নতুন বছৰত এইকেইটা কামত সাল-সলনি, আজিয়ে সাজু হওক
নতুন বছৰ সমাগত, মাজত আৰু মাথো এটা দিন। তাৰ পূৰ্বে আহিছে খবৰ। নতুন বছৰত ১ জানুৱাৰীৰ পৰা সাল-সলনি ঘটিব কেইবাটাও দৈনন্দিন কাম-কাজত। যাৰ বাবে আজিয়ে সাজু হোৱাটো প্ৰয়োজন। জিএছটি, ভিছা, এল পি জি, ইপিএফঅ, ইউপি আই আদিত পৰিৱৰ্তন।
এল পি জি চিলিণ্ডাৰ দামৰ পৰিৱৰ্তন-
প্ৰতিমাহৰ আৰম্ভণিতে হ্ৰাস বা বৃদ্ধি হয় চিলিণ্ডাৰৰ মূল্য। শেহতীয়াকৈ ১৯কেজি বাণিজ্যিক চিলিণ্ডাৰৰ দাম উঠা-নমা হৈছে, আনহাতে কেইবামাহ ধৰি স্থিৰাৱস্থাত আছে ১৪কেজি চিলিণ্ডাৰৰ মূল্য। গতিকে ২০২৫ৰ পহিলা জানুৱাৰীতে উঠা-নমা হব পাৰে এল পি জি চিলিণ্ডাৰৰ দাম।
কৰ্মচাৰী ভৱিষ্যত নিধিৰ পেঞ্চন উলিওৱাৰ সুবিধা-
কৰ্মচাৰী প্ৰভিডেণ্ট ফাণ্ড অৰ্গেনাইজেচনৰ (ই পি এফ অ’) পেঞ্চনাৰসকলে ১ জানুৱাৰীৰ পৰা অতিৰিক্ত পৰীক্ষণ অবিহনে যিকোনো বেংকৰ পৰা পেঞ্চন উলিয়াব পাৰিব, যাৰ ফলত তেওঁলোকৰ বাবে ইয়াক অধিক সুলভ কৰি তোলা হ’ব। লগতে প্ৰায় ৭কোটিৰো অধিক কৰ্মচাৰীয়ে পহিলা জানুৱাৰীৰ পৰাই লাভ কৰিব এ টি এমৰ সুবিধা। কেন্দ্ৰীয় শ্ৰম আৰু নিয়োগ মন্ত্ৰালয়ে সদৰি কৰিছে এই তথ্য।
ম্যাদ উকলিব এন এছ ইৰ চুক্তিৰ
শেহতীয়াকৈ ৰাষ্ট্ৰীয় ষ্ট্ৰক একচেঞ্জে তেওঁলোকৰ চুক্তিৰ ম্যাদ উকলাৰ তাৰিখ ঘোষণা কৰিছে। বছৰটোৰ শেষৰ দিনটোত অন্ত পৰিব ষ্ট্ৰক একচেঞ্জৰ ত্ৰিমাসিক চুক্তি। ২০২৫ৰ ২জানুৱাৰীৰ পৰা এই চুক্তি পুনৰ নতুনকৈ আৰম্ভ কৰিব লাগিব।
ইউপিআই লেনদেনৰ সীমা বৃদ্ধি কৰা হৈছে
ইউপিআই ১২৩পেৰ লেনদেনৰ সীমা ৫,০০০ টকাৰ পৰা ১০,০০০ টকালৈ বৃদ্ধি কৰা হ’ব, এইদৰে ফিচাৰ ফোন ব্যৱহাৰকাৰীসকলে লেনদেন কৰাৰ ক্ষেত্ৰত সুবিধা পাব। ২০২৫ৰ পহিলা জানুৱাৰীৰ পৰাই এই নীতি কাৰ্যকৰী হব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
