অসম লাইভ ২৪ঃ ১২ বছৰ পূৰ্বে হত্যা কৰা হৈছিল তেওঁক। সেই অপৰাধত কাৰাবাসো খাটিছিল ৬ জনে। কিন্তু ১২ বছৰৰ পাছত হত্যা কৰা সেই মহিলাৰ সন্ধান পোৱা গ’ল। তেওঁ দিব্বি বেছেবৰ্তত বিয়া কৰাই সুন্দৰভাৱে সংসাৰ কৰি আছে। আশ্চৰ্যজনক এই ঘটনা সংঘটিত হৈছে উত্তৰ প্ৰদেশৰ জালাউন জিলাত। ২০০৮ বৰ্ষত সেইগৰাকী মহিলাৰ বয়স আছিল মাত্ৰ ১৪ বছৰ। হঠাৎ এদিন সন্ধানহীন হয় তেওঁ। কুতুওয়ালী আৰক্ষী থানাত মহিলাগৰাকীৰ নামত সন্ধানহীন সন্দৰ্ভত এজাহাৰ দাখিল কৰা হয়। ইয়াৰ পাছতেই ঘাতমপুৰ অঞ্চলত এগৰাকী কিশোৰীৰ মৃতদেহ উদ্ধাৰ হয়। আৰু সেই মৃতদেহ সন্ধানহীন কিশোৰীগৰাকীৰ বুলি চিনাক্ত কৰে কিশোৰীগৰাকীৰ মাতৃয়ে। ছগৰাকী ব্যক্তিৰ বিৰুদ্ধে মাতৃয়ে অপহৰণ কৰি হত্যা কৰাৰ অভিযোগ দাখিল কৰে। এই ঘটনাই কঁপাই গৈছিল সমগ্ৰ উত্তৰ প্ৰদেশ। মাতৃৰ বিভিন্ন অভিযোগৰ বাবে স্থানীয় আৰক্ষীৰ পৰা CBI লৈ এই ঘটনাৰ তদন্ত স্থানান্তৰিত হয়। অভিযুক্ত ৬ ব্যক্তিকে জেললৈ প্ৰেৰণ কৰা হয়। হত্যাত অভিযুক্ত এজনক আৰক্ষীৰ সন্মুখতে প্ৰহাৰ কৰি হত্যা কৰা হয়। আৰু ১২ বছৰৰ পাছত এই ঘটনাই নতুন মোৰ লয়। উত্তৰ প্ৰদেশৰ আলিগড়ত সন্ধান পোৱা যায় কিশোৰীগৰাকীৰ। ১২ বছৰ পূৰ্বে সন্ধানহীন হোৱা ১৪ বছৰীয়া কিশোৰীগৰাকী এতিয়া ২৬ বছৰ হ’ল। আলিগড়তেই বিবাহপাশত আৱদ্ধ হৈ সংসাৰ কৰিছে তেওঁ। এতিয়া পুনৰ আৰম্ভ হৈছে তদন্ত। দীৰ্ঘ বছৰ ক’ত আছিল, কিয় ঘৰলৈ ঘূৰি আহিছে, সেই বিষয়ত তদন্তৰ নিৰ্দেশ দিয়া হৈছে। আদালতৰ নিৰ্দেশ অনুযায়ী এতিয়া হাজিৰ হ’ব লাগিব মহিলাগৰাকীক। য’ত মহিলাগৰাকীৰ ভাষ্য গ্ৰহণ কৰা হ’ব। মহিলাগৰাকীৰ ভাষ্যৰ ওপৰত ভিত্তি কৰি হত্যাত অভিযুক্ত ৬ জনক ক্লীনশ্বীট দিয়া হ’ব বুলি জনাইছে আৰক্ষী বিষয়া যশবীৰ সিঙে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
