অসম লাইভ ২৪ঃ বৰাকক পৃথক ৰাজ্য হিচাপে স্বীকৃতি দিবলৈ চৰকাৰক দাবী জনাইছে অসমৰ বিশিষ্ট বুদ্ধিজীৱি, প্ৰথিতযশা সাহিত্যিক তথা অসম সাহিত্য সভাৰ প্ৰাক্তন সভাপতি ড০ নগেন শইকীয়াই। ভাষাকেন্দ্ৰিক বিষয় লৈ সৃষ্টি হোৱা বৰাকৰ শেহতীয়া পৰিস্থিতি সন্দৰ্ভত উদ্বিগ্নতা প্ৰকাশ কৰি বিশিষ্ট সাহিত্যিকগৰাকীয়ে সংবাদ মাধ্যমৰ আগত ব্যক্ত কৰে প্ৰতিক্ৰিয়া৷ তেওঁ কয় যে ৰাজ্যৰ এক কুটিল চক্ৰই দীৰ্ঘদিনৰ পৰা অসমীয়া আৰু বঙালীৰ মাজত সংঘাতৰ পৰিৱেশ সৃষ্টি কৰি আহিছে। ১৯৮৫ চনৰ পৰা ব্ৰহ্মপুত্ৰ উপত্যকাত বসবাস কৰা বঙালী আৰু অসমীয়াৰ মাজত এতিয়ালৈকে কোনোধৰণৰ সংঘাত সৃষ্টি হোৱা নাই। কিন্তু বৰাকত অসমীয়া ভাষাক লৈ সময়ে সময়ে এক অশান্তিকৰ পৰিৱেশ সৃষ্টি কৰি আহিছে দুষ্ট চক্ৰই। যিটো গ্ৰহণযোগ্য নহয় বা আমি মানি ল’ব নোৱাৰো। অসমীয়া ভাষাত বহু বঙালী সাহিত্যিক আছে, যিসকলে অসমীয়া ভাষা সাহিত্যতেই বহু যুগমীয়া গীত-মাত ৰচনা কৰি অসমীয়া ভাষা-সাহিত্য চহকী কৰি তুলিছে। কেৱল এয়াই নহয় পুলক বেনাৰ্জীৰ দৰে স্বনামধন্য শিল্পীৰ অসম মূলুকতে বহু উদাহৰণ আছে। বিশিষ্ট সাহিত্যিকগৰাকীয়ে বৰাকৰ ভাষাকেন্দ্ৰীক ঘটনাক লৈ চৰকাৰৰ একাংশ আমোলা-বিষয়াও জড়িত আছে বুলি অভিযোগ উত্থাপন কৰিছে। তেওঁ পুনৰ কয়, ‘১৯৬৪ চনত মই বৰাকৰ বিভিন্ন ঠাইলৈ গৈছিলোঁ। সেই সময়ত বঙালী মহিলাই তাঁতশাল বৈছিল। কিন্তু আজি সেই পৰিৱেশ আছেনে নাই মই নাজানো’। কিন্তু, এতিয়াও বৰাকত অসমীয়া ভাষা-সংস্কৃতিক ভালপোৱা মানুহ আছে বুলি উল্লেখ কৰে সাহিত্যিকগৰাকীয়ে। গতিকে, বৰাকৰ শেহতীয়া পৰিৱেশক লৈ মুঠেও সন্তোষ্ট নহয় বুলি উল্লেখ কৰে সাহিত্যিকগৰাকীয়ে৷ যদি প্ৰয়োজন হয় বৰাকক এখন পৃথক ৰাজ্য হিচাপে গঢ় দিবলৈ চৰকাৰে পদক্ষেপ গ্ৰহণ কৰিব লাগে বুলিও উল্লেখ কৰে বিশিষ্ট সাহিত্যিকগৰাকীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
