ভয়াৱহ তথ্য- জলবায়ু পৰিৱৰ্তনৰ বাবে ছমাহত ২৫০০ লোকৰ মৃত্যু, ৩.৪৩ লাখ কোটি টকাৰ লোকচান
প্ৰকাশ পাইছে জলবায়ু পৰিৱৰ্তনৰ এক ভয়াৱহ দৃশ্যপট। মাথো ৬ মাহৰ প্ৰকাশিত প্ৰতেবিদনতে ওলাই অহা তথ্যই চিন্তাত পেলাইছে পৰিবেশবিদক। এই বছৰ জলবায়ু পৰিৱৰ্তনৰ পৰিঘটনাৰ ফলত বতৰৰ অৱনতি ঘটাৰ বাবে এতিয়ালৈকে ২৫০০ লোকে প্ৰাণ হেৰুৱাইছে আৰু ৪১ বিলিয়ন ডলাৰ (প্ৰায় ৩.৪৩ লাখ কোটি টকা) লোকচান হৈছে।
ভাৰতত চলি থকা তীব্ৰ উত্তাপৰ মাজতে এই প্ৰতিবেদন প্ৰকাশ কৰিছে ব্ৰিটেইনৰ বেচৰকাৰী সংস্থা খ্ৰীষ্টিয়ান এইডে। প্ৰতিবেদন অনুসৰি বিগত ছমাহৰ এই বতৰৰ পৰিঘটনাসমূহ জলবায়ু পৰিৱৰ্তনৰ বাবেই হোৱাৰ সম্ভাৱনা আছে। এই মূল্যায়ন যোৱা বছৰৰ ডিচেম্বৰ মাহত ডুবাইত অনুষ্ঠিত আন্তঃৰাষ্ট্ৰীয় জলবায়ু আলোচনা (COP28)ৰ পিছত কৰা হৈছে।
এন জি অ’টোৰ মতে, COP28ৰ পিছতো ইউ এ ইত জীৱাশ্ম ইন্ধন পৰিত্যাগ আৰু জলবায়ু দুৰ্যোগৰ সৈতে মোকাবিলা কৰাত দৰিদ্ৰ দেশসমূহক সহায় কৰিবলৈ কোনো বিশেষ অগ্ৰগতি হোৱা নাই।
এন জি অ’ৰ এজন বিষয়া খ্ৰীষ্টান এইডে কয় যে বায়ুমণ্ডল উষ্ণ কৰি তোলা সেউজ গৃহ গেছৰ বাবে ধনী দেশসমূহেই আটাইতকৈ বেছি দায়ী, তেওঁলোকে দায়িত্ব ল’ব লাগে আৰু তেওঁলোকে ক্ষতিপূৰণৰ পুঁজিত অৰিহণা যোগাব লাগে যাতে আন দেশসমূহক বতৰৰ চৰম পৰিঘটনাৰ সৈতে মোকাবিলা কৰাত আৰু আৰোগ্য লাভ কৰাত সহায় কৰিব পাৰে। COP28 ত জলবায়ু পৰিৱৰ্তনৰ পৰিঘটনাৰ বাবে দৰিদ্ৰ দেশসমূহে হোৱা লোকচানৰ ক্ষতিপূৰণৰ বাবে এটা পুঁজি গঠন কৰাৰ বাবে সহমতত উপনীত হৈছিল।
ভাৰতত গৰমৰ বাবে বৃহৎ সংখ্যাত লোকৰ মৃত্যু ঘটিছে। ইয়াৰ ফলত হোৱা অৰ্থনৈতিক ক্ষতিৰ কোনো মূল্যায়ন কৰা হোৱা নাই যদিও ইয়াৰ প্ৰভাৱ পৰিছে মানুহৰ ওপৰত। উপসাগৰীয় অঞ্চলতো জলবায়ু পৰিৱৰ্তনৰ বাবে বানপানীৰ আশংকা ক্ৰমাগতভাৱে বৃদ্ধি পাইছে।
প্ৰতিবেদন অনুসৰি দক্ষিণ আৰু দক্ষিণ-পশ্চিম এছিয়াত বানপানীৰ ফলত কমেও ২১৪ জন লোকৰ মৃত্যু হোৱাৰ লগতে কেৱল সংযুক্ত আৰব আমিৰশ্বাহীতে ৮৫ কোটি ডলাৰৰ বীমাকৃত লোকচান হৈছে।
পশ্চিম, দক্ষিণ আৰু দক্ষিণ-পূব এছিয়াত হোৱা গৰমৰ ঢৌৱে কেৱল ম্যানমাৰতে একেলগে ১৫০০ৰো অধিক লোকৰ মৃত্যু হৈছে। ব্ৰাজিলত বানত ১৬৯ জন লোকৰ মৃত্যু হোৱাৰ লগতে কমেও সাত বিলিয়ন ডলাৰৰ অৰ্থনৈতিক ক্ষতিসাধন হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
