অসম লাইভ২৪ঃ আইপিএল আৰম্ভ হোৱাৰ আগতেই বৃহৎ প্ৰত্যাহ্বান ৰাজস্থান ৰয়েলছলৈ। আঘাতৰ বাবেই আইপিএলত ভাগ ল’ব নোৱাৰে বলাৰ প্ৰসিদ্ধ কৃষ্ণই। নিজেই টুইটযোগে এই কথা প্ৰকাশ কৰিছে ৰাজস্থান ৰয়েলছৰ লেখত ল’বলগীয়া খেলুৱৈজনে। বৃহস্পতিবাৰে টুইটযোগে ক্ৰিকেটাৰ প্ৰসিদ্ধই লিখিছে, ‘আঘাতৰ বাবে অনুশীলনত ভাগ ল’ব পৰা নাই। তাৰবাবে মানসিক অশান্তিত ভূগিছো। আশা কৰিছো সোনকালেও অনুশীলনলৈ যাতে উভতি যাব পাৰো।’
বিগত বৰ্ষৰ ছেপ্টেম্বৰ মাহতেই পিঠিত আঘাত পাইছিল প্ৰসিদ্ধই। সেই সময়ত তেওঁ ভাৰতীয় দলৰ হৈ খেলত অংশ লৈছিল। নিউজিলেণ্ডৰ বিৰুদ্ধে থকা মেছৰ পূৰ্বে অনুশীলন কৰি থকাৰ সময়তে পিঠিত গুৰুতৰ আঘাত পাইছিল প্ৰসিদ্ধই। তাৰপাছৰে পৰাই খেলত অংশগ্ৰহণ কৰিব পৰা নাই প্ৰসিদ্ধই। ইতিমধ্যে অস্ত্ৰোপছাৰো সম্পন্ন হৈছে। বৰ্তমানো হাস্পতালতেই আছে প্ৰসিদ্ধ। চিকিৎসকে প্ৰকাশ কৰামতে সম্পূৰ্ণ সুস্থ হৈ উঠিবলৈ প্ৰসিদ্ধক প্ৰায় ৬ ৰ পৰা ৮ মাহ সময়ৰ প্ৰয়োজন হ’ব। খেলত নামিবলৈ প্ৰায় এবছৰ পৰ্যন্ত সময়ৰ দৰকাৰ বুলিও প্ৰকাশ কৰিছে চিকিৎসকে।
উল্লেখ্য যে বিগত বৰ্ষত নিলামত প্ৰসিদ্ধক ১০ কোটি টকাৰে নিলাম কৰিছিল ৰাজস্থান ৰয়েলছে। আইপিএলত ৰাজস্থান দলটোৰ হৈ ১৭ খনকৈ মেছত ১৯ টা উইকেট লৈছিল প্ৰসিদ্ধই। ভাল বলাৰ বাবেই প্ৰসিদ্ধক এই বৰ্ষতো নিলামৰ পৰিকল্পনা কৰিছিল ৰাজস্থান ৰয়েলছে। অৱশ্যে আইপিএলৰ পূৰ্বেই আঘাত পোৱাৰ বাবে বৃহৎ ধাক্কা লাভ কৰিছে ৰাজস্থান ৰয়েলছেও।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
