অৰুণাচল প্ৰদেশ চীনৰ অংশ। এই দাবী কৰি অৰুণাচলৰ এগৰাকী তৰুণীক চীনৰ ছাংহাই এয়াৰপৰ্টত অপমান কৰাৰ অভিযোগ আনিছে যুৱতীগৰাকীয়ে। প্ৰেম ৱাংজম থংডক নামৰ তৰুণী বৰ্তমান ব্ৰিটেইনৰ বাসিন্দা। অভিযোগ অনুসৰি ট্ৰানজিট হল্টৰ সময়ত বিমানবন্দৰত তেওঁৰ ভাৰতীয় পাছপোৰ্টক মান্যতা দিয়া হোৱা নাই।
খবৰ অনুসৰি প্ৰেম ৱাংজম থংডকে লণ্ডনৰ পৰা জাপানলৈ গৈছিল ২১ নৱেম্বৰত। ৩ ঘণ্টাৰ বাবে তেওঁৰ ছাংহাই পুডং বিমানবন্দৰত লে অফ আছিল। কিন্তু ছেকিং কৰাৰ সময়ত তেওঁৰ ভাৰতীয় পাছপোৰ্টক বে আইনী বুলি উল্লেখ কৰে। পাছপোৰ্টত উল্লেখ থকা অৰুণাচল প্ৰদেশ প্ৰকৃততে ভাৰতৰ নহয় বৰং চীনৰহে অংশ বুলি জনাই।
ছচিয়েল মিডিয়া পোষ্টত প্ৰেমা ৱাংজম থংডকে জনাইছে যে একাধিক অফিচাৰ আৰু চীনৰ ইষ্টাৰ্ণ এয়াৰলাইন্সৰ ষ্টাফে তেওঁক কটাক্ষও কৰিছে। ঠাট্টা, তামাছা কৰা হৈছে তেওঁক। আনকি তেওঁক কোৱা হৈছে যে চীনৰ পাছপোৰ্টৰ বাবে তেওঁ আবেদন কৰিব লাগিব। ৩ ঘণ্টাৰ লে অফৰ সলনি ছাংহাই বিমানবন্দৰত ১৮ ঘণ্টা তেওঁ থাকিবলগীয়া হয়। দীৰ্ঘ সময় ধৰি তেওঁক ৰখাই থোৱাৰো অভিযোগ আনিছে তেওঁ। ৰৈ থকাৰ সময়ত খোৱা পানীও ভালকৈ দিয়া হোৱা নাছিল বুলি অভিযোগ আনিছে প্ৰেমাই। ৰৈ থকাৰ সময়ত তেওঁক ইণ্টাৰনেট কিংবা এয়াৰপৰ্টৰ কোনো পৰিসেৱাও ব্যৱহাৰ কৰিব দিয়া হোৱা নাছিল।
প্ৰেমা ৱাংজম থংডকৰ আৰু অভিযোগ বৈধ ভিছা থকা সত্ত্বেও জাপানৰ বিমানত উঠিবলৈ দিয়া হোৱা নাছিল তেওঁক। ভাৰতীয় পাছপোৰ্টো তেওঁৰ পৰা কাঢ়ি লোৱা হৈছে। টিকট ৰিবুট কৰা, খাদ্য ক্ৰয় কৰা কিংবা টাৰ্মিনেলত যাতায়াতো কৰিব দিয়া হোৱা নাছিল তেওঁক। ইয়াৰোপৰি তেওঁক নতুনকৈ চীন ইষ্টাৰ্ণৰ এক টিকট কাটিবলৈ বাধ্য কৰোৱা হয়। নতুন টিকট নিকিনিলে তেওঁক পাছপোৰ্ট উভতাই নিদিয়ে বুলিও জনাই দিয়ে। ফ্লাইট মিছ, আৰ্থিক ক্ষতি আৰু হোটেল বুকিং বাতিল হোৱাত বিপদত পৰিছে বুলিও জনাই প্ৰেমা ৱাংজম থংডকে।
কোনো মতে ব্ৰিটেইনত বসবাসকাৰী এগৰাকী বন্ধুৰ সহায়ত ছাংহাইত থকা ভাৰতীয় দূতাবাসৰ সৈতে যোগাযোগ কৰিবলৈ সক্ষম হয় প্ৰেমা। ইয়াৰপাছতেই চীনৰ সেই চহৰৰ পৰা গভীৰ নিশা বিমানত উঠে তেওঁ। ইয়াৰপাছতেই প্ৰধানমন্ত্ৰী নৰেন্দ্ৰ মোদীলৈ চিঠি লিখিছে প্ৰেমা ৱাংজম থংডকে। ভাৰতৰ সাৰ্বভৌমত্বক আঘাত কৰা হৈছে আৰু অৰুণাচল প্ৰদেশৰ বাসিন্দাসকলক অসন্মান কৰা হৈছে বুলি জনাইছে চিঠিত। বেইজিঙৰ সৈতে এই বিষয়ক লৈ ভাৰত চৰকাৰক কথা পাতিবলৈকো অনুৰোধ কৰিছে প্ৰেমাই। ইয়াৰোপৰি কঠোৰ আৰু যথাযথ পদক্ষেপ লোৱাৰ কথাও কৈছে। আন্তৰ্জাতিক উৰণৰ সময়ত কোনো ভাৰতীয় নাগৰিককে অসন্মান যাতে কৰা নহয় সেই অনুৰোধো চিঠিত উল্লেখ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
