আইচক্ৰীমত ওলাল মানুহৰ আঙুলি, আধা খোৱাৰ পাছত দেখা পাই হাহাকাৰ
সামাজিক মাধ্যমত ভাইৰেল হৈ পৰিছে এখন ফটো। আইচক্ৰীমত ওলাল মানুহৰ আঙুলি। খাই থকা অৱস্থাত হঠাতে মানুহৰ কটা যোৱা আঙুলি দেখি হাহাকাৰ। আনলাইন যোগে অৰ্ডাৰ কৰিছিল এই আইচক্ৰীম।
মুম্বাইৰ মালাডৰ এজন ব্যক্তিয়ে অনলাইনযোগে আইচক্ৰীমৰ অৰ্ডাৰ দিছিল। অৰ্ডাৰ অহাৰ পাছত লোকগৰাকীয়ে মজাৰে আইচক্ৰীম খাই থাকে, কিন্তু হঠাতে আইচক্ৰীমৰ কনৰ ভিতৰত মানুহৰ আঙুলিৰ টুকুৰা এটা উদ্ধাৰ কৰে। লগে লগে হাহাকাৰ লাগি যায়। পিছত ব্যক্তিজনে ওচৰৰ মালাড থানাত উপস্থিত হৈ এই বিষয়ে অৱগত কৰে।
আৰক্ষীয়ে ইয়াম্মো আইচক্ৰীম কোম্পানীৰ বিৰুদ্ধে গোচৰ ৰুজু কৰি তদন্ত আৰম্ভ কৰিছে। আৰক্ষীয়ে এই আইচক্ৰীমত পোৱা মানুহৰ আঙুলিৰ টুকুৰাটো অধিক নিশ্চিতকৰণৰ বাবে ফৰেনছিক পৰীক্ষাৰ বাবে প্ৰেৰণ কৰিছে।
ঘটনা সন্দৰ্ভত লোকগৰাকীয়ে জনায় যে, ইয়াম্মো আইচক্ৰীম কোম্পানীৰ পৰা অনলাইনত এই আইচক্ৰীম অৰ্ডাৰ কৰিছিল। আইচক্ৰীমটো আধাতকৈও বেছি খাই দিছিল, তেতিয়াই দেখা পাই কিবা এটা অদ্ভুত আছে আইচক্ৰীমটোত। এটা কামোৰ মাৰি লোকগৰাকীয়ে জানিব পাৰে যে মুখত আইচক্ৰীমৰ সলনি কি সোমাইছে। লগে লগে মুখৰ পৰা টুকুৰাটো উলিয়াই চাই দেখে যে সেইটো কাৰোবাৰ আঙুলি।
আঙুলি দেখি স্তম্ভিত হৈ পৰে লোকগৰাকী। পেছাত এম বি বি এছৰ ডাক্তৰ হোৱাৰ বাবে তেওঁ জানিছিল যে সেয়া কাৰোবাৰ বুঢ়া আঙুলি। বুঢ়া আঙুলিত নখ আৰু আঙুলিৰ ছাপো দেখা পালে। ইয়াৰ পিছত প্ৰথমে আঙুলিটো বৰফত ৰাখি তাৰ পিছত লগে লগে থানাত উপস্থিত হৈ ৰিপৰ্ট দাখিল কৰে।
মালাড আৰক্ষীয়ে কোম্পানীটোৰ বিৰুদ্ধে এফআইআৰ ৰুজু কৰিছে। আইচক্ৰীমত পোৱা আঙুলিটোক এটা ডাঙৰ ষড়যন্ত্ৰ বুলি গণ্য কৰা হৈছে আৰু মুম্বাই মালাড আৰক্ষীয়ে ২৭২, ২৭৩ আৰু ৩৩৬ ধাৰাত এফআইআৰ ৰুজু কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
