অসম লাইভ২৪ঃ ৫০ঘণ্টাৰো অধিক সময় পাৰ হৈছে। উত্তৰকাশীৰ ছিল্কিয়াৰা-বাৰকোটৰ নিৰ্মীয়মান সুৰংগত বৰ্তমান পৰ্যন্ত আৱদ্ধ হৈ আছে ৪০গৰাকী শ্ৰমিক। এই আৱদ্ধ শ্ৰমিকসকলৰ ভিতৰত অসমৰ কোকৰাঝাৰ চহৰৰ দুজন শ্ৰমিক আৱদ্ধ হৈ আছে। সঞ্জয় বসুমতাৰী আৰু ৰামপ্ৰসাদ নাৰ্জাৰীও আৱদ্ধ হৈ আছে উত্তৰাখণ্ডত। পাইপৰ মাধ্যমেৰে তেওঁলোকক অক্সিজেন, ঔষধ আৰু খাদ্য যোগান ধৰি থকা হৈছে। সেই পাইপৰ মাধ্যমেৰে তেওঁলোকৰ সৈতে কথা পাতিবলৈকো চেষ্টা অব্যাহত ৰাখিছে উদ্ধাৰকাৰী দলে।
বিগত তিনিদিন ধৰি সুৰংগতেই আৱদ্ধ হৈ আছে শ্ৰমিকেইজন। আৱদ্ধ শ্ৰমিকক উদ্ধাৰ সন্দৰ্ভত উত্তৰাখণ্ডৰ প্ৰশাসনে জনোৱামতে, ‘আমি আশাবাদী। সকলো পৰিকল্পনামতেই চলিছে। বুধবাৰেই তেওঁলোকক বাহিৰলৈ ওলিয়াই আনিবলৈ চেষ্টা কৰিম। ৮০০ মিঃমিঃ আৰু ৯০০ মিঃমিঃ ব্যাসৰ একাধিক ষ্টিলৰ পাইপ অনা হৈছে। সেইসমূহ ড্ৰিলিং মেছিনেৰে ধ্বংসস্তূপৰ মাজলৈকে সোমোৱাই দিয়া হ’ব। এনেকৈ বিকল্প পথ উলিওৱা হ’ব। সেই পথেৰেই শ্ৰমিকসকলক বাহিৰলৈ উলিয়াই অনা হ’ব।’
এই সন্দৰ্ভত উত্তৰাখণ্ডৰ আৰক্ষী বিষয়া অৰ্পণ যদুবংশীয়ে কয়, ‘তেওঁলোক সুস্থ অৱস্থাত আছে। অক্সিজেন, খাদ্য, ঔষধ সকলো যোগান ধৰি থকা হৈছে। কিছুসংখ্যকৰ বমি বমি ভাৱে দেখা দিছে। তেওঁলোকলৈ ঔষধ দিয়া হৈছে। অক্সিজেন পাইপৰ মাধ্যমেৰেই তেওঁলোকক পৰিয়ালৰ সৈতে কথা পতাৰ ব্যৱস্থা কৰি দিয়া হৈছে। অৱশ্যে এই উদ্ধাৰকাৰ্য সহজ নহয়। একাধিক প্ৰত্যাহ্বান ঠেলি আমি উদ্ধাৰ অভিযান অব্যাহত ৰাখিছো।’
মঙলবাপৰে সুৰংগ নিৰ্মাণকাৰী সংস্থা নেশ্ব্যনেল হাইৱে এণ্ড ইনফ্ৰাষ্ট্ৰাকচাৰ ডেভেলপমেণ্ট কৰ্পৰেছন লিমিটেডৰ এগৰাকী উচ্চ পদস্ত বিষয়াই ঘটনাস্থল পৰিদৰ্শন কৰি প্ৰতিকূলতাৰ বুজ লৈছে। উদ্ধাৰকাৰী দলৰ তৰফৰ পৰা জনোৱা অনুসৰি সুৰংগৰ মাজত প্ৰায় ২০০ মিটাৰ এলেকালৈকে খহি পৰিছে। ডাঙৰ ডাঙৰ শিল, বোল্ডাৰ ভাঙি পৰাৰ ফলত সম্পূৰ্ণ অংশই বিচ্ছিন্ন হৈ পৰিছে। শ্ৰমিকসকল আনটো প্ৰান্তত আৱদ্ধ হৈ আছে। সুৰংগৰ ভিতৰত খহি অহা শিল কাটিবলৈ চেষ্টা চলাই থকা হৈছে। ইয়াৰোপৰি পাইপেৰে বিকল্প পথ তৈয়াৰৰ কামো চলি আছে। এই উদ্ধাৰকাৰ্যত ৫০০ জনকৈ অভিযন্তা জড়িত হৈ আছে।
সোমবাৰে পুৱা ঘটনাস্থললৈ হৰিদ্বাৰৰ পৰা ট্ৰাকেৰে মুঠ ৮টা পাইপ অনা হৈছে। সুৰংগৰ ভিতৰত ড্ৰিলিং কৰি সোমাবলৈ কিমান সময় লাগিব সেই কথাৰ উত্তৰ অৱশ্যে বৰ্তমানো দিব পৰা নাই উদ্ধাৰকাৰী দলে। উদ্ধাৰকাৰ্য আৰম্ভ কৰাৰ প্ৰাৰম্ভিক কালত ৩০ মিটাৰ ওখ শিল কাটি কিছু ভিতৰলৈ সোমাইয়ো গৈছে উদ্ধাৰকাৰী দল। কিন্তু সুৰংগৰ ওপৰৰ পৰা মাটি খহি সেই পথো আকৌ বন্ধ হৈ পৰে। আকৌ যাতে মাটি খহি অন্য বিপদ নাহে তাৰবাবে ‘শটক্ৰেটিং’ নামৰ এক বিশেষ পদ্ধতিৰে অত্যন্ত দ্ৰুতগতিত কংক্ৰিট স্প্ৰে কৰা হৈছে। ইয়াৰ ফলত মাটি খহাৰ সম্ভাৱনা কিছু কমিছে।
দুৰ্যোগ প্ৰশমন বিভাগৰ দলো সেই স্থানত উপস্থিত হৈছে। তেওঁলোকে সুৰংগৰ ভিতৰত যাতে অইন কোনো লোকে সোমাবলৈ চেষ্টা নকৰে সেই বিষয়টোত গুৰুত্ব দিছে। এগৰাকী শীৰ্ষ অধিকাৰীয়ে এই সন্দৰ্ভত কয়, ‘স্থানীয় ৰাজনৈতিক নেতাসকলে বাৰে বাৰে ভিতৰত সোমাই আমাক অসুবিধা দি আছে। প্লিজ ইয়াত ৰাজনীতি নকৰিব। আমাক কাম কৰিবলৈ সুবিধা দিয়ক। আমাৰ একমাত্ৰ লক্ষ্য এতিয়া ভিতৰত আৱদ্ধ শ্ৰমিকক উদ্ধাৰ কৰা।’ ইফালে ইকোলজিকেল বিশেষজ্ঞইয়ো এই সন্দৰ্ভত কয়, ‘স্থানীয় পৰিবেশ তথা মাটি পৰীক্ষা নকৰাকৈ এনেকৈ সুৰংগ নিৰ্মাণ কেতিয়াও বিপদমুক্ত নহয়। চাৰ ধাম অল ৱেদাৰ প্ৰজেক্টৰ চেয়াৰমেন পদত থকা ৰবি চোপ্ৰাইয়ো এই বিষয়টোক লৈ বিৰোধিতা কৰিয়েই পদত্যাগ কৰিছে। এনেকৈ নিৰ্মাণ কৰিলে প্ৰাকৃতিক ভাৰসাম্য নষ্ট হয়।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
