মোদীৰ মন্ত্ৰীসভাত মন্ত্ৰীপদক লৈ এতিয়াও অব্যাহত খোৱা-কামোৰা৷ এইবাৰ মন্ত্ৰীত্বক লৈ নহয় স্পিকাৰ পদক লৈ চলিছে টনা আঁজোৰা৷ বিজেপিয়ে বিচাৰিছে এই পদত থাকক অন্ধ্ৰপ্ৰদেশৰ বিজেপি সভাপতি দুগ্ধবতী পুৰন্দেশ্বৰী৷ অন্যহাতে এনডিএ জোটৰ প্ৰধান সদস্য TDPকো লাগে এই গুৰুত্বপূৰ্ণ পদ৷ এই বিষয়টোক লৈ এনডিএৰ ভিতৰচৰাত চলিছে এখনৰ পাছত আনখন গোপন মিটিং৷
মোদী ৩.০ মন্ত্ৰীসভাত টিডিপিয়ে ৰখা প্ৰস্তাৱ অনুসৰি তেওঁলোকক ৪মন্ত্ৰী আৰু লোকসভা অধ্যক্ষ পদ লাগিব৷ যদিও ৪ৰ পৰিবৰ্তে দুজনক মন্ত্ৰিত্ব দিছে মোদী ৩.০ত৷ ৰামমোহন নাইডু পূৰ্ণমন্ত্ৰী আৰু চন্দ্ৰশেষৰ পেম্মাছানী প্ৰতিমন্ত্ৰী৷ স্বাভাৱিকভাৱেই প্ৰস্তাৱ মানি নোলোৱাক লৈ অসুখী হৈ আছে টিডিপি৷ তেওঁলোকে এইবাৰ দাবী ৰাখিছে যে, মন্ত্ৰিত্বত আমাৰ দাবী পূৰণ নকৰিলে যেতিয়া স্পিকাৰ পদত আমাৰ মানুহ থাকিবই লাগিব!
ইফালে বিজেপিয়ে অন্ধ্ৰপ্ৰদেশৰ বিজেপি সভাপতি দুগ্ধৱতী পুৰন্দেশ্বৰীক লোকসভাৰ অধ্যক্ষ পদ দিয়া লোভ দেখুৱাইছে৷ বিজেপিৰ সূত্ৰৰ খবৰ অনুসৰি এই পদ কোনোকাৰণতে সহযোগী দলক এৰি দিবলৈ ইচ্ছুক নহয় বিজেপি৷ ৰাজনৈতিক মহলে কৰা অনুমান অনুসৰি জোৰা-তাপলিয়ে গঠন হোৱা এনডিএ চৰকাৰ চন্দ্ৰবাবু নাইডুৰ বাবেই ভাঙি যাব পাৰে৷ এনেকৈ অসন্তুষ্ট কৰিলে নাইডুৱে এনডিএ এৰি ইণ্ডিয়ালৈকো আহিব পাৰে৷
বিজেপিয়ে লোকসভাৰ অধ্যক্ষ পদৰ বাবে বাচনি কৰা দুগ্ধদেৱী পুৰন্দেশ্বৰী তেলেগু দেশম পাৰ্টীৰ প্ৰতিষ্ঠাতা এন টি আৰৰেই কন্যা৷ এসময়ত চন্দ্ৰবাবুৰ সৈতে চৰম শত্ৰুতা থাকিলেও লোকসভা নিৰ্বাচনত টিডিপি আৰু জনসেনাৰ সৈতে বিজেপিৰ জোঁটত গুৰুতৰ ভূমিকা পালন কৰিছিল৷ তাৰেই ফলস্বৰূপে এন ডি এ জোটে লাভ কৰিছে ২১খন আসন৷ ইয়াৰ মাজৰে ১৬গৰাকী টিডিপিৰ পৰা জয়ী হৈছে৷ বিধানসভা নিৰ্বাচনতো ১৬৮ আসন লাভ কৰি চৰকাৰ গঠন কৰিছে বিজেপি দলে৷ এই সকলোবোৰ সম্ভৱ হৈছে একমাত্ৰ দুগ্ধদেৱীৰ বাবেই৷ যাৰবাবে বিজেপিয়ে পুৰস্কাৰ হিচাপে তেওঁক লোকসভাৰ স্পিকাৰ পদ দিবলৈ মন মেলিছে৷
দুগ্ধদেৱীক লোকসভাৰ অধ্যক্ষ কৰাত কাৰোৰে আপত্তি নাথাকিলেও আপত্তি আছে চন্দ্ৰবাবুৰ৷ চন্দ্ৰবাবুৱে সহযোগী দল হ’লেও কোনো কাৰণতে দুগ্ধদেৱীক নিবিচাৰে লোকসভাৰ অধ্যক্ষ আসনত৷ এই আসনত কোনো বিজেপি নেতাকেই নিবিচাৰে টিডিপিয়ে৷ ২০১৯ চনত ৩০৩ আসন জয় কৰি একক সংখ্যাগৰিষ্ঠতা লাভ কৰিছিল বিজেপি দলে৷ এইবাৰৰ লোকসভা নিৰ্বাচনত ক্ষমতা বহু পৰিমানে কমিছে বিজেপিৰ৷ এইবাৰ মাত্ৰ ২৪০ আসন লাভ কৰিছে বিজেপি দলে৷ তিনি দশকতকৈ পুৰণি দুয়োটা দল ক্ৰমে টিডিপি আৰু এনডিএৰো গুৰুত্ব মোদী মন্ত্ৰীসভাত বহু পৰিমানে বৃদ্ধি পাইছে৷
মোদীয়েও বুজি উঠিছে সহজ পাটীগণিত৷ প্ৰধানমন্ত্ৰীয়ে বুজি উঠিছে চৰকাৰ চলাবলৈ এইবাৰ সংগীক যি তি ক’লেই দুৰ্ঘটনা ঘটি যাব পাৰে৷ যাৰবাবে মোদীয়ে সহযোগী দলক এৰি দিব লাগিব পদো৷ মোদীৰ সহযোগী দুই দলৰ মুঠ আসন ২৮৷ এই সংখ্যাই মেজিক ফিগাৰ চোৱাৰ অন্যতম কাৰিগৰ৷ এই দুই দলে বিৰোধ কৰিলেই ঘটি যাব ঘটনা৷ যাৰবাবে মোদীয়ে লোকসভা স্পিকাৰৰ আসন টিডিপিকেই এৰি দিবও পাৰে বুলি একাংশই দাবী কৰা পৰিলক্ষিত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
