দক্ষিণৰ ছুপাৰষ্টাৰ ৰাম চৰণ অভিনীত বহু প্ৰত্যাশিত চিনেমা ‘পেড্ডী’ (Peddi)ৰ বাবে এতিয়া চিনেমাপ্ৰেমীৰ মাজত উত্তেজনা তুংগত উঠিছে। ইফালে পৰিচালক বুচি বাবু ছানাই ছবিখনৰ কাষ্টিং সন্দৰ্ভত এক আচৰিত তথ্য প্ৰকাশ কৰিছে। জাহ্নৱী কাপুৰক ছবিখনত ‘অচিয়াম্মা’ নামৰ এক গুৰুত্বপূৰ্ণ মহিলা চৰিত্ৰৰ বাবে আনুষ্ঠানিকভাৱে চুক্তিবদ্ধ হোৱাৰ পূৰ্বে এই চৰিত্ৰটোৰ প্ৰস্তাৱ প্ৰকৃততে কাপুৰ পৰিয়ালৰ আন এজন সদস্যৰ ওচৰলৈ গৈছিল। তেওঁ আন কোনো নহয় জানহৱীৰ সৰু ভনীয়েক খুশী কাপুৰ!
শেহতীয়াকৈ ‘M9’ মিডিয়াৰ সৈতে হোৱা এক সাক্ষাৎকাৰত ছবিখনৰ প্ৰচাৰৰ সময়ত পৰিচালক বুচি বাবু ছানাই কয় যে, আৰম্ভণিতে তেওঁ ছবিখনৰ চিত্ৰনাট্য খুশী কাপুৰক বৰ্ণনা কৰিছিল। কিন্তু তেওঁৰ ব্যক্তিগতভাৱে লগ পোৱাৰ পিছত পৰিচালকে অনুভৱ কৰিলে যে চৰিত্ৰটোৰ আৱেগিক গভীৰতা আৰু শাৰীৰিক দাবীৰ লগত খুশী উপযুক্ত নহয়।
পৰিচালকে কয়, “মই প্ৰথমে খুশী কাপুৰক কাহিনীটো বৰ্ণনা কৰিছিলোঁ। কিন্তু তেওঁৰ মুখামুখিকৈ দেখাৰ পিছত মই বুজিলোঁ যে খুশী এই চৰিত্ৰতকৈ বেছি সৰু। এতিয়া কল্পনা কৰক, এগৰাকী ভগ্নী আৰু এগৰাকী ডাঙৰ ভনীয়েক একেখন ঘৰতে থাকে। ভনীয়েকক প্ৰত্যাখ্যান বা বাদ দি একেটা চৰিত্ৰ বা চিত্ৰনাট্য বায়েক জাহ্নৱীক কোৱাটো কিমান অস্বস্তিকৰ!”
পৰিচালকগৰাকীয়ে লগতে কয়, “মই খুশীক এৰি দিয়াৰ কাৰণটোও বুজাই দিলোঁ। মই মাত্ৰ খুশীলৈ চাই তোমাক এই ছবিখনত ল’ব নোৱাৰো বুলি ক’লো আৰু ভনীয়েকক বিচাৰিলো। এনে কঠিন সিদ্ধান্ত ছবিখনৰ স্বাৰ্থত আৰু ছবিখনৰ মংগলৰ বাবে ল’ব লাগিব। আচলতে আৰম্ভণিৰে পৰাই মই অনুভৱ কৰিছিলো যে জাহ্নৱীয়ে এই চৰিত্ৰটোৰ বাবে সৰ্বোত্তম ফিট হ’ব। আনকি কাহিনীটো কওঁতে মই অনুভৱ কৰিছিলো।”
মন কৰিবলগীয়া যে ৰাম চৰণ আৰু জাহ্নৱী কাপুৰে প্ৰথমবাৰৰ বাবে ৰূপালী পৰ্দাত ‘পেড্ডী’ ছবিখনৰ সৈতে টিম আপ কৰিছে। ২০২৬ চনৰ অন্যতম প্ৰত্যাশিত ছবি হিচাপে ইতিমধ্যে এই ছবিখনক লৈ যথেষ্ট হাইপ চলি আছে। আশীৰ দশকৰ অন্ধ্ৰ প্ৰদেশৰ গ্ৰাম্য পৰিৱেশত নিৰ্মিত এই ছবিখন ক্ৰীড়াৰ লগতে এক্সনেৰে ভৰপূৰ হ’ব।
ৰাম চৰণ আৰু জাহ্নৱী কাপুৰৰ উপৰি এই হাই ভল্টেজ ছবিখনত কানাড়া ছুপাৰষ্টাৰ শিৱ ৰাজকুমাৰক অতি আকৰ্ষণীয় কেমিঅ’ চৰিত্ৰত দেখা যাব বুলিও জানিব পৰা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
