চিনেমা চিনেমা লগা এক সঁচা কাহিনী৷ তৰুণীৰ সপোন কোটিপতি হ’ব৷ কেনে লাগে কোটিপতি হোৱাৰ অনুভৱ পাবলৈকে অহোপুৰুষাৰ্থ৷ অৱশ্যে নিজাকৈ প্ৰতিষ্ঠিত হৈ কোটিপতি হ’ব তেনে অধ্যবসায় কৰা নাছিল তৰুণীয়ে৷ কোটিপতি হ’বৰ বাবে তেওঁ বাচি ল’লে বিশেষ পন্থা৷ বিবাহেই এনে এক সহজ পন্থা যাৰ জৰিয়তে কোনো কষ্ট নকৰাকৈয়ে কোটিপতি হ’ব পাৰি বুলি তেওঁৰ মনত এক ধাৰণাৰ সৃষ্টি হয়৷ ধাৰণা কৰাধৰণেই হাতে কামে নামিও পৰে তেওঁ৷ তাৰবাবে তৰুণীয়ে সন্ধান কৰিবলৈ ধৰিছে কোটিপতি যুৱকৰ৷ কোটিপতি যেন লগা পাত্ৰ দেখিলেই তেওঁ মেট্ৰিমনি চাইটত গৈ যুৱকক বিবাহৰ প্ৰস্তাৱ দিবলৈ ধৰিছে৷ শেষত আশা কৰাধৰণেই তেওঁৰ জালত পৰিল কোটিপতি যুৱকো৷
এনেকৈ এখন দুখলকৈ কেইবাখনো বিবাহ কৰাই তেওঁ এতিয়া কোটিপতি৷ সৰ্বভাৰতীয় সূত্ৰৰ খবৰ অনুসৰি এই ধৃত যুৱতীৰ নাম সীমা৷ আৰক্ষীয়ে জনাইছে যে এই ধৃত যুৱতী উত্তৰাখণ্ডৰ বাসিন্দা৷ ২০১৩ চনত আগ্ৰাৰ এগৰাকী নামী ব্যৱসায়ীক বিয়া কৰাইছিল সীমাই৷ কিছুদিন সংসাৰ কৰাৰ পাছত ব্যৱসায়ী আৰু তেওঁৰ পৰিয়ালৰ বিৰুদ্ধে গোচৰ কৰে৷ শেষত ক্ষতিপূৰণ হিচাপে তেওঁ ৭৫লাখ টকা লৈ বিচ্ছেদ লয়৷
২০১৭ চনত গুৰুগ্ৰামৰ এগৰাকী ছফ্টৱেৰ ইঞ্জিনিয়াৰৰ সৈতে দ্বিতীয়বাৰ বিবাহবন্ধনত আৱদ্ধ হৈছিল তেওঁ৷ তাতো কিছুদিন থকাৰ পাছত বিবাহ বিচ্ছেদৰ বাবে গোচৰ ৰুজু কৰে৷ তাতো তেওঁ ১০লাখ টকা ক্ষতিপূৰণ লয়৷ ইয়াৰপাছেই ২০২৩ চনত আকৌ জয়পুৰৰ এগৰাকী ব্যৱসায়ীৰ সৈতে তৃতীয়বাৰ বিবাহত আৱদ্ধ হয়৷ এই বিবাহত অৱশ্যে তেওঁ কোনো বিবাহবিচ্ছেদৰ গোচৰ ৰুজু কৰা নাছিল৷ বৰং সুখী দাম্পত্যৰ অভিনয় কৰি হঠাৎ এদিন সোণৰ গহনা আৰ ৩৬লাখ টকাৰ সোণ চুৰি কৰি পলাই যায়৷ এই পৰিয়ালৰ তৰফৰ পৰা দিয়া অভিযোগ অনুসৰি সীমাক অৱশেষত গ্ৰেপ্তাৰ কৰিছে জয়পুৰ আৰক্ষীয়ে৷
আৰক্ষীয়ে জনাইছে যে মেট্ৰিমনি চাইটত চাই চাই পাত্ৰক টাৰ্গেট কৰে তেওঁ৷ বিশেষকৈ ডিভোৰ্ছ হোৱা পুৰুষ, স্ত্ৰীৰ মৃত্যু হোৱা পুৰুষ আৰু ধনী পাত্ৰক তেওঁ টাৰ্গেট কৰে৷ ভিন্ন ৰাজ্যত গৈ বিবাহত সোমাই সম্পত্তি লৈ ডিভোৰ্ছ দিয়াটোৱেই পেছা তেওঁৰ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
