰ পৰাই দৌলোৎসৱৰৰ উৎপত্তি হয়। আনহাতে ফাগুনৰ মাহৰ পূৰ্ণিমা তিথিটোত শ্ৰীকৃষ্ণই গোপী সকলৰ সৈতে এই খেলা কৰাৰ বাবে সেই পূৰ্ণিমা তিথিটোক দৌল পূৰ্ণিমা বা ফল্গু পূৰ্ণিমা বুলিও কোৱা হয়।
হোলীৰ এই ক্ষণ সদায় মধুময়। গালে মুখ আবিৰ সানি পৰম উছাহেৰে সকলোৱে পালন কৰক এই হোলী। সমাজৰ ভুল বোৰ আতৰি নিকা হওক। ফাকুৰ ৰঙে ৰঙীন কৰক সমগ্ৰ পৃথিৱী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
