সলনি হৈছে দেশৰ শিক্ষানীতি৷
পঞ্চম আৰু অষ্টম শ্ৰেণীত আকৌ আৰম্ভ হ’ল পুৰণি নীতি৷
অৰ্থাৎ কোনো ছাত্ৰ অনুতীৰ্ণ হ’লে তেওঁক ফেইল বুলিয়েই এতিয়াৰে পৰা ধৰা হ’ব৷
শিক্ষা মন্ত্রণালয়ৰ তৰফৰ পৰা এক বিজ্ঞাপ্তিৰ জৰিয়তে এইকথা জনোৱা হৈছে৷
পঞ্চম আৰু অষ্টম শ্ৰেণীৰ কোনো ছাত্ৰই পৰীক্ষাত ফেইল কৰিলে তেওঁক আৰু এটা সুযোগ দিয়া হ’ব৷
দুমাহ পুনৰ ক্লাছ কৰাই আকৌ পৰীক্ষাত বহুওৱা হ’ব ফেইল কৰা ছাত্ৰক৷
সেই পৰীক্ষাতো যদি পাছ কৰিব নোৱাৰে তেন্তে ফেইল বুলিয়েই ধৰা হ’ব৷
অৰ্থাৎ ওপৰৰ ক্লাছলৈ যাব নোৱাৰিব সেই ছাত্ৰ, পুনৰ এবছৰ একে ক্লাছতেই পঢ়িব লাগিব৷
অৱশ্যে ফেইল কৰা ছাত্ৰক বিদ্যালয়ৰ পৰা বাহিৰ কৰিও দিব নোৱাৰিব৷
পৰীক্ষাত অকৃতকাৰ্য হোৱা ছাত্ৰক পঢ়াশুনাত বিশেষভাৱে সহায় কৰিব লাগিব শ্ৰেণী শিক্ষকে৷
প্ৰয়োজনত কি কি শিকা নাই সেই বিষয়সমূহ ভালকৈ শিকাব লাগিব শ্ৰেণী শিক্ষকে৷
২০১৯ চনত কেন্দ্ৰীয় শিক্ষা অধিকাৰ আইন সলনি কৰা হৈছিল৷
সেই আইনত দেশৰ সকলো প্ৰান্তৰ ছাত্ৰই বুনিয়াদী শিক্ষাৰ বিষয়টো সুনিশ্চিত কৰিবলৈ পঞ্চম আৰু অষ্টম শ্ৰেণীত কাকোৱেই ফেইল কৰাব নোৱাৰিব বুলি কৈছিল৷
পাঁচ বছৰৰ পাছত সেই শিক্ষাৰ অধিকাৰ আইনত আকৌ সালসলনি আনিছে কেন্দ্ৰীয় শিক্ষা আয়োগে৷
কেন্দ্ৰৰ নতুন পাছ-ফেইল নীতি কাৰ্যকৰী হ’ব কেন্দ্ৰীয় বৰ্ডৰ নিয়ন্ত্ৰণাধীন দেশৰ ৩০০০তকৈয়ো বেছি স্কুলত৷
এই তালিকাত আছে কেন্দ্ৰীয় বিদ্যালয়, নবোদয় আৰু সৈনিক স্কুলসমূহো৷
দেশৰ ১৬খন ৰাজ্য দুখন কেন্দ্ৰীয় শাসিত এলেকাত এই নিয়ম কাৰ্যকৰী হ’ব৷
হাৰিয়ানা আৰু পুদুচেৰীত অৱশ্যে এতিয়ালৈকে এয়া কাৰ্যকৰী হ’বনে জানিব পৰা হোৱা নাই৷
বাকী ৰাজ্যসমূহে কেন্দ্ৰৰ এই নীতি মানি চলিব লাগিব বুলি নিৰ্দেশনা দিয়া হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
