নগাঁৱৰ ৰাজনৈতিক সমীকৰণক লৈ ব্যাপক চৰ্চা। নগাঁৱৰ ৰাজনৈতিক পৰিৱেশত এইবাৰ বিশেষভাৱে চৰ্চালৈ আহিছে বিজেপি প্ৰাৰ্থী দেৱাশীষ শৰ্মাৰ নাম। নিৰ্বাচনী যুঁজত তেওঁৰ বিজয় নিশ্চিত হোৱাৰ পিছতে সামাজিক মাধ্যমত দিয়া এটা পোষ্টে ইতিমধ্যে বহুতৰে দৃষ্টি আকৰ্ষণ কৰিছে। বিশেষকৈ, ‘দেৱ+আশীষ=দেৱাশীষ’ বুলি লিখা পোষ্টটোৱে ৰাজনৈতিক মহলত চৰ্চাৰ সৃষ্টি কৰিছে।
নগাঁৱত দেৱাশীষ শৰ্মাই প্ৰায় এক লাখ ভোটৰ ব্যৱধানত আগবাঢ়িছে। সংখ্যালঘু ৰাইজৰ পূৰ্ণ সমৰ্থন বিজেপি প্ৰাৰ্থীগৰাকীৰ পক্ষত থকা বুলিও বুজিব পৰা হৈছে।
নগাঁৱৰ নিৰ্বাচনী ৰাজনীতিত সংখ্যালঘু ভোটৰ ভূমিকা যথেষ্ট গুৰুত্বপূৰ্ণ বুলি বিবেচিত হয়। এইবাৰ সেই ভোট বিজেপি প্ৰাৰ্থী দেৱাশীষ শৰ্মাৰ পক্ষত যোৱা বুলি পোষ্টটোত দাবী কৰা হৈছে। আনকি, সংখ্যালঘু ৰাইজে বদৰুদ্দিন আজমলকো প্ৰত্যাখ্যান কৰা বুলি উল্লেখ কৰি ৰাজনৈতিক মহলত নতুন চৰ্চাৰ সৃষ্টি কৰিছে।
পোষ্টটোত বদৰুদ্দিন আজমল সংখ্যালঘু ৰাইজৰ সমৰ্থন লাভ কৰাত ব্যৰ্থ হোৱা বুলিও দাবী কৰা হৈছে। অৱশ্যে, এই দাবীৰ সমৰ্থনত কোনো নিৰ্ভৰযোগ্য পৰিসংখ্যা বা আনুষ্ঠানিক তথ্য উপলব্ধ নোহোৱাকৈ ইয়াক নিশ্চিত সত্য হিচাপে গণ্য কৰিব নোৱাৰি।
বিজেপিৰ ৰাজনৈতিক প্ৰভাৱৰ সন্মুখত শিৱামণি বৰাও তিষ্ঠিব নোৱাৰিলে। নিৰ্বাচনী ফলাফলৰ এতিয়া কেৱল আনুষ্ঠানিকতা বাকী আছে।
সকলোৰে সমৰ্থন লাভ কৰি বিজয়ৰ দিশে আগবাঢ়ি যোৱাৰ বাবে নিজৰ সামাজিক মাধ্যমত নিজৰ নামটোৰ সন্ধি ভাঙি লিখিছে, ‘দেৱ+আশীষ=দেৱাশীষ। ইয়াৰ অৰ্থ ভগৱানৰ আশীষ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
