কিয় প্ৰতিবাদৰ পৰা ওলাই যোৱাৰ উপায় বিচাৰিছিল CJPৰ একাংশ নেতৃত্বই?

দিল্লীৰ যন্তৰ মন্তৰত চলা CJPৰ ৪৫ দিনীয়া প্ৰতিবাদক লৈ শেহতীয়াকৈ এক বিস্ফোৰক মন্তব্য কৰিছে সমাজকৰ্মী আৰু শিক্ষাবিদ চোনম ৱাংচুকে। প্ৰায় দুই ঘণ্টীয়া এক পডকাষ্টত তেওঁ দাবী কৰে যে প্ৰতিবাদৰ সময়ত CJP নেতৃত্বৰ মাজত সকলো সময়তে একে ধৰণৰ আত্মবিশ্বাস আৰু মনোবল নাছিল। বৰং কেইবাবাৰো নেতৃত্বৰ একাংশই প্ৰতিবাদৰ পৰা ওলাই যোৱাৰ পথ বিচাৰিছিল। চোনম ৱাংচুক এই প্ৰতিবাদৰ অন্যতম চিনাকি মুখ হৈ পৰিছিল তেওঁৰ অনিৰ্দিষ্টকালীন অনশনৰ বাবে। তেওঁৰ অনশনে প্ৰতিবাদটোক দেশজুৰি চৰ্চালৈ আনিছিল আৰু বিভিন্ন বয়সৰ লোকক আন্দোলনৰ সৈতে জড়িত কৰিছিল।

ৱাংচুকৰ দাবী অনুসৰি, প্ৰতিবাদৰ আৰম্ভণিৰ কেইদিনমানত যন্তৰ মন্তৰত যথেষ্ট সংখ্যক লোক সমবেত হৈছিল। কিন্তু প্ৰায় ৮-৯ দিনৰ পিছত প্ৰতিবাদস্থলীত মানুহৰ উপস্থিতি ক্ৰমান্বয়ে কমিবলৈ আৰম্ভ কৰে। ইয়াৰ প্ৰভাৱ CJP নেতৃত্বৰ মনোবলতো পৰিছিল বুলি তেওঁ কয়। তেওঁৰ ভাষ্য অনুসৰি, প্ৰতিবাদস্থলীত মানুহৰ ভিৰ বৃদ্ধি পালে নেতৃত্বৰ আত্মবিশ্বাস বৃদ্ধি পাইছিল আৰু ভিৰ কমিলে তেওঁলোকৰ মনোবলো হ্ৰাস পাইছিল। ৱাংচুকে কয় যে প্ৰতিবাদৰ মাজতে নেতৃত্বৰ একাংশই তেওঁক প্ৰতিবাদ কেনেকৈ শেষ কৰিব পাৰি সেই বিষয়ে প্ৰশ্ন কৰিছিল। আনকি কোনো কোনো নেতাই হাতযোৰ কৰি তেওঁক প্ৰতিবাদৰ পৰা ওলাই যোৱাৰ উপায় বিচাৰিবলৈ অনুৰোধ কৰিছিল বুলি তেওঁ দাবী কৰে।

পডকাষ্টটোত ৱাংচুকে কয় যে-তেওঁ CJP নেতৃত্বক সুধিছিল, তেওঁলোকে আৰু কিমান দিন প্ৰতিবাদস্থলীত থাকিব পাৰিব? ইয়াৰ উত্তৰত নেতৃত্বৰ একাংশই তেওঁক ‘আমি যাব বিচাৰো, আমি এই ঠাই এৰি যাব বিচাৰো’ বুলি কৈছিল বুলি ৱাংচুকে স্মৰণ কৰে। এই দাবীয়ে প্ৰতিবাদৰ বাহ্যিক ছবিখনৰ সৈতে যথেষ্ট পাৰ্থক্য দেখুৱাইছে। কাৰণ ৰাজহুৱাভাৱে CJP নেতৃত্বই দাবী পূৰণ নোহোৱালৈকে প্ৰতিবাদ অব্যাহত ৰখাৰ দৃঢ় সংকল্প প্ৰকাশ কৰি আহিছিল।

ৱাংচুকৰ মতে, তেওঁৰ অনশন কেনেকৈ শেষ কৰিব পাৰি, সেই লৈ কেইবাটাও সম্ভাৱ্য পথৰ বিষয়ে আলোচনা হৈছিল। ইয়াৰ ভিতৰত লোকসভাৰ বিৰোধী দলপতি ৰাহুল গান্ধীৰ নামো চৰ্চালৈ আহিছিল বুলি তেওঁ দাবী কৰে। তেওঁৰ মতে, সেই সময়ত CJP নেতৃত্বৰ মাজত প্ৰতিবাদৰ ভৱিষ্যতক লৈ যথেষ্ট অনিশ্চয়তা আছিল। ৱাংচুক নিজেও দ্বিধাত পৰিছিল—নেতৃত্বক প্ৰতিবাদ অব্যাহত ৰাখিবলৈ উৎসাহিত কৰিব নে তেওঁলোকক ওলাই যোৱাৰ পথ বিচাৰি দিব।

ৱাংচুকে দাবী কৰে যে ২০ জুলাইত সংসদ অভিমুখে সমদল উলিওৱাৰ পূৰ্বে CJP নেতৃত্বৰ মনোবল যথেষ্ট কমি গৈছিল। তেওঁক ১৮ জুলাইত প্ৰতিবাদস্থলীৰ পৰা জোৰকৈ আঁতৰাই চিকিৎসালয়লৈ লৈ যোৱা হৈছিল। ইয়াৰ পিছত ২০ জুলাইৰ সংসদ অভিমুখী সমদলক কেন্দ্ৰ কৰি পৰিস্থিতি উত্তপ্ত হৈ পৰে। প্ৰতিবাদকাৰী আৰু আৰক্ষীৰ মাজত সংঘাতৰ সৃষ্টি হয় আৰু আৰক্ষীয়ে লাঠীচালনা তথা কন্দুৱা গেছ ব্যৱহাৰ কৰাৰ ঘটনাই প্ৰতিবাদটোক নতুন মাত্ৰা দিয়ে। ৱাংচুকৰ মতে, এই ঘটনাৰ পিছত আন্দোলনটোত পুনৰ যথেষ্ট শক্তি আৰু জনসমৰ্থন দেখা যায়।

ৱাংচুকে লগতে কয় যে CJP-এ ২০ জুনৰ পৰা প্ৰতিবাদ আৰম্ভ কৰাৰ সিদ্ধান্ত লোৱাৰ সময়ত তেওঁকো আন্দোলনত যোগদান কৰিবলৈ অনুৰোধ জনোৱা হৈছিল। তেওঁৰ অংশগ্ৰহণৰ সৈতে অনশন জড়িত হ’ব পাৰে বুলিও ইংগিত দিয়া হৈছিল। কিন্তু সেই সময়ত ৱাংচুকৰ ছুইজাৰলেণ্ডত এটা বিজ্ঞান সন্মিলনত অংশগ্ৰহণ কৰাৰ কথা আছিল। সেয়ে তেওঁ CJP নেতৃত্বক কয় যে তেওঁ ২০ জুনৰ পৰা নহয়, ২৮ জুনৰ পৰাহে প্ৰতিবাদত যোগ দিব পাৰিব। তেওঁৰ মতে, এই কথা শুনি CJP নেতৃত্বও কিছু আচৰিত হৈছিল, কিয়নো তেওঁলোকৰ আশা আছিল যে ৱাংচুক আৰম্ভণিৰ পৰাই প্ৰতিবাদৰ সৈতে থাকিব।

পিছত ২৮ জুনত ৱাংচুকে প্ৰতিবাদত যোগ দিয়ে আৰু অনশন আৰম্ভ কৰে। তেওঁৰ মতে, তেতিয়ালৈকে যুৱ নেতৃত্বই কেইবাদিনো ধৰি প্ৰতিবাদ অব্যাহত ৰাখিব পাৰিছে বুলি দেখি তেওঁ আন্দোলনত অধিক সক্ৰিয়ভাৱে জড়িত হোৱাৰ সিদ্ধান্ত লয়। চোনম ৱাংচুকে কৰা এই সকলো দাবী তেওঁৰ নিজা অভিজ্ঞতা আৰু প্ৰতিবাদৰ সময়ৰ ঘটনাৰ মূল্যায়নৰ ওপৰত আধাৰিত। তেওঁৰ বক্তব্যই CJP প্ৰতিবাদৰ বাহ্যিক দৃঢ়তাৰ আঁৰত নেতৃত্বৰ মাজত চলি থকা মতভেদ, মনোবলৰ উঠা-নমা আৰু প্ৰতিবাদ শেষ কৰাৰ সম্ভাৱ্য পথৰ বিষয়ে নতুনকৈ চৰ্চাৰ সৃষ্টি কৰিছে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ