অসম লাইভ২৪ঃ যিকোনো মুহূৰ্ততেই ডুব যাব পাৰে ৰাজধানী দিল্লী! বিপদসীমাৰ ওপৰেৰে বৈছে যমুনা৷ দিল্লীত ৪৫বছৰীয়া ৰেকৰ্ড ভংগ কৰি যমুনাৰ জলস্তৰ বৃদ্ধি৷ ২০৭.৫৫ মিটাৰ ওপৰেৰে বৈছে যমুনাৰ পানী৷ ১৯৭৮ চনৰ বানৰ পাছত এইবাৰ আকৌ ভয়ংকৰ বানৰ মুখামুখি হৈছে ৰাজধানী দিল্লী৷ এই জলস্তৰ নিশালৈকে আৰু বৃদ্ধি পোৱাৰ সম্ভাৱনা৷ আগন্তুক সতৰ্কতামূলক পদক্ষেপ হিচাপে বানত ক্ষতিগ্ৰস্থ এলেকাসমূহত ১৪৪ধাৰা জাৰি কৰিছে দিল্লী আৰক্ষীয়ে৷
যমুনাৰ জলস্তৰ আৰু অলপ বৃদ্ধি পালেই দিল্লী চহৰৰ ভিতৰলৈকে পানী সোমোৱাৰ সম্ভাৱনাৰ কথা ব্যক্ত কৰিছে দিল্লী প্ৰশাসনে৷ পৰিস্থিতি ক্ৰমে অধিক জটিল হৈ পৰাৰ বাবে জৰুৰী বৈঠকৰ আহ্বান জনাইছে মুখ্যমন্ত্ৰী কেজৰিৱালে৷ দেওবাৰে দুপৰীয়া ১১ বজাত যমুনাৰ জলস্তৰ আছিল ২০৩.১৪ মিটাৰ৷ সোমবাৰে আবেলিলৈ এই জলস্তৰ বৃদ্ধি হৈ হৈছিলগৈ ২০৫.৪মিটাৰ৷ ১৮ঘণ্টাৰ ভিতৰত এই জলস্তৰ আৰু বৃদ্ধি পাই হৈছেগৈ ২০৭.৫৫ মিটাৰ৷
দিল্লীৰ কেইবাটাও এলেকা ইতিমধ্যে প্লাবিত কৰিছে যমুনাৰ পানীয়ে৷ প্লাবিত হৈছে মনাষ্ট্ৰী মাৰ্কেট, কাশ্মীৰি গেট, ৰিং ৰোড৷ ইতিমধ্যে এই অঞ্চলৰ বাসিন্দাসকলক উদ্ধাৰৰ কাম আৰম্ভ কৰিছে দিল্লী প্ৰশাসনে৷ ৰিং ৰোডত অস্থায়ী বান্ধ বান্ধি বানক বাধা দিয়াৰো চেষ্টা চলাইছে প্রশাসনে৷
ইপিনে দিল্লীৰ জলসম্পদ মন্ত্ৰী সৌৰৱ ভৰদ্বাজে সংবাদমাধ্যমক জনোৱা অনুসৰি, ‘পৰিস্থিতিৰ মোকাবিলা কৰিবলৈ দিল্লী চৰকাৰ সম্পূৰ্ণৰূপেই প্ৰস্তুত৷ আমি পৰিস্থিতিৰ ওপৰত সম্পূৰ্ণ নজৰ ৰাখিছো৷ প্ৰয়োজনীয় পদক্ষেপ গ্ৰহণ কৰা হৈছে৷’
ইপিনে মুখ্যমন্ত্ৰী কেজৰিৱালেও সংবাদমেল পাতি দিল্লীৰ জনতাক সাৱধান হ’বলৈ আহ্বান জনাইছে৷ গৃহমন্ত্ৰী অমিত শ্বাহলৈকো সহায় বিচাৰি চিঠি লিখিছে মুখ্যমন্ত্ৰী কেজৰিৱালে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
