উত্তৰ প্ৰদেশৰ মথুৰা ৰে’লৱে ষ্টেচনৰ পৰা চুৰি হোৱা ৭ মহীয়া এটি কেঁচুৱা এজন বিজেপি নেত্ৰীৰ ঘৰৰ পৰা উদ্ধাৰ কৰিবলৈ সক্ষম হৈছে আৰক্ষীয়ে। যোৱা সপ্তাহত মথুৰা ষ্টেচনৰ প্লেটফৰ্মত মাক-দেউতাক শুই থকাৰ সময়তে এজন লোকে শিশুটিক তুলি লৈ পলায়ন কৰিছিল।
শিশুটিক চুৰি কৰা ব্যক্তিজনৰ সমগ্ৰ দৃশ্য প্লেটফৰ্মত স্থাপন কৰা চিচিটিভিত বন্দী হয়। ইয়াৰ পাছতে আৰক্ষীয়ে তৎকালীনভাৱে ব্যৱস্থা গ্ৰহণ কৰি মথুৰাৰ পৰা ১০০ কিলোমিটাৰ নিলগত বিজেপিৰ এগৰাকী কাউন্সিলাৰৰ ঘৰৰ পৰা শিশুটি উদ্ধাৰ কৰে।
প্ৰাপ্ত খবৰ অনুসৰি, বিজেপিৰ কাউন্সিলাৰ বিনীতা আগৰৱালা আৰু তেওঁৰ স্বামীয়ে শিশু চুৰি চক্ৰটোৰ পৰা ১.৮ লাখ টকাত এই শিশুটিক ক্ৰয় কৰিছিল। আৰক্ষীয়ে প্ৰকাশ কৰা অনুসৰি বিনীতা আগৰৱালাৰ এগৰাকী কন্যা আছে যদিও তেওঁ এজন পুত্ৰ বিচাৰিছিল আৰু ইয়াৰ বাবেই তেওঁ শিশুটিক অবৈধভাৱে ক্ৰয় কৰিছিল।
লগতে পঢ়ক ৰতন টাটাৰ অডিঅ’ টেপ লিকড্! উচ্চতম ন্যায়ালয়ত শুনানি, কোনে কৰিছিল লিকড্?
ইতিমধ্যে আৰক্ষীয়ে এই ঘটনাৰ সন্দৰ্ভত দুগৰাকী চিকিৎসকসহ ৮গৰাকী লোকক গ্ৰেপ্তাৰ কৰিছে। ইফালে উদ্ধাৰ কৰাৰ পাছতে ৰে’ল আৰক্ষীয়ে শিশুটিক অভিভাৱকক গতাই দিছে।
ঘটনা সন্দৰ্ভত জ্যেষ্ঠ আৰক্ষী বিষয়া মহম্মদ মুছতাকে এক সংবাদমেলত কয় যে, ‘দীপ কুমাৰ নামৰ এজন ব্যক্তিয়ে শিশুটিক চুৰি কৰি লৈ গৈছিল। চুবুৰীয়া হাথৰাছ জিলাৰ এখন চিকিৎসালয়ৰ দুজন চিকিৎসকো এই গেঙৰ সদস্য। ইয়াৰ লগত আন একাংশ স্বাস্থ্যকৰ্মীও জড়িত হৈ আছে।’’
আৰক্ষী বিষয়াগৰাকীয়ে লগতে আৰু কয় যে ‘‘যাৰ ঘৰত শিশুটিক পোৱা গৈছিল তেওঁলোকক সোধা-পোছা কৰিলোঁ, তেওঁলোকে আমাক ক’লে যে তেওঁলোকৰ মাত্ৰ এগৰাকী ছোৱালী আছে আৰু তেওঁলোকে এজন পুত্ৰ বিচাৰে, সেইবাবেই তেওঁলোকে শিশুটিক ক্ৰয় কৰিছে।’’
ইফালে সোধা-পোছাৰ পাছতে বিজেপি নেত্ৰীগৰাকীকো গ্ৰেপ্তাৰৰ সম্ভাৱনা আছে বুলি আৰক্ষীয়ে জানিবলৈ দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ