উত্তৰ প্ৰদেশ বিধানসভাৰ নিৰ্বাচনৰ ফলাফলৰ ছবি প্ৰায় স্পষ্ট হৈ পৰিছে৷ ভোটগণনা অব্যাহত থকা উত্তৰ প্ৰদেশ বিধানসভাৰ নিৰ্বাচন পুনৰ শাসনাধিষ্ঠ বিজেপিয়ে ক্ষমতা দখল কৰাতো একপ্ৰকাৰে নিশ্চিত হৈছে৷
শাসনাধিষ্ঠ বিজেপিয়ে এই মুহূৰ্তলৈকে ২৫৭ খন আসনত অগ্ৰগতি লাভ কৰি পুনৰ চৰকাৰ গঠনৰ দিশে ধাৱমান হৈছে৷ ৰাজ্যখনত পুনৰ বিজেপিয়ে চৰকাৰ গঠন কৰিলে মুখ্যমন্ত্ৰী যোগী আদিত্যনাথে উত্তৰ প্ৰদেশৰ ৰাজনৈতিক ইতিহাসত এক অভিলেখ ৰচিব৷
উল্লেখ্য যে উত্তৰ প্ৰদেশৰ ৰাজনৈতিক ইতিহাসত যোৱা ৩৭ টা বছৰে কোনো দল তথা মুখ্যমন্ত্ৰী একেৰাহে দুবাৰকৈ চৰকাৰ গঠন কৰিবলৈ সক্ষম হোৱা নাছিল৷ যোগী আদিত্যনাথৰ নেতৃত্বত ৰাজ্যখনত বিজেপিয়ে চৰকাৰ গঠন কৰিলেই ৩৭ টা বছৰৰ অন্তত যোগীয়ে এই ইতিহাস ৰচিব৷
লগতে পঢ়ক ৰাছিয়াৰ বৃহৎ মুখথেকেচা! খাৰকিভসহ অন্য এক হেৰুওৱা চহৰ উদ্ধাৰ ইউক্ৰেইন সেনাৰ
যোগীয়ে কেৱল ইতিহাস ৰচনা কৰাই নহয়, যোগীয়ে বিজেপিৰ দলতো নিজৰ কদৰ পূৰ্বতকৈ বৃদ্ধি কৰিবলৈ সক্ষম হোৱা বুলি চৰ্চা লাভ কৰিছে৷
উত্তৰ প্ৰদেশত পুনৰ বিজেপিক ক্ষমতাত অধিষ্ঠিত কৰাত যোগীৰ একক প্ৰচেষ্টাও চৰ্চা লাভ কৰিছে৷ বিজেপিৰ চাণক্য তথা কেন্দ্ৰীয় গৃহমন্ত্ৰী অমিত শ্বাহ আৰু প্ৰধানমন্ত্ৰী নৰেন্দ্ৰ মোদীয়ে উত্তৰ প্ৰদেশত নিৰ্বাচনী প্ৰচাৰ চলালেও সমগ্ৰ নিৰ্বাচনী যুঁজৰ নেতৃত্ব লৈছিল যোগী আদিত্যনাথে৷ সেয়ে ৰাজনৈতিক বিশেষজ্ঞসকলে উত্তৰ প্ৰদেশত বিজেপিৰ এই সফলতাৰ বাবে যোগী আদিত্যনাথক কৃতিত্ব প্ৰদান কৰিছে৷
উত্তৰ প্ৰদেশৰ এই নিৰ্বাচনটো বিজেপিৰ লগতে যোগী আদিত্যনাথৰ বাবে কে’বাটাও কাৰণত মাইলষ্টোন হৈ ৰ’ব বুলি চৰ্চা লাভ কৰিছে৷ উল্লেখ্যে ২০১৪ চনৰ পিছত বিজেপি দলে প্ৰথমবাৰৰ বাবে কোনো এখন ৰাজ্যৰ নিৰ্বাচনত ৰাজ্যখনৰ মুখ্যমন্ত্ৰীগৰাকীৰ সফলতাক নিৰ্বাচনী প্ৰচাৰৰ মুখ্য এজেণ্ডা হিচাপে গ্ৰহণ কৰিছিল৷
লগতে পঢ়ক মঞ্চৰ এজন কমেডিয়ানৰ পৰা পঞ্জাৱৰ মুখ্যমন্ত্ৰীলৈ ভগৱন্ত সিং মানৰ ৰোমাঞ্চকৰ যাত্ৰা…
প্ৰধানমন্ত্ৰী নৰেন্দ্ৰ মোদী আৰু গৃহমন্ত্ৰী অমিত শ্বাহেও উত্তৰ প্ৰদেশৰ নিৰ্বাচনী প্ৰচাৰত যোগী আদিত্যনাথ চৰকাৰৰ সফলতাকে নিৰ্বাচনী প্ৰচাৰৰ এজেণ্ডা হিচাপে প্ৰক্ষেপ কৰিছিল৷
ইফালে যোগীয়ে প্ৰায় একক প্ৰচেষ্টাৰে বিজেপিক উত্তৰ প্ৰদেশৰ ক্ষমতাত বাহাল ৰাখিবলৈ সফল হোৱাৰ প্ৰধান কাৰণ তেওঁৰ ৰাজনৈতিক বিচক্ষণতা বুলি ৰাজনৈতিক বিশেষজ্ঞসকলে চিহ্ণিত কৰিছে৷ উত্তৰ প্ৰদেশৰ এই সফলতাই যোগী আদিত্যনাথক বিজেপিৰ ভিতৰ চ’ৰাত প্ৰধানমন্ত্ৰী নৰেন্দ্ৰ মোদীৰ বিকল্পৰূপে অধিক শক্তিশালী কৰিব বুলিও চৰ্চা লাভ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
