অসম লাইভ ২৪ঃ আজি জনতা ভৱনত অনুষ্ঠিত ৰাজ্যিক কেবিনটে কেইবাটাও গুৰুত্বপূৰ্ণ সিদ্ধান্ত গ্ৰহণ কৰিছে।
কেবিনেট বৈঠকৰ পিছতে জনতা ভৱনত সংবাদ মেল সম্বোধন কৰে মন্ত্ৰী ডাঃ ৰণোজ পেগু আৰু কেশৱ মহন্তই৷
অসম চৰকাৰৰ দুয়োগৰাকী মন্ত্ৰীয়ে সংবাদ মেল সম্বোধন কৰি আজিৰ কেবিনেট সিদ্ধান্তসমূহ সদৰী কৰে৷
মন্ত্ৰী ডাঃ ৰণোজ পেগুৱে কয় যে চৰকাৰৰ অধীনত হোৱা অনুষ্ঠানত মুখ্যমন্ত্ৰী, মন্ত্ৰী, বিধায়ক আৰু চৰকাৰী বিষয়াক সম্বৰ্দ্ধনা জনোৱা নহ’ব। কেৱল কেন্দ্ৰীয় মন্ত্ৰী বা বয়োজ্যেষ্ঠ আমন্ত্ৰিত অতিথিক সম্বৰ্দ্ধনা জনোৱা হ’ব বুলিও সদৰী কৰিছে মন্ত্ৰীগৰাকীয়ে।
তেওঁ লগতে কয় যে মুখ্যমন্ত্ৰী, মন্ত্ৰী, বিধায়ক আৰু চৰকাৰী বিষয়াক সম্বৰ্দ্ধনা জনোৱাৰ পৰিৱৰ্তে একোটাকৈ বৃক্ষৰোপন কাৰ্য্যসূচী হাতত লোৱা হৈছে।
আনফালে, মন্ত্ৰী কেশৱ মহন্তই সংবাদমেলত উল্লেখ কৰা অনুসৰি ৰাইজৰ সুবিধাৰ বাবে মুখ্যমন্ত্ৰীৰ কনভয় পাৰ হ’লে ২ মিনিটতকৈ অধিক সময় জনতাৰ গাড়ী আৱদ্ধ কৰি ৰাখিব নোৱাৰিব। ইফালে মুখ্যমন্ত্ৰীৰ কনভয়ত গুৱাহাটীত কেৱল ৬ খন গাড়ী আৰু গুৱাহাটীৰ বাহিৰত ১২খন গাড়ী থাকিব৷
কেবিনেটৰ সিদ্ধান্ত অনুসৰি এতিয়াৰে প্ৰত্যেক জিলাৰে জিলা দিৱস হিচাপে প্ৰতিষ্ঠা দিৱস অনুষ্ঠিত কৰা হ’ব।
কেবিনেট সিদ্ধান্তৰ মতে আগন্তুক পৌৰসভাৰ নিৰ্বাচন ১০ মাৰ্চৰ পূৰ্বে অনুষ্ঠিত কৰিব লাগিব। ইফালে অহা ৪ মাৰ্চৰ ভিতৰত বাজেট অধিবেশন অনুষ্ঠিত কৰিবলৈ ৰাজ্যপালক অনুৰোধ জনাব।
কৃষকে উচিত মূল্যত ধান ক্ৰয় কৰিব পাৰে তাৰ বাবে অভিভাৱক মন্ত্ৰী আৰু জিলা উপায়ুক্তক নিৰ্দেশ দিয়া বুলিও সদৰী কৰিছে মন্ত্ৰীদ্বয়ে।
এতিয়াৰে পৰা কোনো মন্ত্ৰীয়ে বিত্ত বিভাগৰ পূৰ্ব অনুমোদন অবিহনে কোনো আঁচনি বা অনুদান আদি ঘোষণা কৰিব নোৱাৰিব৷
আনহাতে তামুলপুৰক নতুন জিলা হিচাপে ঘোষণা কৰাৰো কেবিনেট সিদ্ধান্ত লোৱা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
