অসম লাইভ ২৪ঃ ৰাষ্ট্ৰীয় ৰাজনীতিৰ এটা গুৰুত্বপূৰ্ণ খবৰ৷ বিজেপি নেতা তথা প্ৰাক্তন কেন্দ্ৰীয় মন্ত্ৰী বাবুল সুপ্ৰিয়ই বিজেপি ত্যাগ কৰি যোগদান কৰে তৃণমূল কংগ্ৰেছত৷ TMC নেতা অভিষেক বেনাৰ্জী আৰু derek o’brienৰ উপস্থিতত TMCত যোগদান কৰে সুপ্ৰিয়ই৷ কেন্দ্ৰৰ বিজেপি চৰকাৰৰ মন্ত্ৰী পদৰ পৰা আঁতৰোৱাৰ দুমাহ পাছতে এই সিদ্ধান্ত সুপ্ৰিয়ৰ৷ সংবাদ মাধ্যমত বাবুল সুপ্ৰিয়ই আজি কয়- ‘যদি আপোনাৰ হাতলৈ সুবিধা আহে, আপুনি সিদ্ধান্ত লোৱা উচিত, মই এই সুযোগ গ্ৰহণ কৰিবলৈ সিদ্ধান্ত ল’লোঁ৷’ তৃণমূল কংগ্ৰেছ নেতা কুনাল ঘোষে কয় যে ‘বহু বিজেপি নেতাই তৃণমূল কংগ্ৰেছেৰে আলোচনা অব্যাহত ৰাখিছে৷ তেওেঁলোক বিজেপিক লৈ সন্তুষ্ট নহয়৷ এওঁলোকৰে এজন বাবুল সুপ্ৰিয়ই আজি তৃণমূল কংগ্ৰেছত যোগদান কৰিলে৷ কাইলৈ আৰু এগৰাকী দিগ্বজ বিজেপি নেতাই তৃণমূল কংগ্ৰেছত যোগদান কৰিব৷ এই প্ৰক্ৰিয়া চলি থাকিব৷ অপেক্ষা কৰক আৰু চাই থাকক৷’
কেন্দ্ৰীয় পৰিৱেশ মন্ত্ৰণালয়ৰ কনিষ্ঠ মন্ত্ৰী হিচাপে কাৰ্যনিৰ্বাহ কৰি থকা অৱস্থাত দুমাহ পূৰ্বে বাবুল সুপ্ৰিয়ক মন্ত্ৰীপদ ত্যাগ কৰিবলৈ বিজেপিৰ শীৰ্ষ নেতৃত্বই নিৰ্দেশ দিছিল৷ জুলাইত মোদী মন্ত্ৰীসভাত ৪৩ খন নতুন মুখৰ অন্তৰ্ভুক্তি হৈছিল৷ ৮ জুলাইত মন্ত্ৰীপদ ত্যাগ কৰি বাবুল সুপ্ৰিয়ই টুইট কৰিছিল- ‘নিশ্চিতভাৱে মই মোৰবাবে দুখ অনুভৱ কৰিছোঁ৷’ অৱশ্যে কিছু পাছতে এই পোষ্টটো delete কৰি ইয়াৰ ঠাইত আন এটা পোষ্ট দিছিল সুপ্ৰিয়ই৷ নতুন পোষ্টটোত সুপ্ৰিয়ই লিখিছিল- ‘মই যথেষ্ট সুখী, কাৰণ দুৰ্নীতিৰ এটাও দাগ নোহোৱাকৈ দায়িত্বৰ পৰা অব্যাহতি ল’ব পাৰিলোঁ৷’
উল্লেখযোগ্য যে ২০১৯ৰ নিৰ্বাচনত পশ্চিমবংগৰ মুখ্যমন্ত্ৰী তথা TMC প্ৰধান মমতা বেনাৰ্জীক তীব্ৰ সমালোচনা কৰিছিল সুপ্ৰিয়ই৷ বিজেপিয়ে জয় শ্ৰীৰাম ধ্বনি দিয়াক লৈ মমতা বেনাৰ্জীয়ে গেৰুৱা বাহিনীক সমালোচনা কৰি কৈছিল যে বিজেপিয়ে ধৰ্ম আৰু ৰাজনীতিক সানমিহলি কৰি পশ্চিমবংগত অস্থিৰ অৱস্থাৰ সৃষ্টি কৰিবলৈ লৈছে৷ এইখিনিতে মমতা বেনাৰ্জীক সমালোচনা কৰি বাবুল সুপ্ৰিয়ই কৈছিল যে মমতা বেনাৰ্জী এগৰাকী অভিজ্ঞ ৰাজনীতিক, কিন্তু তেওঁৰ আচৰণ অস্বাভাৱিক৷ এনেদৰে বিভিন্ন সময়ত মমতা বেনাৰ্জীৰ বিৰুদ্ধে আক্ৰমণাত্মক হৈ উঠিছিল বাবুল সুপ্ৰিয়৷
এই ধৰণৰ ঘটনা প্ৰবাহে এটা কথা সূচাইছে যে আঞ্চলিক ৰাজনৈতিক দলসমূহৰ মঞ্চত ‘ফেডাৰেল ফ্ৰণ্ট’ শক্তিশালী হোৱাৰ পথত৷ মমতা বেনাৰ্জীৰ তৃণমূল কংগ্ৰেছৰ নেতৃত্বত অৰবিন্দ কেজৰিৱাল নেতৃত্বাধীন আম আদমী পাৰ্টি, লালুপ্ৰসাদ যাদৱ-পুত্ৰ তেজস্বী যাদৱ নেতৃত্বাধীন আৰ জে ডি আদি দল একেখন মঞ্চত একত্ৰিত হৈছে৷ অসমৰ ৰাইজৰ দলেও ‘ফেডাৰেল ফ্ৰণ্ট’ত যোগদান কৰিছে৷ উত্তৰ ভাৰতৰ কেইবাটাও ৰাজনৈতিক দল শীঘ্ৰেই ‘ফেডাৰেল ফ্ৰণ্ট’ত যুক্ত হোৱাৰ পথত৷ অনুৰূপভাৱে দাক্ষিণাত্যৰ কেইবাটাও দল ‘ফেডাৰেল ফ্ৰণ্ট’লৈ শীঘ্ৰে ঢাপলি মেলাৰ কথা৷ ইতিমধ্যে trs প্ৰধান তথা তেলেংগানাৰ মুখ্যমন্ত্ৰী কে চন্দ্ৰশেখৰ ৰাৱে দাক্ষিণাত্যত নেতৃত্ব লৈছে৷ dmk প্ৰধান তথা তামিলনাডুৰ মুখ্যমন্ত্ৰী m k stalinও শীঘ্ৰে ফেডাৰেল ফ্ৰণ্টেৰে যুক্ত হোৱাৰ কথা৷ ভাৰতীয় জাতীয় কংগ্ৰেছো এই মঞ্চখনৰে আন এক অন্যতম দল হোৱাৰ পূৰ্ণ সম্ভাৱনা৷ আন বহুবোৰ সৰু-বৰ দলো ফেডাৰেল ফ্ৰণ্টৰ অন্তৰ্ভুক্ত হোৱাৰ সম্ভাৱনা প্ৰকট হৈ উঠিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
