মাহিলী আয় মাত্ৰ ১০ হাজাৰ টকা৷ পেছা ৰেপিড’ বাইক চালক৷ অথচ তেওঁৰ বেংক একাউণ্টত লেনদেন হৈছে ৩০০ কোটি টকাতকৈয়ো বেছি৷ এই অস্বাভাৱিক লেনদেনৰ সূত্ৰ ধৰি গুজৰাটৰ আহমেদাবাদত ফাঁচ হৈছে বিশাল আৰ্থিক জালিয়াতিৰ চক্ৰ৷ তদন্তত নামি Enforcement Directorate (ইডি)য়ে জানিব পাৰিছে যে বেআইনী ক্ৰিকেট বেটিং, শ্বেয়াৰবজাৰৰ কৰ চুৰিৰ দৰে জালিয়াতিৰ মাধ্যমেৰে প্ৰায় ৫৫০ কোটিৰ আৰ্থিক লেনদেন হৈছে সেই একাউণ্টত৷
তদন্তকাৰী সংস্থাৰ সূত্ৰৰ খবৰ অনুসৰি প্ৰাথমিকভাৱে প্ৰদীপ ওডে নামৰ এই ৰেপিড’ চালকৰ বেংক একাউণ্ট ট্ৰানজেকছনে প্ৰথমে সন্দেহ জন্মায়৷ ইমান অলপ আয়ৰ এজন ব্যক্তিৰ একাউণ্টত এই বিপুল অংকৰ লেনদেন দেখিয়েই সন্দেহ হয় তদন্তকাৰীৰ৷ পাছত জনা যায় যে তেওঁৰ একাউণ্ট বেআইনী অনলাইন ক্ৰিকেট বেটিং আৰু শ্বেয়াৰবজাৰৰ চাৰ্কুলাৰ ট্ৰেডিঙত ব্যৱহাৰ হৈছে৷
ইডিৰ সোধপোছত প্ৰদীপে স্বীকাৰ কৰিছে যে তেওঁৰ এই একাউণ্টটো ২৫ হাজাৰ টকাৰ বিনিময়ত তেওঁ ভাড়া দিছিল৷ কিৰণ পাৰমাৰ নামৰ এজন ব্যক্তিয়ে ভাড়া লৈছিল তেওঁৰ বেংক একাউণ্ট৷ প্ৰতিখন চেকত চহী কৰাৰ বাবে তেওঁক ৪০০ টকাকৈ দিছিল৷ তেওঁৰ পৰিচয়পত্ৰ ব্যৱহাৰ কৰি প্ৰদীপ এণ্টাৰপ্ৰাইজ নামৰ এটা সংস্থাও খোলা হয়৷ তদন্তত লগতে জনা গৈছে যে ২০২৪ চনত কনলেশ ট্ৰেডিং আৰু ৰৌনক ট্ৰেডাৰ্ছ নামৰ আৰু দুটা সংস্থাও কাগজে কলমে তৈয়াৰ কৰা হৈছিল৷ বাস্তৱত এই ধৰণৰ কোনো ব্যৱসায়িক সংস্থাই নাই৷ সকলোবোৰ ভুৱা৷
এই তিনি সংস্থাৰ বেংক একাউণ্টত মুঠ ৫৫০ কোটিৰ লেনদেনৰ তথ্য পোৱা গৈছে৷ পৃথকভাৱে ৮০.৫০ কোটি, ৫২.১১ কোটি আৰু ২২.৮৬ কোটি টকা তিনিটা পৃথক সংস্থাৰ হিচাপ স্থানান্তৰিত হৈছে বুলি জনাইছে তদন্তকাৰীয়ে৷ অভিযোগ, অনলাইন বেটিঙৰ পৰা সংগৃহীত অৰ্থ শ্বেয়াৰবজাৰৰ ভুৱা লেনদেনৰ মাধ্যমেৰে বগা কৰা হৈছিল৷
ই ডিয়ে ইতিমধ্যেই আহমেদাবাদ ক্ৰাইম ব্ৰাঞ্চত অভিযোগ দাখিল কৰিছে৷ তদন্তত আগুৱাইছে অৰ্থৰ উৎস, প্ৰকৃত উপক্ষোক্তা আৰু চক্ৰৰ মূলহোতা বিচাৰি বাহিৰ কৰা৷ সূত্ৰৰ দাবী, আকৌ গ্ৰেপ্তাৰি আৰু সম্পত্তি বাজেয়াপ্তৰ সম্ভাৱনা উৰাই দিব নোৱাৰি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
