কলকাতা হাইকৰ্টত ধাক্কা খালে মহম্মদ ছামীয়ে৷ ভৰণপোষণৰ বাবদ প্ৰাক্তন পত্নী হাছিন জাহানক প্ৰতি মাহে ডেৰ লাখ টকাকৈ দিব লাগিব ছামীক৷ কন্যাৰ বাবে মাহিলী দিব লাগিব আঢ়ৈ লাখকৈ টকা৷ কন্যাৰ পঢ়াশুনা বা অন্য প্ৰয়োজনত আকৌ টকা খচৰ কৰিব লাগিব ভাৰতীয় দলৰ ক্ৰিকেটাৰে৷ গাৰ্হস্থ্য হিংসাৰ গোচৰত নিষ্পত্তি নোহোৱা পৰ্যন্ত এই টকা দিব লাগিব ছামীয়ে৷ মঙলবাৰে এই নিৰ্দেশ দিছে ন্যায়াধীশ অজয় কুমাৰ মুখাৰ্জীয়ে৷
২০১৪ চনত মডেল তথা অভিনেত্ৰী জাহানৰ সৈতে বিয়া কৰাইছিল ছামীয়ে৷ ২০১৫ চনত তেওঁলোকৰ মাজলৈ আহে এগৰাকী কন্যাসন্তান৷ কিন্তু তেওঁলোকৰ দাম্পত্য সুখৰ নহ’ল৷ ২০১৮ চনত যাদৱপুৰ থানাত ছামী আৰু তেওঁৰ পৰিয়ালৰ বিৰুদ্ধে গাৰ্হস্থ্য হিংসাৰ অভিযোগ দাখিল কৰিছিল জাহানে৷ পত্নীক নিৰ্যাতন, বিষ খুওৱাবলৈ চেষ্টা কৰা, হত্যাৰ চেষ্টা, ধৰ্ষণসহ একাধিক অভিযোগ দাখিল কৰা হৈছিল ছামীৰ বিৰুদ্ধে৷ বিবাহবিচ্ছেদৰ বাবে সেয়ে আদালতৰ দ্বাৰস্ত হৈছিল জাহান৷ প্ৰটেকছন অফ উইমেন ফ্ৰম ডমেষ্টিক ভায়োলেন্স এক্ট ২০০৫ অনুসৰি গোচৰ দাখিল কৰিছিল তেওঁ৷ গোচৰৰ খৰচ আৰু অন্তৰ্বৰ্তীকালিন ভৰণপোষণৰ বাবদ ১০ লাখ টকাও বিচাৰিছিল৷ নিজৰ বাবে মাহিলী ৭ লাখ আৰু কন্যাৰ বাবে মাহত ৩লাখ টকা বিচাৰিছিল৷ কিন্তু নিম্ন আদালতে তেওঁৰ এই আবেদন গ্ৰাহ্য নকৰিলে৷ আলিপুৰ আদালতে কেৱল তেওঁৰ সন্তানক ৮০,০০০ টকা প্ৰতিমাহে দিবলৈ নিৰ্দেশ দিয়ে ছামীক৷ পাছলৈ জিলা জাজে সেই নিৰ্দেশ সংশোধন কৰি জাহানকো মাহিলী ৫০ হাজাৰ টকাকৈ দিয়াৰ নিৰ্দেশ দিয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
