ইতিহাস ৰচি পাৰ্থৰ অপ্টাছ ষ্টেডিয়ামত অপৰাজেয় অষ্ট্ৰেলিয়াৰ দুৰ্গত ভাৰতে উৰুৱালে ত্ৰিৰংগা
প্ৰথম ইনিংছত দুইগৰাকী ভাৰতীয় অপেনিং বেটছমেন ব্যৰ্থ। তাৰ পাছত দলৰ ইনিংছ চম্ভালে মহিন্দৰ অমৰনাথ আৰু গুন্দাপ্পা বিশ্বনাথে। প্ৰথম ইনিংছত ভাৰতৰ সংগ্ৰহ ২৫৬ ৰান। প্ৰত্যুত্তৰত অষ্ট্ৰেলিয়াৰ প্ৰথম ইনিংছত গেৰী ক’জিয়াৰ আৰু ক্ৰেইগ ছাৰজেণ্টে ভাৰতলৈ ভাবুকি আনিছিল যদিও ভাৰতৰ লেগ স্পীনাৰ ভগৱত চন্দ্ৰশেখৰে মেৰুদণ্ড ভাঙি দিয়ে অষ্ট্ৰেলিয়াৰ বেটিং লাইন আপৰ।
চন্দ্ৰশেখৰে ৫২ ৰানৰ বিনিময়ত ৬ টা উইকেট দখল কৰি অষ্ট্ৰেলিয়াক ২১৩ ৰানত সীমিত কৰে। ৪৩ ৰানৰ অগ্ৰগতিৰে ভাৰতে আৰম্ভ কৰা দ্বিতীয় ইনিংছত কিংবদন্তি অপেনাৰ সুনীল গাভাস্কাৰে অৰ্জন কৰে দৰ্শনীয় শতক। দ্বিতীয় ইনিংছত ৩৪৩ ৰান সংগ্ৰহ কৰি অষ্ট্ৰেলিয়াক ৩৮৭ ৰানৰ বিজয়লক্ষ্য বান্ধি দিয়ে ভাৰতে।
দ্বিতীয় ইনিংছতো চন্দ্ৰশেখৰৰ স্পীন ঘূৰ্ণীত তচনচ হৈ অষ্ট্ৰেলিয়া অল আউট হয় মাত্ৰ ১৬৪ ৰানত। ভাৰত জয়ী হয় ২২২ ৰানৰ বৃহৎ ব্যৱধানত। এয়া ১৯৭৭ চনত মেলবৰ্নত হোৱা ভাৰত আৰু অষ্ট্ৰেলিয়াৰ মাজৰ টেষ্ট মেচ।
আজি হৰ্ষিত ৰানাই এলেক্স কেৰীক ক্লীন ব’ল্ড কৰাৰ আগলৈকে এয়া আছিল অষ্ট্ৰেলিয়াৰ মাটিত ভাৰতৰ সৰ্ববৃহৎ জয়।
২২ নৱেম্বৰৰ পৰা অষ্ট্ৰেলিয়াত আৰম্ভ হৈছে ভাৰত-অষ্ট্ৰেলিয়াৰ মাজৰ ব’ৰ্ডাৰ-গাভাস্কাৰ ট্ৰফী। নৱাগত নীতিশ ৰেড্ডী আৰু হৰ্ষিত ৰানাক দলত লৈ অষ্ট্ৰেলিয়াৰ বিৰুদ্ধে খেলপথাৰত নামিছিল বুমৰাহ এণ্ড কোম্পানী। প্ৰথম টেষ্টৰ প্ৰথম ইনিংছতে বেটিং ব্যৰ্থতা প্ৰদৰ্শন কৰা ভাৰতীয় দলে চিন্তিত কৰি তুলিছিল কোটি কোটি ক্ৰিকেট অনুৰাগীক। কিন্তু পিছমুহূৰ্ততে বুকু ফিন্দাই থকা অষ্ট্ৰেলিয়াক উভতি ধৰে ভাৰতৰ বলাৰে।
ৰোহিত শৰ্মাৰ অনুপস্থিতিত অধিনায়কৰ দায়িত্ব লাভ কৰা যচপ্ৰীত বুমৰাহে খহায় অষ্ট্ৰেলিয়াৰ ইনিংছ। মাত্ৰ ১০৪ ৰানত অল আউট অষ্ট্ৰেলিয়া। দ্বিতীয় ইনিংছত আৰম্ভণিৰে পৰাই অষ্ট্ৰেলিয়ান বলাৰক দিশহাৰা কৰে ভাৰতৰ অপেনিং যুটি যশস্বী জয়ছোৱাল আৰু কে এল ৰাহুলে। ২০১ ৰানৰ দলীয় স্ক’ৰত ৭৭ ৰান কৰি আউট হয় কে এল ৰাহুল। বিৰাট কোহলীৰ সংগ লাভ কৰি জয়ছোৱালে পুনৰ আৰম্ভ কৰে অষ্ট্ৰেলিয়ান বলাৰ আক্ৰমণ।
১৬১ ৰানৰ এক দৰ্শনীয় ইনিংছ খেলি আউট হয় যশস্বী জয়ছোৱাল। ইয়াৰ পাছতে ছন্দলৈ ওভতা তাৰকা বেটছমেন বিৰাট কোহলীয়ে অৰ্জন কৰে টেষ্ট কেৰিয়াৰৰ ৩০ সংখ্যক শতক। দ্বিতীয় ইনিংছত ৬ উইকেটৰ বিনিময়ত ৪৮৭ ৰান সংগ্ৰহ কৰি ইনিংছ ঘোষণা কৰে ভাৰতে।
৫৩৪ ৰানৰ বিশাল লক্ষ্য লৈ দ্বিতীয় ইনিংছ আৰম্ভ কৰা অষ্ট্ৰেলিয়াক আৰম্ভণিতেই বেকফুটত ঠেলি দিয়ে বুমৰাহ আৰু মহম্মদ ছিৰাজে। আৰু পেভিলিয়নমুখী কৰে ইজনৰ পাছত সিজন অষ্ট্ৰেলিয়ান খেলুৱৈ। ২৩৮ ৰানত অল আউট হৈ ২৯৫ ৰানৰ বৃহৎ ব্যৱাধন পৰাজয় স্বীকাৰ কৰে অষ্ট্ৰেলিয়াই। অষ্ট্ৰেলিয়াৰ মাটিত এয়া ভাৰতৰ সৰ্ববৃহৎ জয়। পাৰ্থৰ অপ্টাছ ষ্টেডিয়ামত ইয়াৰ আগলৈকে অপৰাজেয় আছিল অষ্ট্ৰেলিয়া। অৱশেষত আজি অষ্ট্ৰেলিয়াৰ দুৰ্গত ভাৰতে উৰুৱালে ত্ৰিৰংগা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
