দেশ এৰাৰ পাছত প্ৰথমবাৰৰ বাবে মুখ খুলিছে শ্বেখ হাছিনাই৷ বংগবন্ধু মুজিবৰ ৰহমানক চৰম অৱমাননা কৰা হৈছে বুলি বিবৃতিযোগে প্ৰকাশ কৰিছে শ্বেখ হাছিনাই৷ এই বিবৃতিতেই একেলগে মুক্তিযোদ্ধাসকলক কৰা অপমানৰ কথাও প্ৰকাশ কৰিছে হাছিনাই৷ এই অপমানৰ বিচাৰ লাগিব বুলিও জনাইছে সদ্যপ্ৰাক্তন প্ৰধানমন্ত্ৰী শ্বেখ হাছিনাই৷
আগন্তুক ১৫ আগষ্টত ধানমাণ্ডিত বংগবন্ধু ভৱনলৈ গৈ পুষ্পমাল্য অৰ্পণ কৰিবলৈ আৱেদন জনাইছে হাছিনাই৷ মঙলবাৰে বাংলাদেশৰ অন্তৰ্বৰ্তী চৰকাৰে ১৫ আগষ্টৰ ছুটী বাতিল কৰিছে৷ মুহাম্মদ ইউনূছৰ সভাপতিত্বত হোৱা উপদেষ্টা পৰিষদৰ বৈঠকত এই ছুটী বাতিলৰ সিদ্ধান্ত লোৱা হৈছে৷
বিভিন্ন ৰাজনৈতিক দলৰ সৈতে আলোচনাৰ প্ৰেক্ষিতত আৰু ঐক্যমতৰ ভিত্তিত এই সিদ্ধান্ত লোৱা হৈছে বুলি জনাইছে৷ আৰু এই দিনটোত হাছিনাৰ বক্তব্যক নিজৰ ফেছবুক পোষ্টত জনাইছে শ্বেখ হাছিনাৰ পুত্ৰ সজীৱ ৱাজেদ জয়ে৷
উল্লেখ্য যে বিগত ৫ আগষ্ট তাৰিখে বাংলাদেশ এৰিছে হাছিনাই৷ সেইদিনাই ভাঙি চুৰমাড় কৰা হৈছে ধানমাণ্ডিত থকা বংগবন্ধু জাদুঘৰ৷ বাংলাদেশ জুৰি ভাঙি চুৰমাড় কৰা হৈছে মুক্তিযুদ্ধাৰ স্মৃতি সম্বলিত বিভিন্ন সৌধ আৰু ভাস্কৰ্য৷ ভাঙি দিয়া হৈছে বংগবন্ধুৰ মূৰ্তি৷ হাছিনাই প্ৰকাশ কৰামতে, যিসকলে বাংলাদেশৰ স্বাধীন জাতি হিচাপে আত্মমৰ্যদা আৰু আত্মপৰিচয় পাইছে তেওঁলোককেই এইসকলে অৱমাননা কৰিছে৷
১৯৭৫ চনৰ ১৫ আগষ্টত সপৰিয়ালে হত্যা কৰা হৈছিল বাংলাদেশৰ জাতিৰ পিতা বংগবন্ধু শ্বেখ মুজিবুৰ ৰহমানক৷ সেইদিনা কেনেকৈ তেওঁক হত্যা কৰা হৈছিল সেই কথাও বিবৃত্তিত উল্লেখ কৰিছে হাছিনাই৷ ১৯৭৬ চনৰ পৰাই বাংলাদেশত ১৫ আগষ্টৰ দিনটো জাতীয় শোক দিৱস হিচাপে পালন কৰি অহা হৈছে৷ কিন্তু সেই শোক দিৱসৰ ছুটীয়েই বাতিল কৰিছে বাংলাদেশৰ অন্তৰ্বৰ্তীকালীন চৰকাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
