আমেৰিকাৰ ৰাজনীতিত আফগান যুৱতী আয়েশাৰ ইতিহাস

২১ আগষ্টত প্ৰগতিশীল ডেম’ক্ৰেট আয়েশা ৱাহাবে এক উল্লেখযোগ্য জয়লাভ কৰে। কেলিফৰ্ণিয়াত অনুষ্ঠিত বিশেষ নিৰ্বাচনত জয়ী হৈ তেওঁ আমেৰিকাৰ কংগ্ৰেছৰ প্ৰথমগৰাকী আফগান-আমেৰিকান সদস্য হিচাপে ইতিহাস ৰচনা কৰে। ৩৯ বছৰীয়া আয়েশাই নিজৰ দলৰে প্ৰাৰ্থী মেলিছা হাৰ্নাণ্ডেজক ৫৩.১ শতাংশ ভোটেৰে পৰাস্ত কৰে।
এই আসনখন পূৰ্বতে কংগ্ৰেছৰ প্ৰাক্তন সদস্য এৰিক শ্বোৱালৱেলৰ আছিল। যৌ*ন অসৎ আচৰণৰ অভিযোগৰ পিছত এপ্ৰিলত এৰিকে পদত্যাগ কৰিছিল। আয়েশাই জানুৱাৰী মাহলৈকে এই পদত কাৰ্যনিৰ্বাহ কৰিব। কিন্তু কংগ্ৰেছলৈ যোৱাৰ এই যাত্ৰা আয়েছাৰ বাবে সহজ নাছিল। শৈশৱৰ পৰাই তেওঁ বহু কঠিন পৰিস্থিতিৰ সন্মুখীন হৈছিল।

সৰুতেই অনাথ হৈছিল আয়েশা

আয়েশা ৱাহাবৰ জন্ম কুইন্সত। অতি কম বয়সতে তেওঁ পিতৃ-মাতৃ দুয়োকে হেৰুৱায়। তেওঁৰ পিতৃক হ*ত্যা কৰা হৈছিল আৰু ইয়াৰ কিছুদিন পিছতে মাতৃৰো মৃ*ত্যু হয়। ইয়াৰ পিছত কেলিফৰ্ণিয়াৰ বে এৰিয়াৰ এক দম্পতীয়ে আয়েশাক তুলি লয়। শিক্ষাৰ ক্ষেত্ৰতো তেওঁ যথেষ্ট আগবাঢ়িছিল। ৰাজনীতি বিজ্ঞানত ডিগ্ৰী লাভ কৰাৰ পিছত তেওঁ এম বি এ কৰে। পৰৱৰ্তী সময়ত সমাজ কৰ্মৰ ওপৰত ডক্টৰেট ডিগ্ৰীও লাভ কৰে।

২০১১ত আহিছিল আন এক কঠিন সময়

২০১১ত আয়েছাৰ জীৱনত পুনৰ এক কঠিন পৰিস্থিতিৰ সৃষ্টি হয়। পৰিয়ালৰ ঘৰটো ফোৰক্ল’জাৰ হয়। ইয়াৰ ফলত পৰিয়ালটোৰ আৰ্থিক সংকট আৰু অধিক বৃদ্ধি পায়। আয়েশাৰ তুলি লোৱা পিতৃ-মাতৃৰ ব্যৱসায়ো বন্ধ হৈ পৰে। তুলি লোৱা পিতৃৰ স্বাস্থ্যৰ অৱনতি ঘটাৰ লগতে সেই সময়তে আয়েশাই নিজেও চাকৰি হেৰুৱায়। ইযাৰ পিছতে পৰিয়ালটোৱে হেৱাৰ্ডলৈ স্থানান্তৰিত হয়। হেৱাৰ্ডত থকাৰ সময়ত আয়েশাই স্থানীয় পৰিষদৰ সভাত অংশগ্ৰহণ কৰিবলৈ আৰম্ভ কৰে। বিশেষকৈ সাধাৰণ মানুহৰ বাবে সুলভ মূল্যৰ গৃহ নিৰ্মাণৰ দাবী উত্থাপন কৰি তেওঁ সক্ৰিয়ভাৱে কাম কৰিবলৈ আৰম্ভ কৰে।

২০১৮ চনত ৰাজনীতিত নতুন অধ্যায়

আয়েশাৰ ৰাজনৈতিক জীৱনত গুৰুত্বপূৰ্ণ পৰিৱৰ্তন আহে ২০১৮ চনত। সেই বছৰ তেওঁ হেৱাৰ্ড চিটি কাউন্সিলৰ সদস্য হিচাপে নিৰ্বাচিত হয়। চিটি কাউন্সিলত থাকি তেওঁ গৃহ নিৰ্মাণ, শিক্ষা, অৰ্থনৈতিক বৈষম্য আৰু সাধাৰণ লোকৰ অধিকাৰৰ দৰে বিষয়ত কাম কৰে। ইয়াৰ পিছত ২০২২ চনত তেওঁ কেলিফৰ্ণিয়া ৰাজ্যৰ বিধানসভালৈ নিৰ্বাচিত হয়। এই জয়ৰ জৰিয়তে তেওঁ প্ৰথমগৰাকী আফগান-আমেৰিকান আৰু প্ৰথমগৰাকী মুছলমান মহিলা হিচাপে কেলিফৰ্ণিয়া বিধানসভাত স্থান লাভ কৰে।

শক্তিশালী বাওঁপন্থী নীতিৰ সমৰ্থক

আয়েশা ৱাহাবে সদায় সাধাৰণ আৰু মধ্যবিত্ত লোকৰ স্বাৰ্থৰ সৈতে জড়িত বিষয়সমূহক গুৰুত্ব দি আহিছে। তেওঁৰ ৰাজনৈতিক এজেণ্ডাত ‘মেডিকেয়াৰ ফৰ অল’, কোটিপতিসকলৰ ওপৰত অধিক কৰ, ছাত্ৰ ঋণ ক্ষমা, শক্তিশালী সামাজিক সুৰক্ষা ব্যৱস্থা আৰু কৰ্পৰেট ক্ষমতা নিয়ন্ত্ৰণৰ দৰে বিষয় অন্তৰ্ভুক্ত আছে। এই নীতিসমূহৰ ওপৰত ভিত্তি কৰিয়েই তেওঁ নিজৰ প্ৰচাৰ অভিযান আগবঢ়াইছিল আৰু ভোটাৰৰ মাজত সমৰ্থন লাভ কৰিছিল।

ৰাজনীতিৰ লগতে আয়েছা সামাজিক কামতো সক্ৰিয়। বৃদ্ধ, মহিলা আৰু শিশুৰ অধিকাৰৰ বাবে তেওঁ বহুদিন ধৰি কাম কৰি আহিছে। সুলভ মূল্যৰ গৃহ নিৰ্মাণ, নাগৰিক অংশগ্ৰহণ, শিক্ষা আৰু অৰ্থনৈতিক বৈষম্য দূৰ কৰাৰ বিষয়তো তেওঁ মাত মাতি আহিছে। আয়েশাই আলামেডা কাউণ্টি হিউমেন ৰিলেচনছ কমিছনৰ অধ্যক্ষ হিচাপেও কাৰ্যনিৰ্বাহ কৰিছিল। ইয়াৰ উপৰি আফগান ক’লিচন, এব’ড চাৰ্ভিচেছ আৰু ট্ৰাই-চিটি ভলান্টিয়াৰৰ দৰে বিভিন্ন সংস্থাৰ ব’ৰ্ডৰ সদস্য হিচাপে কাম কৰিছিল।

তেওঁ আলামেডা কাউন্টি জনস্বাস্থ্য আয়ুক্ত হিচাপেও দায়িত্ব পালন কৰিছে। বে এৰিয়া মহিলা মাৰ্চতো তেওঁ বক্তা হিচাপে অংশগ্ৰহণ কৰিছিল। পৰৱৰ্তী সময়ত আফগান-আমেৰিকান নেতাসকলৰ সৈতে অনুষ্ঠিত হোয়াইট হাউছৰ গোলটেবুল বৈঠকত অংশগ্ৰহণৰ বাবেও তেওঁ নিৰ্বাচিত হৈছিল।

অনাথ শৈশৱ, আৰ্থিক সংকট, চাকৰি হেৰুওৱা আৰু পৰিয়ালৰ কঠিন সময় পাৰ হৈ আয়েশা ৱাহাবে ৰাজনীতিৰ পথত আগবাঢ়ি আহিছে। কেলিফৰ্ণিয়াৰ স্থানীয় ৰাজনীতিৰ পৰা ৰাজ্যিক বিধানসভা আৰু এতিয়া আমেৰিকাৰ কংগ্ৰেছলৈ তেওঁৰ এই যাত্ৰাই কঠিন পৰিস্থিতিৰ মাজতো লক্ষ্যৰ দিশে আগবাঢ়ি যোৱাৰ এক উল্লেখযোগ্য উদাহৰণ দাঙি ধৰিছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ